.jpg)
ទឹកស្រះកស្សិណ្ធុប្រាសាទបាគងរីង ដែលបានបណ្ដាលអោយត្រីនៅក្នុងនោះងាប់ជាបណ្ដើរៗ។ រូបថត ហ្វេសប៊ុក
សៀមរាបៈ អាជ្ញាធរជាតិអប្សរា និងអាជ្ញាធរស្រុកប្រាសាទបាគង ខេត្តសៀមរាបពីម្សិលមិញបានដឹកទឹកបញ្ចូលស្រះនៅកស្សិណ្ធុប្រាសាទបាគងដើម្បីជួយសង្គ្រោះត្រីប្រាមួយចំនួនដែលនៅសល់ បន្ទាប់ពីត្រីប្រា ១២ ក្បាលងាប់ជាបន្តបន្ទាប់ ដោយសារខ្វះទឹក។
លោក ឡេង កុសល អ្នកនាំពាក្យអាជ្ញាធរជាតិអប្សរាប្រាប់ភ្នំពេញប៉ុស្ដិ៍ពីម្សិលមិញថា អាជ្ញាធរជាតិអប្សរា និងអាជ្ញាធរស្រុកប្រាសាទបាគង សហការគ្នាប្រើប្រាស់រថយន្តដឹកទឹក ៦ គ្រឿងដឹកទឹកបញ្ចូលស្រះកស្សិណ្ធុប្រាសាទបាគងក្នុងការជួយសង្គ្រោះបឋមនូវត្រីប្រា និងត្រីជាច្រើនប្រភេទទៀតដែលកំពុងខ្វះទឹក។
លោកថាអាជ្ញាធរជាតិអប្សរាគិតគូរពីបញ្ហានេះរៀងរាល់ឆ្នាំ។ ប៉ុន្តែដោយសារកស្សិណ្ធុប្រាសាទបាគងមិនមានមុខទឹកសម្រាប់បង្ហូរពីកន្លែងផ្សេងបញ្ចូល កស្សិណ្ធុមួយនេះរំពឹងរង់ចាំទឹកភ្លៀងប៉ុណ្ណោះ ដូចជាស្រះស្រង់ដែរ មិនមានប្រភពទឹកនៅជិតដែលអាចបង្ហូរចូលភ្លាមៗបាននោះទេ។
លោកបញ្ជាក់ថា៖ «បច្ចុប្បន្ននេះនៅកស្សិណ្ធុប្រាសាទបាគងមិនទាន់រីងស្ងួតនោះទេ គ្រាន់តែទឹករាក់រួមតូចថ្ងៃក្តៅខ្លាំង ដែលធ្វើឲ្យត្រីមួយចំនួនងាប់។ ដូច្នេះយើងដឹកទឹកពីកន្លែងផ្សេងដាក់បញ្ចូល ដើម្បីជួយសង្គ្រោះត្រីទាំងនោះជាបឋមសិន ហើយនឹងនៅរង់ចាំទឹកភ្លៀង»។
លោក សូរ ប្លាតុង អភិបាលស្រុកប្រាសាទបាគងថ្លែងពីម្សិលមិញថា លោកបានដឹកនាំកម្លាំងចុះទៅដឹកទឹកដាក់បញ្ចូលស្រះកស្សិណ្ធុប្រាសាទបាគងនេះ។ តាំងពីព្រឹកដល់ល្ងាចថ្ងៃទី ១០ មិថុនា ក្រុមការងារបានប្រើប្រាស់រថយន្តដឹកទឹកចំនួន ៦ គ្រឿង ហើយដឹកជញ្ជូនទឹកដាក់បញ្ចូលស្រះប្រមាណជាង ២០ រថយន្តហើយ។
លោកបន្តថា ក្រុមការងារនឹងបន្តដឹកនៅថ្ងៃទី ១១ ឬ ១២ មិថុនា ទៀត ដើម្បីជួយសង្គ្រោះត្រីដែលនៅក្នុងស្រះនេះ។ ក្រៅពីដឹកទឹកបញ្ចូលស្រះ អាជ្ញាធរបាននិងកំពុងជីកអណ្ដូងទឹក ២ កន្លែងបន្ថែមទៀតនៅក្បែរនោះ ដើម្បីងាយស្រួលបូមបញ្ចូលស្រះតែម្ដង។
លោកថា៖ «ស្រះកស្សិណ្ធុប្រាសាទបាគងនេះមិនមានមុខទឹកសម្រាប់បង្ហូរទឹកបញ្ចូលទេ ពោលគឺពឹងអាស្រ័យទៅលើទឹកភ្លៀង។ រៀងរាល់ឆ្នាំស្រះនេះមិនដែលមានទឹកស្រកបែបនេះ ហើយក៏គ្មានត្រីងាប់ដែរ ហើយកាលពីឆ្នាំទៅ យើងបានស្ដារស្រះនេះម្ដងហើយ។ ទោះជាយ៉ាងណា យើងនឹងរកវិធីដោះស្រាយឲ្យល្អប្រសើរឡើងវិញ»។
Fresh News បានស្រង់សម្តីពលរដ្ឋម្នាក់សុំមិនបញ្ចេញឈ្មោះដែលរស់នៅជិតប្រាសាទបាគងពីម្សិលមិញថា ត្រីប្រាទាំងនោះបានងាប់តាំងពីរសៀលថ្ងៃទី ៨ មិថុនា។ លោករស់នៅទីនេះមានអាយុជាង ៥០ ឆ្នាំហើយមិនដែលឃើញកស្សិណ្ធុប្រាសាទនេះរីងទឹក និងឃើញមានត្រីធំៗងាប់បែបនេះទេ។ លោកថា ត្រីទាំងនេះគេមិនបរិភោគទេ គេជឿទៅលើជំនឿថាជាត្រីអ្នកតា និងមួយចំនួនទៀតថា សាច់ត្រីនេះមានក្លិនស្អុយជាប់ភក់៕
