សៀមរាបៈ អាជ្ញាធរស្រុកបន្ទាយស្រីបានចាប់ផ្តើមប្រមូលផលស្រូវពី «ស្រែសង្គម» ក្នុងជុំទី ១ ក្រោយពីដាំដុះអស់រយៈពេលជិត ៤ ខែកន្លងមក លើផ្ទៃដី ៤០ ហិកតា ដើម្បីយកទៅចែកជូនពលរដ្ឋក្រីក្រជិត ២ ០០០ គ្រួសារដែលរងផលប៉ះពាល់ពីវិបត្ដិជំងឺកូវីដ១៩។
លោក ឃឹម ហ្វីណង់ អភិបាលស្រុកបន្ទាយស្រីប្រាប់ភ្នំពេញ-ប៉ុស្ដិ៍កាលពីម្សិលមិញថា ទិន្នផលស្រូវពីស្រែសង្គមលើផ្ទៃដី ៤០ ហិកតាដែលអាជ្ញាធរប្រវាស់ពីពលរដ្ឋយកមកដាំដុះប្រភេទពូជស្រូវស្រាលនេះនឹងផ្ដល់ទិន្នផលប្រមាណ ១០០ តោន ព្រោះតាមមន្ត្រីជំនាញបច្ចេកទេសបញ្ជាក់ថា ក្នុង ១ ហិកតាអាចប្រមូលផលស្រូវបានចាប់ពី ៣ តោន ទៅ ៣,៥ តោន។
លោកថ្លែងថា៖ «ស្រែសង្គមនេះធ្វើឡើងក្នុងគោលដៅជួយដល់សង្គមតាមរយៈការប្រវាស់ដីស្រែជាមួយប្រជាពលរដ្ឋដែលជាម្ចាស់ដីស្រែដើម្បីយកដីស្រែនោះមកធ្វើស្រែក្នុងគោលដៅផលិតអង្ករចែកជូនពលរដ្ឋដែលរងផលប៉ះពាល់ពីវិបត្ដិកូវីដ១៩ ក្រោមក្របខ័ណ្ឌ ក្រ ១ ក្រ ២»។
លោកអភិបាលស្រុកឱ្យដឹងថា ការប្រវាស់ដីស្រែនេះ រដ្ឋបាលស្រុកនឹងផ្ដល់ផលស្រូវជូនពលរដ្ឋជាម្ចាស់ដីស្រែតាមផលស្រូវដូចដែលពួកគាត់ធ្លាប់បានធ្វើកាលពីឆ្នាំកន្លងមក។ ចំណែកផលស្រូវដែលនៅសល់ទើបរដ្ឋបាលស្រុកយកទៅចែកជូនប្រជាពលរដ្ឋក្រីក្រ។ ការដាំដុះស្រូវនេះទទួលបានការជួយឧបត្ថម្ភទាំងស្រុងពីសប្បុរសជននានា។
លោកថ្លែងថា៖ «ពូជស្រូវយើងទទួលបានពីមន្ទីរកសិកម្ម រុក្ខាប្រមាញ់ និងនេសាទខេត្ដ ហើយជីសម្រាប់ដាំដុះទទួលបានពីសប្បុរសជន។ ចំណែកកម្លាំងពលកម្ម យើងមានអ្នកស្ម័គ្រចិត្ដជួយហើយឥឡូវ ស្រូវទុំម៉ាស៊ីនច្រូតកាត់ស្រូវក៏សប្បុរសជនឱ្យយើងខ្ចីយកមកច្រូតដែរ»។
លោកឱ្យដឹងថា តាមរយៈទិន្នផលស្រូវល្អបែបនេះ បានផ្តល់ក្តីសង្ឃឹមសាជាថ្មីដល់ក្រុមការងារគម្រោង «ស្រែសង្គម» ក្រោយពីខិតខំប្រឹងប្រែងអស់រយៈកាលជិត ៤ ខែកន្លងមក។ លោកបន្ថែមថា ដោយទទួលបានជំនួយរបស់សប្បុរសជន រដ្ឋបាលស្រុកនឹងបន្តធ្វើស្រែសង្គមនេះនៅជុំទី ២ ម្ដងទៀត ក្រោយច្រូតកាត់រួចរាល់។
លោកបញ្ជាក់ថា៖ «ក្រុមការងារនឹងរៀបចំប្រមូលផលស្រូវលើផ្ទៃដីស្រែ ៤០ ហិកតានេះជាដំណាក់កាលៗ ព្រោះហេតុតែការចាប់ផ្តើមដាំដុះដំបូងមិនបានស្របពេលវេលាគ្នា។ ប៉ុន្ដែការប្រមូលផលស្រូវនេះនឹងបញ្ចប់ទាំងស្រុងយ៉ាងយូរត្រឹម ២ សប្តាហ៍ទៀតប៉ុណ្ណោះរួចទើបយើងយកស្រូវទៅកិនជាអង្ករចែកជូនប្រជាពលរដ្ឋ»។
លោក ឡឹក វន់ មេភូមិព្រះដាក់ថ្លែងថា ពលរដ្ឋបានស្ម័គ្រចិត្ដប្រវាស់ដីស្រែរបស់ពួកគាត់ផ្នែកខ្លះមកឱ្យអាជ្ញាធរដើម្បីធ្វើស្រែសង្គមនេះ។ លោកបន្តថា៖ «កាលពីមុននៅក្នុងភូមិ ឃុំយើងមិនដែលមានការដាំដុះស្រូវបែបសហគមន៍ដើម្បីទុកជួយដល់ពលរដ្ឋក្រីក្របែបនេះទេ។ ពលរដ្ឋ ពួកគាត់សប្បាយចិត្ដក្នុងការចូលរួមប្រវាស់ដីស្រែពួកគាត់ជាមួយលោកអភិបាលស្រុក។ ពួកគាត់ប្រវាស់ដីស្រែរបស់គាត់ខ្លះ និងទុកខ្លះដើម្បីធ្វើស្រែដោយខ្លួនឯង»។
លោក សួស ណារិន មន្ដ្រីអង្កេតនៃសមាគមការពារសិទ្ធិមនុស្ស អាដហុក ប្រចាំខេត្ដសៀមរាបបានសាទរ ចំពោះសកម្មភាពរបស់អភិបាលស្រុកបន្ទាយស្រីបែបនេះ។ លោកថា សកម្មភាពនេះនឹងអាចចូលរួមកាត់បន្ថយភាពក្រីក្រនៅក្នុងសហគមន៍ ជាពិសេសនៅក្នុងពេលកើតមានវិបត្ដិជំងឺកូវីដ ១៩ នេះ។
លោកបានថ្លែងថា៖ «កន្លងមក បណ្ដាស្រុកផ្សេងៗនៅក្នុងខេត្ដសៀមរាប មិនដែលមានសកម្មភាពបែបនេះទេ។ បើគ្រប់ស្រុកទាំង ១១ និងក្រុង ១ ក្នុងខេត្ដសៀមរាបបានធ្វើដូចស្រុកបន្ទាយស្រី គឺវាអាចកាត់បន្ថយភាពក្រីក្រ ហើយធ្វើឱ្យប្រជាពលរដ្ឋមានជំនឿលើអាជ្ញាធរ»៕