.jpg)
ស្ត្រីអ្នកលក់ក្រឡានតាមផ្លូវជាតិលេខ ៦ នៅខេត្តសៀមរាបកាលពីឆ្នាំ ២០១៧ ។ ហេង ជីវ័ន
សៀមរាបៈ អាជ្ញាធរស្រុកសូទ្រនិគមព្រមានពលរដ្ឋដែលលក់ក្រឡានតាមបណ្តោយផ្លូវជាតិលេខ ៦ នឹងបញ្ឈប់លែងឱ្យប្រកបរបរលក់ដូរបន្តទៀត ចំពោះអាជីវករណាដែលមិនចូលរួមថែរក្សាអនាម័យបរិស្ថានឱ្យបានល្អ។
លោក ម៉ក់ ប្រុស អភិបាលស្រុកសូទ្រនិគមបានប្រាប់ភ្នំពេញប៉ុស្តិ៍កាលពីថ្ងៃទី ១៤ កុម្ភៈ ថាអាជ្ញាធរស្រុកបានយកចិត្តទុកដាក់ក្នុងការធ្វើយ៉ាងណាសម្រួលឱ្យប្រជាពលរដ្ឋអាចធ្វើការលក់ដូរបានស្រួល និងណែនាំពួកគេឱ្យមានអនាម័យល្អធ្វើក្រឡានឱ្យមានគុណភាពមានរសជាតិ ព្រមទាំងធ្វើតូបយ៉ាងណាឱ្យមានភាពទាក់ទាញដល់ភ្ញៀវទេសចរ។ ប៉ុន្តែសម្រាប់អ្នកដែលមិនអនុវត្តឱ្យបានត្រឹមត្រូវក្នុងការថែរក្សាអនាម័យបរិស្ថាននឹងត្រូវបញ្ឈប់លែងឱ្យលក់ដូរតទៅទៀតដើម្បីកុំឱ្យប៉ះពាល់ដល់បរិយាកាសនៃការលក់ដូររបស់អ្នកផ្សេងទៀត។
លោកអភិបាលស្រុកបញ្ជាក់ថា៖ «ខ្ញុំបញ្ឈប់មែន! បញ្ឈប់រឿងអី ប្រសិនបើអត់ថែរក្សាបរិស្ថានទេ ហើយស្បោងសំរាម ឬក៏នៅជុំវិញហ្នឹងសុទ្ធតែព្រៃ អាហ្នឹងខ្ញុំអត់ឱ្យលក់ទេ»។
បើតាមលោកអភិបាលស្រុកសូទ្រនិគមចំពោះការលក់ដូរនៅទីនោះ អាជ្ញាធរកំណត់ឱ្យមានការលក់ដូរត្រឹមត្រូវមានរបៀបរៀបរយ ហើយងាយស្រួលសម្រាប់ការឈប់ចតរបស់យានជំនិះផ្សេងៗដែលឈប់ទិញក្រឡាន។
លោកបន្តថា៖ «ខ្ញុំកំណត់ឱ្យគាត់ថាបាន ៤ ម៉ែត្រយ៉ាងតិចពីចិញ្ចើមផ្លូវ ព្រោះដើម្បីឱ្យឡានម៉ូតូឈប់កុំឱ្យមានគ្រោះថ្នាក់ផ្សេងៗកើតឡើង»។
លោក សយ សីហា មេឃុំត្រពាំងធំបានថ្លែងថា ដើមឡើយអ្នកលក់ក្រឡានគឺជាមុខរបររបស់អ្នកនៅភូមិខ្ចាស់ ឃុំខ្ចាស់ ស្រុកសូទ្រនិគម។ ក្រោយមកការលក់ដូរក៏មានជាបន្តបន្ទាប់គ្នាតាមផ្លូវ ក៏រាលដាលមកដល់ទឹកដីឃុំត្រពាំងធំ ស្រុកប្រាសាទបាគង។ ហេតុនេះទើបអាជ្ញាធរឃុំត្រពាំងធំ និងស្រុកប្រាសាទបាគងរៀបចំធ្វើយ៉ាងណាឱ្យប្រជាពលរដ្ឋទៅធ្វើការលក់ដូរឱ្យចំទីតាំងរបស់ខ្លួនវិញ។
«ប្រជាពលរដ្ឋគាត់លក់មកដល់ខាងយើងអ៊ីចឹងទៅ វាធ្វើឱ្យសណ្តាប់ធ្នាប់នៅក្នុងមូលដ្ឋានរបស់ខ្ញុំហ្នឹង វាមានបញ្ហាដូចជាគ្រោះថ្នាក់ចរាចរណ៍អ៊ីចឹងទៅ។ សិស្សធ្វើដំណើរចុះឡើងៗ ហើយការឈប់ឡានទិញក្រឡានអីហ្នឹងនៅលើដងផ្លូវ អ៊ីចឹងទៅវាមានគ្រោះថ្នាក់ជាច្រើនលើកច្រើនសា អ៊ីចឹងខ្ញុំក៏សម្រេចឱ្យដកទៅទឹកដី គាត់វិញ»។ នេះជាការបញ្ជាក់របស់មេឃុំ។
បើតាមលោក សយ សីហា ការដែលឱ្យប្រជាពលរដ្ឋលើកត្រឡប់ទៅលក់នៅទឹកដីឃុំ ស្រុកដើមរបស់ខ្លួនវិញ គឺដោយសារ ទី១ ដើម្បីរក្សាសញ្ញាផលិតផលភូមិ ១ ផលិតផល ១ និងមួយទៀត គឺដើម្បីសុវត្ថិភាពទាំងអស់គ្នា។ ព្រោះអាជ្ញាធរឃុំត្រពាំងធំមិនទាន់បានរៀបចំរបៀបរៀបរយឱ្យពលរដ្ឋធ្វើការលក់ដូរនោះទេ។
កញ្ញា គីម សំណាង អ្នកលក់ក្រឡានតាមបណ្តោយផ្លូវជាតិលេខ ៦ ក្នុងស្រុកសូទ្រនិគម ខេត្តសៀមរាបបានឱ្យដឹងថា អាជ្ញាធរបានចុះធ្វើការណែនាំឱ្យប្រជាពលរដ្ឋជាអ្នកលក់ក្រឡានតាមផ្លូវនោះទាំងអស់គ្នាត្រូវរក្សាអនាម័យ សម្អាតបរិស្ថានឱ្យបានស្អាតព្រមទាំងរៀបចំតុបតែងតូបរបស់ខ្លួនធ្វើយ៉ាងណាឱ្យមានភាពទាក់ទាញដល់ភ្ញៀវទេសចរ។ បើមិនដូច្នោះទេអាជ្ញាធរនឹងមិនអនុញ្ញាតឱ្យលក់ដូរទៀតឡើយ។
កញ្ញាសំណាងនិយាយថា៖ «គេឱ្យយើងលក់ហើយប្រមូលសំរាមដុតឱ្យស្អាត អត់ឱ្យពង្រាយសំរាមរញ៉េរញ៉ៃ ហើយឱ្យយើងថយឱ្យឆ្ងាយពីថ្នល់ ៤ ម៉ែត្រ ហើយទិញរោងដែកដាក់ថែមទៀតដើម្បីឱ្យមើលទៅមានរបៀបរៀបរយ។ ចំណែកឆត្រ គេលែងឱ្យដាក់ជាប់ផ្លូវទៀតហើយ បើដាក់អាចដាក់បានពីចំហៀងរោង ឬក្រោយរោង»៕
វីដេអូ៖
