ព្រះវិហារ: អាជ្ញាធរមូលដ្ឋានបានបង្ក្រាប និងរឹបអូសឈើជិត ១០ ម៉ែត្រគុប ដែលត្រូវបានលាក់ទុកនៅទីកន្លែងដោយឡែកពីគ្នានៅក្នុងឃុំចំនួន ២ ក្នុងស្រុកឆែប ខណៈសមត្ថកិច្ចកំពុងតាមដានស្រាវជ្រាវរកអត្តសញ្ញាណជនល្មើស ដែលបានគេចខ្លួនពីទីតាំងឈើទាំង ២ កន្លែងនោះ។
លោក សុខ សាន្តតារ៉ា អភិបាលស្រុកឆែបបានថ្លែងពីម្សិលមិញថា សមត្ថកិច្ចជំនាញស្រុកឆែបកំពុងធ្វើការស្រាវជ្រាវរកជនសង្ស័យដែលបានប្រព្រឹត្តបទល្មើសជុំវិញការលួចលាក់ឈើ និងបើករោងកែច្នៃឈើដោយគ្មានច្បាប់អនុញ្ញាត។
ជាក់ស្តែងនៅថ្ងៃទី ១៦ ខែកក្កដា នេះ សមត្ថកិច្ចបានចុះបង្ក្រាប និងរឹបអូសឈើជាង ៣ ម៉ែត្រគុបដែលជាឈើសន្និធិដែលគ្មានលិខិតអនុញ្ញាតត្រឹមត្រូវតាមច្បាប់ ហើយឈ្មួញលាក់ទុកនៅក្រោយភូមិឆែបលិច ឃុំឆែបមួយ ស្រុកឆែប ខេត្តព្រះវិហារ។
នៅថ្ងៃទី ១៧ ខែកក្កដា អាជ្ញាធរបានចុះបង្ក្រាប និងដកហូតឈើជាង ៥ ម៉ែត្រគុបទៀតដែលឈ្មួញលាក់ទុកក្នុងព្រៃស្ថិតនៅភូមិពោធិ៍ទាប ឃុំម្លូព្រៃមួយ ស្រុកឆែប ខេត្តព្រះវិហារ។ ដូច្នេះឈើប្រភេទលេខ ២ នេះមានចំនួនសរុបជិត ១០ ម៉ែត្រគុបដោយវត្ថុតាងទាំងអស់ត្រូវបានប្រគល់ជូនមន្ត្រីជំនាញរដ្ឋបាលព្រៃឈើខេត្តព្រះវិហារចាត់ចែងតាមច្បាប់។
លោក សាន្តតារ៉ា បញ្ជាក់ថា៖ «យើងកំពុងស្រាវជ្រាវរកជនល្មើស តែរហូតមកដល់ពេលនេះ ខ្ញុំមិនទាន់ទទួលដំណឹងអ្វីពីមន្ត្រីជំនាញយើងបន្ថែមទៀតទេ។ ករណីនេះគឺមិនមែនឈ្មួញនៅក្នុងស្រុកនេះអ្នកប្រព្រឹត្តទេ គឺអាចជាអ្នកដែលចំណាកស្រុកផ្សេង ព្រោះខ្ញុំបានសាកសួរអ្នកភូមិយើងខ្លះដែរ គាត់ឆ្លើយថា ម្ដុំយើងហ្នឹងអត់មានអ្នកជួញដូរឈើទេ អ៊ីចឹងមានតែអ្នកក្រៅមកប្រព្រឹត្តបទល្មើសហ្នឹង»។
លោក នួន សុខុម នាយខណ្ឌរដ្ឋបាលព្រៃឈើខេត្តព្រះវិហារពីម្សិលមិញមិនទាន់អាចស្វែងរកប្រភពទាក់ទងសុំការបញ្ជាក់ជុំវិញករណីនេះបានទេ។
លោក ពឹង ទ្រីដា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តព្រះវិហារពីម្សិលមិញបានបដិសេធការធ្វើអត្ថាធិប្បាយជុំវិញករណីនេះ ដោយលោកបានទទួលទូរស័ព្ទ ប៉ុន្ដែចុចផ្ដាច់ទូរស័ព្ទវិញ។
លោក ឈួន ម៉ារឌី អធិការនគរបាលស្រុកឆែបបានថ្លែងពីម្សិលមិញថា សមត្ថកិច្ចលោកមិនបានចូលរួមក្នុងប្រតិបត្តិការនេះទេ ប៉ុន្ដែលោកគ្រាន់តែទទួលព័ត៌មានតាមប្រព័ន្ធផ្សព្វផ្សាយប៉ុណ្ណោះ៕