.jpg)
លោក ហឿន សុខណា (ទី ២ រាប់ពីឆ្វេង)។ រូបថត ហ្វេសប៊ុក ហឿន សុខណា
មណ្ឌលគិរី: អាជ្ញាធរស្រុកកែវសីមាកំពុងស្រាវស្រាវរកអ្នកពាក់ព័ន្ធនឹងឈ្មួញឈើម្នាក់ដែលបានដើរប្រមូលស្នាមមេដៃពលរដ្ឋជាង ២០០ នាក់ ហើយបានដាក់ពាក្យប្ដឹងទៅតុលាការខេត្តមណ្ឌលគិរីស្នើឲ្យដកតំណែងលោក ហឿន សុខណា ពីអភិបាលរងស្រុកកែវសីមាដោយចោទថា ប៉ុនប៉ងមនុស្សឃាត និងពាក់ព័ន្ធនឹងការស៊ីសំណូកពីឈ្មួញឈើធំៗ។
លោក ហឿន សុខណា បានថ្លែងកាលពីថ្ងៃទី ៣ ខែសីហា ថា អាជ្ញាធរកំពុងធ្វើការស្រាវជ្រាវរកអ្នកពាក់ព័ន្ធនឹងឈ្មួញឈើម្នាក់រស់នៅភូមិឡាប៉ាខេ ឃុំស្រែខ្ទុម ដែលបានដើរប្រមូលស្នាមមេដៃពីពលរដ្ឋចំនួន ២៣០ នាក់ហើយបានដាក់ពាក្យប្ដឹងទៅតុលាការខេត្តមណ្ឌលគិរីទាមទារឲ្យដកតំណែងលោកចេញពីអភិបាលរងស្រុកកែវសីមា។
លោកបន្តថា ការប្ដឹងនេះដោយសារកាលពីថ្ងៃទី ២២ ខែ កក្កដា ឆ្នាំ ២០២០ លោកបានដឹកនាំកម្លាំងចម្រុះ ចុះបង្ក្រាបបទល្មើសព្រៃឈើដោយរឹបអូសយកវត្ថុតាងជាក់ស្តែងមានរថយន្ត ១ គ្រឿង ដឹកឈើ ៣ ដុំ និងបន្តចុះមកប្រមូលឈើដែលស្តុកទុកនៅផ្ទះឈ្មោះ ឈាង តៃស្រ៊ីន បានចំនួន ៣៤ កំណាត់បន្ថែមទៀត។ ដូច្នេះឈ្មួញ ឈើ ឈាង តៃស្រ៊ីន នេះបានប្រឌិតរឿងដើរប្រមូលស្នាមមេដៃពីប្រជាពលរដ្ឋនៅក្នុងភូមិឡាប៉ាខេ ឃុំស្រែខ្ទុម ប៉ុន្ដែប្រជាពលរដ្ឋទាំង ២៣០ នាក់នេះមិនបានដឹងរឿងអ្វីទាំងអស់។
លោកបញ្ជាក់ថា៖ «ខ្ញុំបានចាត់ឲ្យរដ្ឋបាលស្រុក និងរដ្ឋបាលឃុំស្រែខ្ទុមចុះទៅសាកសួរប្រជាពលរដ្ឋផ្ទាល់ដែលគាត់បានផ្តិតមេដៃ សួរមូលហេតុអ្វីបានជាគាត់ចង់ដកតំណែងខ្ញុំ គឺពួកគាត់បានឆ្លើយថា ការផ្តិតស្នាមមេដៃនេះគឺដើម្បីស្នើសុំបណ្ណក្រីក្រជួយដល់គ្រួសារមួយឈ្មោះ ឈាង តៃស្រ៊ីន ដែលកូនគាត់កំពុងសម្រាកព្យាបាលនៅមន្ទីរពេទ្យហើយខ្វះលុយ»។
លោកបញ្ជាក់ថា៖ «ពលរដ្ឋឆ្លើយថា ពួកគាត់មិននឹកស្មានថា គេយកមេដៃគាត់ទៅធ្វើរឿងបែបនេះទេព្រោះកាលដែលគេមកឲ្យគាត់ផ្ដិតមេដៃនេះ គេមិនបញ្ជាក់មូលហេតុប្រាប់ពួកគាត់ទេ។ ចំពោះចំណាត់ការយ៉ាងណានោះខ្ញុំនៅមិនទាន់ដឹងនៅឡើយ ព្រោះថ្នាក់លើគាត់មានវិធានការ គឺកំពុងស្រាវជ្រាវអ្នកពាក់ព័ន្ធស្នាមមេដៃ និងអ្នកដើរប្រមូលហ្នឹង»។
លោក ផេង សាវួន នាយប៉ុស្ដិ៍រដ្ឋបាលឃុំស្រែខ្ទុមថ្លែងថា តាមរយៈការសាកសួរប្រជាពលរដ្ឋដែលបានផ្ដិតមេដៃបានរៀបរាប់ប្រាប់សមត្ថកិច្ចថា ពួកគាត់ពិតជាបានផ្ដិតមេដៃឲ្យបុគ្គលឈ្មោះ ឈាង តៃស្រ៊ីន មែន ព្រោះគាត់បានមកសុំឲ្យពលរដ្ឋផ្ដិតមេដៃដើម្បីស្នើសុំបណ្ណក្រីក្រ ពីអាជ្ញាធរសម្រាប់យកទៅសម្រួលដល់ការព្យាបាលកូននៅកំពុងដេកពេទ្យ។
លោកបន្តថា ប្រជាពលរដ្ឋដែលបានផ្ដិតមេដៃនេះ មិនបានដឹងគេយកស្នាមមេដៃពួកគាត់ទៅប្ដឹងតុលាការឲ្យដកតំណែងលោក ហឿន សុខណា ទេ ដោយសារពួកគាត់មិនសូវចេះអានអក្សរ។
លោក សាវួន ថា៖ «ឈាង តៃស្រ៊ីន បានយកក្រដាស ១ សន្លឹកមកឲ្យពលរដ្ឋជួយផ្ដិតមេដៃ ហើយក្នុងក្រដាសហ្នឹងអត់មានសរសេរអក្សរអ្វីទេដោយគ្រាន់តែយកហុចឲ្យពួកគាត់ជួយផ្ដិតមេដៃ ទោះបីពលរដ្ឋសួរបញ្ជាក់ក៏តៃស្រ៊ីន មិនឆ្លើយប្រាប់ការពិតទេ គឺថាយកទៅជួយកូននៅពេទ្យ»។
អ្នកស្រីឈាង តៃស្រ៊ីន អាយុ ៥៦ ឆ្នាំ រស់នៅភូមិឡាប៉ាខេ ឃុំស្រែខ្ទុម ស្រុកកែវសីមា មិនទាន់អាចស្វែងរកប្រភពទាក់ទងសុំការបញ្ជាក់បន្ថែមជុំវិញករណីនេះបានទេ។ ប៉ុន្តែបើតាមពាក្យបណ្តឹងរបស់អ្នកស្រី តៃស្រ៊ីន ចុះថ្ងៃទី ១ ខែសីហា ដែលដាក់ទៅសាលាដំបូងខេត្តមណ្ឌលគិរីពីថ្ងៃទី ៣ ខែសីហា ឲ្យដឹងថា៖ «នាងខ្ញុំ និងប្រជាពលរដ្ឋស្រុកកែវសីមាចំនួន ២៣០ នាក់ កើតទុក្ខមិនសុខចិត្ត សុំដាក់ពាក្យបណ្តឹង ប្តឹងឈ្មោះ ហឿន សុខណា ភេទប្រុស ជាអភិបាលរងស្រុកកែវសីមា ខេត្តមណ្ឌលគិរី ដោយអភិបាលរងរូបនេះ មានបំណងប៉ុនប៉ងធ្វើបាបពលរដ្ឋក្នុងស្រុកកែវសីមាដែលមានចេតនាប្រើអំពើហិង្សាទៅលើប្រជាពលរដ្ឋ ដែលជាកូនចៅក្នុងស្រុករបស់ខ្លួន»។
ពាក្យបណ្តឹងបន្តថា លោក ហឿន សុខណា នេះគាត់អាងអំណាចបានយកកាំភ្លើងខ្លីភ្ជង់គំរាមបាញ់សម្លាប់ប្រជាពលរដ្ឋស្លូតត្រង់ ហើយគាត់បានយកឡានទៅដេញបំបុក និងប៉ុនប៉ងធ្វើឃាតប្រជាពលរដ្ឋ ដែលគ្នាដឹកចំនៀរឈើបន្តិចបន្តួច យកទៅលក់គ្រាន់បានកម្រៃចិញ្ចឹមគ្រួសារ។
ពាក្យបណ្តឹងបញ្ជាក់ថា៖ «រូបនាងខ្ញុំ ឈាង តៃស្រ៊ីន និងប្រជាពលរដ្ឋក្នុងស្រុកកែវសីមា សំណូមពរដល់មន្ត្រីគ្រប់ជាន់ថ្នាក់មេត្តាដកតំណែងឈ្មោះ ហឿន សុខណា ដែលជាមន្ត្រីឃោរឃៅ គ្មានសីលធម៌ប្រើអំពើហិង្សាទៅលើប្រជាពលរដ្ឋ។ ម្យ៉ាងទៀតលោក ហឿន សុខណា នេះមើលឃើញតែអ្នកដឹកចំនៀរឈើបន្តិចបន្តួច ប៉ុន្ដែបើឈ្មួញដឹកឈើមានឡានធំៗគាត់មិនដែលចាប់ទេ ព្រោះមន្ត្រីរូបនេះស៊ីសំណូកសូកប៉ាន់ពីឈ្មួញធំៗច្រើនណាស់»។
លោក មាស ប្រុស អ្នកនាំពាក្យសាលាដំបូងខេត្តមណ្ឌលគិរីថ្លែងថា លោកបានទទួលពាក្យបណ្ដឹងរបស់អ្នកស្រី ឈាង តៃស្រ៊ីន រួចហើយនៅថ្ងៃទី ៣ ខែសីហា ហើយលោកកំពុងធ្វើការត្រួតពិនិត្យ និងចុះលេខក្នុងពាក្យបណ្ដឹង ដើម្បីបញ្ជូនបន្តទៅព្រះរាជអាជ្ញាអមសាលាដំបូងខេត្តពិនិត្យដើម្បីចាត់ចែងតាមនីតិវិធី៕
