ព្រះសីហនុ/កោះកុងៈ អាជ្ញាធរស្រុកស្ទឹងហាវបានកាយអាចម៍ដីដែលត្រូវបានគេចាក់លុបចូលទៅក្នុងសមុទ្រកាលពីដើមខែមីនានោះ ចេញវិញអស់ហើយ ខណៈនៅឯខេត្តកោះកុងអាជ្ញាធរបានទុកពេល ១ សប្ដាហ៍ទៀត ដល់អ្នកស្រី លាង ហ៊ីម ដែលចេញមុខទទួលខុសត្រូវក្នុងការកាយអាចម៍ដីដែលបានចាក់លុបព្រៃកោងកាងក្នុងតំបន់ដែនជម្រកសត្វព្រៃពាមក្រសោបនោះវិញ។
លោក ឆាយ សុគន្ធដា អភិបាលស្រុកស្ទឹងហាវបានប្រាប់ ភ្នំពេញ ប៉ុស្តិ៍ថា នៅពេលនេះ អាចម៍ដី ដែលជនអនាមឹកបានលួចចាក់លុបចូលទៅក្នុងសមុទ្រក្នុងទំហំ ៦០ គុណ ៤០ ម៉ែត្រ នៅចំណុចមុខក្រុមហ៊ុនកម្ពុជាតេលា (TELA) ស្ថិតនៅភូមិ ៤ ឃុំអូរត្រេះ កាលពីដើមខែមីនាកន្លងទៅត្រូវបានរដ្ឋបាលស្រុកស្ទឹងហាវកាយចេញវិញអស់ហើយ។
លោកថ្លែងថា៖ «មកទល់ពេលនេះ យើងនៅមិនទាន់ស្គាល់អត្តសញ្ញាណជនប្រព្រឹត្តបទល្មើសនៅឡើយទេ។ ករណីនេះ ជនប្រព្រឹត្តមិនមែនជាពលរដ្ឋឬអ្នកជំនួញនៅក្នុងមូលដ្ឋានស្រុកស្ទឹងហាវយើងទេ»។
បើតាមលោក សុគន្ធ ដា នៅពេលនេះរដ្ឋបាលស្រុកស្ទឹងហាវកំពុងបន្តស្រាវជ្រាវរកអត្តសញ្ញាណជនប្រព្រឹត្តបទល្មើសចាក់ដីលុបឆ្នេរសមុទ្រនេះ ដើម្បីចងក្រងសំណុំឯកសារ បញ្ជូនទៅរដ្ឋបាលខេត្តព្រះសីហនុ និង គណៈកម្មាធិការការពារតំបន់ឆ្នេរចាត់វិធានការតាមនីតិវិធីច្បាប់។
សកម្មជនបរិស្ថានលោក សាន់ ម៉ាឡា បានជំរុញឱ្យអាជ្ញាធរស្វែងរកឲ្យឃើញនូវក្រុមជនប្រព្រឹត្តបទល្មើសចាក់ដីលុបចូលឆ្នេរនៅចំណុចទីតាំងខាងលើ ដើម្បីចាត់វិធានការទៅតាមនីតិវិធីច្បាប់។
លោកថា៖ «ប្រសិនបើអាជ្ញាធរមានសុឆន្ទៈពិតប្រាកដនោះករណីនេះជនប្រព្រឹត្តបទល្មើស គេចមិនរួចពីសំណាញ់ច្បាប់ឡើយ ព្រោះអាចម៍ដីដែលពួកគេបានចាក់លុបនៅក្នុងតំបន់នោះ មិនមែន ១០ ទៅ ២០ ឡាននោះទេ គឺរាប់រយឡានឡើងទៅ ដូច្នេះមិនអាចបិទបាំងភ្នែកត្រចៀកអ្នកភូមិ ឬអាជ្ញាធរមូលដ្ឋាននោះទេ»។
ប៉ុន្តែលោក សុគន្ធដា បានថ្លែងថា កន្លងមករដ្ឋបាលស្រុកស្ទឹងហាវធ្លាប់បានចុះស្រាវជ្រាវដល់ទីតាំងនោះចំនួន ២ ដង តែមិនឃើញវត្តមានក្រុមអ្នកលួចចាក់ដីនៅលើទីតាំងនោះ ហើយសមត្ថកិច្ចក៏ធ្លាប់បានសាកសួរក្រុមអ្នកម៉ៅការសាងសង់ផ្លូវនៅក្បែរតំបន់នោះផងដែរ តែគ្មានអ្នកណាម្នាក់ដឹងឡើយ។ បើតាមការសន្និដ្ឋានរបស់សមត្ថកិច្ច ពួកអ្នកលួចចាក់ដីនៅក្នុងតំបន់នោះ ទំនងជាធ្វើសកម្មភាពពេលយប់។
ដោយឡែកការចាក់ដីលុបចូលចំណីព្រែក និងគ្របលើព្រៃកោងកាងក្នុងតំបន់ដែនជម្រកសត្វព្រៃពាមក្រសោមក្នុងខេត្តកោះកុងវិញ មានស្ត្រីជាពាណិជ្ជករម្នាក់បានចេញមុខទទួលខុសត្រូវ និងកំពុងអនុវត្តតាមកិច្ចព្រមព្រៀងជាមួយរដ្ឋបាលខេត្តកោះកុងក្នុងការកាយអាចម៍ដីឲ្យអស់ចេញពីតំបន់នោះ ព្រមទាំងដាំកូនកោងកាងឡើងវិញផងដែរ។ ប៉ុន្តែមកទល់ពេលនេះ ដំណើរការកាយអាចម៍ដីចេញវិញនោះ នៅមិនទាន់អស់នៅឡើយទេ។
លោក សុខ សុទ្ធី អភិបាលរង ខេត្តកោះកុងប្រាប់ ភ្នំពេញ ប៉ុស្តិ៍ថា យោងតាមកិច្ចព្រមព្រៀង អ្នកស្រី លាង ហ៊ីម ដែលបានទទួលស្គាល់ថាបានចាក់ដីលយចូលដីចំណីព្រែក និងគ្របលើព្រៃកោងកាងក្នុងតំបន់ដែនជម្រកសត្វព្រៃពាមក្រសោបក្នុងទំហំជាង ៣ ៣០០ ម៉ែត្រការ៉េនោះគឺត្រូវកាយអាចម៍ដីចេញពីតំបន់នោះឱ្យអស់ក្នុងរយៈពេល ១ សប្ដាហ៍ ប៉ុន្តែនៅពេលនេះ ក្រុមការងាររបស់គាត់នៅមិនទាន់កាយអស់នោះទេ។
លោក សុទ្ធី ថ្លែងថា៖ «ជាការពិតក្រុមគណៈកម្មការចម្រុះនៃរដ្ឋបាលខេត្តកោះកុងរបស់យើងបានពិនិត្យឃើញថា គាត់ពិតជាបានអនុវត្តយ៉ាងសកម្មនៅក្នុងការកាយអាចម៍ដីចេញពីតំបន់នោះវិញ ប៉ុន្តែដោយសារគាត់មានគ្រឿងចក្រកាយដីតែ ១ គ្រឿង ដូច្នេះគាត់មិនអាចធ្វើបានសម្រេចតាមកិច្ចព្រមព្រៀងនោះទេ។ យើងបានទុករយៈពេល ១ សប្ដាហ៍បន្ថែមទៀត ដើម្បីឲ្យគាត់កាយដីឲ្យអស់ដើម្បីរៀបចំដាំកោងកាងឡើងវិញ»។
អ្នកស្រី លាង ហ៊ីម មិនអាចទាក់ទងសុំការពន្យល់បានទេ។ ប៉ុន្តែតាមរយៈលោកស្រី គឹម សុភេម មេឃុំគគីរនៃស្រុកមណ្ឌលសីមាថ្លែងថា ក្រៅពីការងារជីកកាយអាចម៍ដីចេញវិញនោះក្រុមការងាររបស់អ្នកស្រី ហ៊ីម បានចុះដើររកប្រមូលទិញកូនដើមកោងកាងពីប្រជាសហគមន៍ក្នុងតំបន់នោះផងដែរ ប៉ុន្តែអ្នកភូមិមិនបានបណ្ដុះវាទុកនោះទេ។
«កូនដើមកោងកាងភាគច្រើនគេបណ្ដុះវានៅខែកក្កដា ឬ សីហា ព្រោះដល់ខែនោះទើបមានផ្លែវាទុំជ្រុះអាចរើសមកបណ្ដុះបាន»៕