ឧត្តរមានជ័យៈ អាជ្ញាធរខេត្តឧត្តរមានជ័យសម្រេចបញ្ឈប់ពលរដ្ឋដែលធ្វើសកម្មភាពរុករានដីដើម្បីអាស្រ័យផលនៅស្ថានីយស្តារព្រៃឈើក្នុងក្រុងសំរោង និងស្រុកចុងកាល់ដែលមានទំហំជាង ៧ ពាន់ហិកតាតទៅទៀតហើយ ដោយសារតំបន់នោះជាទីតាំងដែលត្រូវស្ដារឡើងវិញតាមគោលការណ៍របស់រាជរដ្ឋាភិបាល។
លោក សូត្រ ស៊ីសុខឃាង ប្រធានមន្ទីរកសិកម្មរុក្ខាប្រមាញ់ និងនេសាទខេត្តឧត្តរមានជ័យថ្លែងកាលពីថ្ងៃទី ៦ មេសាថា ដីដែលមានព្រំប្រទល់ជាប់ឃុំចំនួន ៤ គឺឃុំពង្រ ឃុំចុងកាល់ ស្រុកចុងកាល់ និងសង្កាត់សំរោង សង្កាត់កូនក្រៀល ក្រុងសំរោងត្រូវបានក្រសួងកសិកម្មសហការជាមួយក្រុមហ៊ុនសាន្តហ៊ាង ដើម្បីស្តារព្រៃឈើឡើងវិញតាមគោលការណ៍រាជរដ្ឋាភិបាលកម្ពុជា។ ប៉ុន្តែមានពលរដ្ឋមួយចំនួនចាញ់បោកជនខិលខូច ហើយបានចូលទៅអាស្រ័យផលលើដីនោះ ហេតុនេះអាជ្ញាធរបានជូនដំណឹងព្រមទាំងផ្សព្វផ្សាយឱ្យពួកគាត់ឈប់អាស្រ័យផលនៅទីនោះបន្តទៀត។
លោកថ្លែងថា៖ «ប្រសិនបើពលរដ្ឋពិតជាគ្មានដីយើងឱ្យពួកគាត់ស្នើសុំតាមរយៈអាជ្ញាធរមូលដ្ឋានជាសម្បទានសង្គមកិច្ច ប៉ុន្តែយើងមិនទម្លាប់ឱ្យពលរដ្ឋចូលទៅចាប់ដីអនាធិបតេយ្យទៅលើដីរដ្ឋទេ។ យើងបានធ្វើប៉ាណូផ្សព្វផ្សាយបិទលើទីតាំងដីនោះឱ្យពលរដ្ឋដឹង ប៉ុន្តែវាមានអ្នកនៅពីក្រោយខ្នងខ្លះបង្កើតរឿងធ្វើឱ្យស្មុគស្មាញដើម្បីបំផុសឱ្យមានរូបភាពផ្សេងៗអ៊ីចឹង»។
អភិបាលរងខេត្តឧត្ដរមានជ័យ លោក វ៉ាត់ ប៉ារ៉ានីន បានថ្លែងថា អាជ្ញាធរបានកាត់ឆ្វៀលផ្តល់ដីជូនពលរដ្ឋរួចហើយ តែមានពលរដ្ឋខ្លះបានទៅនៅលើដីក្រុមហ៊ុនដែលកំពុងរៀបចំដាំដើមឈើ។ មុនពេលក្រុមហ៊ុនចូលមកអភិវឌ្ឍតំបន់នោះមានពលរដ្ឋមួយចំនួនបានអាស្រ័យផលហួសដីដែលអាជ្ញាធរធ្លាប់បានផ្តល់ជូនពួកគាត់។
លោកថ្លែងថា៖ «មានបងប្អូនមួយចំនួនមើលឃើញដីនៅតំបន់ហ្នឹងរាងទំនងក៏ធ្វើស្រែលើហ្នឹងទៅ ហើយចំណែកបងប្អូនមួយចំនួនទៀតដែលធ្វើចម្ការនៅទីនោះ ធ្វើយូរៗទៅមើលឃើញដីក្បែរហ្នឹងទំនងដែរ ក៏ភ្ជួររំលងចូលទៅដីនៅក្បែរហ្នឹងទៅ។ យ៉ាងណា យើងបានសម្របសម្រួលជាមួយពលរដ្ឋដែលបានធ្វើលើដីរដ្ឋហ្នឹងឱ្យត្រឡប់ទៅអាស្រ័យផលលើដីដែលបានផ្តល់ជូនពួកគាត់ពីមុនហ្នឹងទៅ ឯដីរដ្ឋយើងរក្សាទុកដើម្បីដាំដើមឈើឡើងវិញជាមួយក្រុមហ៊ុន»។
លោក គន្ធ សំរិត ប្រធានសហគមន៍ទួលពង្របានថ្លែងនៅថ្ងៃទី ៦ មេសាដែរថា ក្រុមហ៊ុនបានដាក់គ្រឿងចក្រចូលទៅកាយដីក្រវាត់ព្រំធ្វើឱ្យប៉ះពាល់ពលរដ្ឋជាច្រើនគ្រួសារ។ ពួកគាត់ជាពលរដ្ឋនៅមិនទាន់ទទួលបានការដោះស្រាយរួចរាល់នៅឡើយទេតាំងកាលពីក្រុមហ៊ុនមុន [ស្ករអំពៅ] ដែលមកធ្វើសម្បទាននៅតំបន់នេះ។
លោកថា៖ «ក្រោយពីក្រុមហ៊ុនស្ករអំពៅបានដកចេញទៅមានក្រុមហ៊ុនថ្មីហ្នឹងចូលមកអភិវឌ្ឍក៏បានប៉ះពាល់បងប្អូនពលរដ្ឋនៅទីហ្នឹងចំនួនប្រមាណ ៩០ គ្រួសារ មិនទាន់បានដោះស្រាយអីចឹងពេលក្រុមហ៊ុនថ្មីនេះចូលមកវាបង្កើតជាបញ្ហាជាន់លើបញ្ហា» ។
បើតាមលោក សំរិត កន្លងមកអាជ្ញាធរក៏បានដោះស្រាយជូនពលរដ្ឋបានមួយចំនួនហើយ ប៉ុន្តែនៅមានពលរដ្ឋមួយចំនួនមិនព្រមទទួលយកតាមការសម្របសម្រួលណែនាំរបស់អាជ្ញាធរទេ។ «ការដោះស្រាយហ្នឹងអ្នកខ្លះគាត់ដោះពីនេះទៅជាន់ដីអ្នកនៅទីនោះអ៊ីចឹងទៅ ជាហេតុធ្វើឱ្យពួកគាត់មិនទទួលយកមានន័យថា ដីតំបន់ហ្នឹងធ្លាប់ដោះដូរឱ្យពលរដ្ឋទៅយកនៅកន្លែងផ្សេងហើយ តែពេលគាត់ទៅយកក៏បានជាន់គ្នាជាមួយអ្នកផ្សេងទៀតអ៊ីចឹងគាត់ក៏មកយកដីកន្លែងចាស់គាត់វិញបាទ»។
យ៉ាងណាក្ដីលោក ប៉ារ៉ានីន បានអះអាងថា ដីស្រុកចុងកាល់ និងក្រុងសំរោង ត្រង់ចំណុច ៤ ឃុំនោះនៅឆ្នាំ ២០២១ នេះក្រសួងកសិកម្មបានសហការជាមួយក្រុមហ៊ុនសាន្តហ៊ាងដើម្បីដាំដើមឈើឡើងវិញ ហើយក្នុងពេលថ្មីៗក្រុមហ៊ុនក៏បានដាក់គ្រឿងចក្រដើម្បីស្តារព្រំឡើងវិញធ្វើជាផ្លូវសម្រាប់ងាយស្រួលក្នុងការដាំដើមឈើផងដែរ។
លោកថា៖ «ពលរដ្ឋដែលទទួលបានការកាត់ឆ្វៀលហើយអាស្រ័យផលនៅទីនោះគាត់សប្បាយចិត្ត ព្រោះបានផ្លូវបានអីចឹងទៅគាត់ងាយស្រួលចេញ-ចូលតែបងប្អូនដែលបានរុករាននោះ គាត់មិនសប្បាយចិត្តទេ»។
លោក ស្រី ណារេន អ្នកសម្របសម្រួលសមាគមអាដហុកខេត្តឧត្តរមានជ័យថ្លែងថា កន្លងមកពលរដ្ឋនៅតំបន់នោះមួយចំនួនបានទទួលយកដីសម្បទានសង្គមកិច្ចរួចហើយ។ ប៉ុន្តែនៅមានប្រមាណ ៩០ គ្រួសារទៀតមិនទាន់ទទួលបាន ហេតុនេះពួកគាត់ក៏បានទៅអាស្រ័យផលលើដីតំបន់នោះជាបណ្តោះអាសន្នទៅ។
លោកថ្លែងថា៖ «ពលរដ្ឋបានដាក់ពាក្យស្នើសុំដីសង្គមកិច្ចហើយ ប៉ុន្តែរហូតមកទល់ពេលនេះមិនទាន់បានទេ អ៊ីចឹងពួកគាត់មួយចំនួនបានចូលទៅអាស្រ័យផលលើដីហ្នឹងគ្រាន់តែយកផលដើម្បីចិញ្ចឹមជីវិតទេ»៕