.jpg)
លោក ម៉ែន គុង អ្នកនាំពាក្យសាលាខេត្តស្ទឹងត្រែងបានថ្លែងនៅក្នុងសន្និសីទកាសែតនៅទីស្ដីការគណៈរដ្ឋមន្ត្រីកាលពីម្សិលមិញ។ ហ៊ាន រង្សី
ស្ទឹងត្រែងៈ រដ្ឋបាលខេត្ដស្ទឹងត្រែងបានត្រៀមទុកទីទួលសុវត្ថិភាពចំនួន ១២០ ទីតាំង សម្រាប់សង្គ្រោះពលរដ្ឋពីគ្រោះទឹកជំនន់រដូវវស្សាឆ្នាំនេះ ក្រោយពេលក្រសួងធនធានទឹក និងឧតុនិយមព្យាករថា ស្ថានភាពជំនន់អាចនឹងមានកម្រិតខ្ពស់ដូចទៅនឹងឆ្នាំ ២០១៩ ឬឆ្នាំ ១៩៩៤។ យោងតាមលោក ម៉ែន គុង នាយករងរដ្ឋបាល និងជាអ្នកនាំពាក្យសាលាខេត្តស្ទឹងត្រែងបានថ្លែងនៅក្នុងសន្និសីទកាសែតនៅទីស្ដីការគណៈរដ្ឋមន្ត្រីកាលពីម្សិលមិញ។
លោក ម៉ែន គុង បានថ្លែងថា កាលពីឆ្នាំ ២០១៩ គ្រោះទឹកជំនន់មិនបានបណ្ដាលឱ្យមនុស្សរងគ្រោះដល់ស្លាប់នោះទេ។ ប៉ុន្ដែបានជម្លៀសពលរដ្ឋដែលរងគ្រោះពីការជន់លិចចំនួន ៣ ៥២៨ គ្រួសារទៅកាន់ទីទួលសុវត្ថិភាព។ លោកបានថ្លែងថា ឆ្នាំ ២០២០ នេះគណៈកម្មាធិការគ្រប់គ្រងគ្រោះមហន្តរាយខេត្ដបានរៀបចំទីទួលសុវត្ថិភាពចំនួន ១២០ ទីតាំងរួចហើយ ដើម្បីត្រៀមទប់ទល់ និងបង្ការគ្រោះទឹកជំនន់ឆ្នាំនេះ។
លោក គុង ថ្លែងថា៖ «តាមការជូនដំណឹងរបស់ក្រសួងធនធានទឹក ស្ថានភាពទឹកជំនន់ក្នុងឆ្នាំ ២០២០ នេះអាចខ្ពស់ប្រហាក់ប្រហែលនឹងឆ្នាំ ២០១៩ ដែរ ហើយទឹកជំនន់កាលពីឆ្នាំ ២០១៩ មានកម្ពស់ខ្ពស់ប្រហាក់ប្រហែលនឹងទឹកជំនន់កាលពីឆ្នាំ ១៩៩៤ ដែលកម្ពស់ទឹកឡើងដល់ជាង ១២ ម៉ែត្រ»។
លោក ម៉ែន គុង ថ្លែងថាឆ្នាំ ២០២០ គណៈកម្មការទប់ស្កាត់គ្រោះមហន្តរាយខេត្ដ និងថ្នាក់ជាតិបានត្រៀមលក្ខណៈរួចរាល់អស់ហើយ ចំពោះការទប់ទល់ នឹងទឹកជំនន់ដោយបានរៀបចំទុកទាំងស្បៀងអាហារ និងសម្ភារផ្សេងៗ ដោយបានរៀបចំទុករួចរាល់នៅក្នុងឃ្លាំង។
លោកបានឱ្យដឹងថា ស្ថានភាពទឹកជំនន់នៅក្នុងខេត្ដស្ទឹងត្រែងក្នុងរយៈពេល ២ ឆ្នាំនេះ (២០១៨-២០១៩) គឺមានស្ថានភាពធ្ងន់ធ្ងរដូចគ្នា។ កាលឆ្នាំ ២០១៩ កន្លងទៅ ប្រជាពលរដ្ឋដែលបានរងផលប៉ះពាល់ដោយផ្ទាល់ និងដោយប្រយោលពីស្ថានភាពគ្រោះទឹកជំនន់នៅក្នុងរដូវវស្សាមានប្រមាណជាង ៩ ០០០ គ្រួសារ។ ប៉ុន្ដែប្រជាពលរដ្ឋដែលរងផលប៉ះពាល់ដោយផ្ទាល់ដែលបានជម្លៀសទៅកាន់ទីទួលសុវត្ថិភាព និងទីកន្លែងដែលមានសុវត្ថិភាពមានចំនួនជាង ៣ ០០០ គ្រួសារ។
លោកបញ្ជាក់ថា ឆ្នាំ ២០២០ នេះគណៈកម្មាធិការគ្រប់គ្រងគ្រោះមហន្តរាយខេត្ដបានដាក់ចេញនូវផែនការស្ដីពីការត្រៀមបង្ការឆ្លើយតបហានិភ័យគ្រោះមហន្តរាយដែលមានផែនការដាច់ដោយឡែកចំនួន ២ គឺផែនការ ត្រៀមបង្ការហានិភ័យគ្រោះទឹកជំនន់ និងគ្រោះរាំងស្ងួត។
លោកបញ្ជាក់ថា៖ «នៅក្នុងដំណាក់កាលនេះ គឺជាដំណាក់កាលដែលយើងត្រៀមបង្ការឆ្លើយតបហានិភ័យគ្រោះទឹកជំនន់ដែលផែនការនេះមានភាពហ្មត់ចត់ ដោយសារមានការណែនាំពីគណៈកម្មាធិការជាតិគ្រប់គ្រងគ្រោះមហន្តរាយផង និងឆ្លងកាត់តាមរយៈស្ថានភាពជាក់ស្ដែងដែលជាបទពិសោធដែលខេត្ដស្ទឹងត្រែងធ្លាប់ជួបប្រទះដោយផ្ទាល់ផងដែរ»។ តាមសេចក្ដីប្រកាសព័ត៌មានរបស់រដ្ឋបាលខេត្តស្ទឹងត្រែងបានឱ្យដឹងថា ទន្លេមេគង្គ ស្ថិតនៅផ្នែកខាងលើជាប់ប្រទេសឡាវមានន័យថា ទន្លេនៅខាងលើ នៅពេលជួបបញ្ហាគ្រោះទឹកជំនន់ពីបណ្តាប្រទេសជិតខាង ខេត្ដនេះនឹងរងគ្រោះថ្នាក់មុនគេព្រោះទឹកខ្ពស់៕
