.jpg)
ទូកដឹកជញ្ជូនភ្ញៀវទេសចរ និងនេសាទទាំងអស់នៅខេត្តព្រះសីហនុត្រូវបានហាមឃាត់មិនឲ្យចេញធ្វើអាជីវកម្មឡើយកាលពីម្សិលមិញ។ រូប ប៉ូលិស
ព្រះសីហនុៈ ទូកនេសាទ និងទូកទេសចរណ៍តូចៗនៅខេត្តព្រះសីហនុ ត្រូវបានអាជ្ញាធរហាមឃាត់មិនឲ្យចាកចេញពីផែ ខណៈអាកាសធាតុនៅតែបន្តអួអាប់ និងមានខ្យល់កន្ត្រាក់បក់បោកខ្លាំងលើផ្ទៃសមុទ្រ។ នេះបើតាមលោក ជួន ណារិន្ទ ស្នងការនគរបាលខេត្តព្រះសីហនុកាលពីម្សិលមិញ។
លោកស្នងការបានប្រាប់ភ្នំពេញប៉ុស្តិ៍ថា បម្រាមនេះត្រូវបានធ្វើឡើងតាំងពីព្រឹកថ្ងៃអាទិត្យ ក្រោយពីទូកនេសាទ ១ គ្រឿងដែលចតនៅមាត់កំពង់ទូករបស់លោក អៀ សុងឃៀង មេភូមិសុខសាន្តក្នុងសង្កាត់-ក្រុងកោះរ៉ុងត្រូវបានខ្យល់កន្ត្រាក់បោកពន្លិច។
លោក ណារិន្ទ បានថ្លែងថា៖ «កាលពីថ្ងៃអាទិត្យ យើងបានហាមឃាត់ទូកគ្រប់ផែនាវាដឹកទំនិញ ដឹកជញ្ជូនភ្ញៀវទេសចរ និងផែនេសាទទាំងអស់មិនឲ្យចេញធ្វើអាជីវកម្មទេ ព្រោះនៅលើផ្ទៃសមុទ្រមានភ្លៀងខ្យល់បក់បោកខ្លាំង ហើយរលកសមុទ្រមានកម្ពស់រហូតដល់ ១,៥០ ម៉ែត្រដែលអាចបង្កគ្រោះថ្នាក់ជាយថាហេតុដល់ពួកគេ។ ប៉ុន្តែនៅព្រឹកថ្ងៃចន្ទ [ម្សិលមិញ] លំហសមុទ្រនៅខេត្តព្រះសីហនុបានស្ងប់ខ្យល់បន្តិចដែលអាចឲ្យទូកទេសចរណ៍ និងទូកដឹកទំនិញធំៗចេញធ្វើអាជីវកម្មបាន»។
លោកបានបន្តថា ពេលនេះនគរបាលជើងទឹកកំពុងបន្តពិនិត្យជាប្រចាំអំពីស្ថានភាពអាកាសធាតុក្នុងលំហសមុទ្រ និងត្រៀមកម្លាំងជួយអន្តរាគមន៍ពេលណាមាននាវាជួបឧបទ្ទវហេតុ។
ជុំវិញករណីនេះអ្នកស្រី វ៉ាន់ អេង អាយុ ២០ ឆ្នាំជាប្រជានេសាទក្នុងតំបន់កោះខ្យងនៃស្រុកព្រៃនប់បានប្រាប់ភ្នំពេញប៉ុស្តិ៍ថា ដោយសារអាកាសធាតុមានភ្លៀងខ្យល់បក់បោកខ្លាំងពេក ធ្វើគ្រួសារអ្នកស្រី និងអ្នកភូមិផ្សេងទៀតមិនហ៊ានចេញទូកទៅនេសាទទេ ដែលគិតត្រឹមថ្ងៃចន្ទម្សិលមិញមានរយៈពេល ២ ថ្ងៃមកហើយ។
ទិដ្ឋភាពអាកាសធាតុមិនល្អនៅចំណតទូកនៃសមុទ្រខេត្តព្រះសីហនុ។ រូបថត ប៉ូលិស
អ្នកស្រីបានថ្លែងថា៖ «ជាទូទៅនៅពេលមានអាកាសធាតុអាប់អួបែបនេះពួកយើងមិនចេញទូកនេសាទនោះទេ។ ពេលខ្លះអាកាសធាតុបែបនេះ បានអូសបន្លាយរហូតដល់ ១ សប្ដាហ៍ឯណោះ»។
ចំណែកលោក ម៉ម រី អ្នកប្រកបរបររត់ទូកទេសចរណ៍ខ្នាតតូចនៅភូមិកោះតូច សង្កាត់កោះរ៉ុងសន្លឹម ក្រុងកោះរ៉ុង បានប្រាប់ភ្នំពេញប៉ុស្តិ៍ថា អាកាសធាតុអាប់អួច្រើនកើតឡើងនៅពេលព្រឹក និងពេលល្ងាច។
លោកបានបន្តថា នៅចន្លោះម៉ោង ១១ ព្រឹករហូតដល់ម៉ោង ២ រសៀល អាកាសធាតុតែងតែស្រឡះហើយស្ងប់ខ្យល់ដែលអាចឲ្យគាត់ឆ្មក់ដឹកអ្នកដំណើរទៅលេងតាមកោះបាន ១ ជើងសម្រាប់ដោះស្រាយជីវភាពប្រចាំថ្ងៃ។
លោក រី បានបញ្ជាក់ថា៖ «វាជារឿងប្រសើរខ្លាំងណាស់ដែលបច្ចុប្បន្ននេះសមត្ថកិច្ចបានជូនដំណឹងយើងរៀងរាល់ ១ ម៉ោងម្ដងអំពីបញ្ហាប្រែប្រួលអាកាសធាតុដែលអាចឲ្យយើងបានដឹងជាមុនអំពីហេតុការណ៍ដែលនឹងកើតមាននៅលើផ្ទៃសមុទ្រ»។
លោក រី បានបន្ថែមថា៖ «យើងត្រូវគោរពតាមការណែនាំរបស់អាជ្ញាធរ ដើម្បីចៀសវាងគ្រោះថ្នាក់កើតឡើងជាយថាហេតុ»។
កាលពីម្សិលមិញក្រសួងធនធានទឹក និងឧតុនិយម បានអំពាវនាវជាថ្មីម្ដងទៀតដល់ប្រជានេសាទ និងអ្នកធ្វើដំណើរកម្សាន្តតាមកោះនានាក្នុងតំបន់មាត់សមុទ្រឲ្យបង្កើនការប្រុងប្រយ័ត្នខ្ពស់ចំពោះបញ្ហាអាកាសធាតុដែលបង្កឡើងដោយឥទ្ធិពលនៃប្រពន្ធសម្ពាធទាប និងខ្យល់មូសុងនិរតី។
លោក ចាន់ យុត្ថា អ្នកនាំពាក្យក្រសួងធនធានទឹកបានប្រាប់ភ្នំពេញប៉ុស្តិ៍ថា ប្រព័ន្ធសម្ពាធទាបដែលអូសកាត់លើតំបន់ផ្ទៃរងទឹកភ្លៀងនៃអាងទន្លេមេគង្គកំពុងបន្តដំណើរដោយរំកិលឆ្ពោះទៅភាគខាងជើងប្រទេសកម្ពុជាដែលក្នុងស្ថានភាពបែបនេះនឹងធ្វើឲ្យមានភ្លៀងធ្លាក់រាយប៉ាយលើផ្ទៃប្រទេសក្នុងកម្រិតពីមធ្យមទៅច្រើន ពិសេសខេត្តនៅតំបន់ភាគខាងត្បូង ភាគពាយព្យ និងបណ្ដាខេត្តក្នុងតំបន់ឆ្នេរសមុទ្រកម្ពុជា។
លោក យុត្ថា បានបញ្ជាក់ថា៖ «យោងតាមការព្យាករអាកាសធាតុ ភ្លៀងនឹងបន្តធ្លាក់យ៉ាងជោកជាំនៅទូទាំងប្រទេសចាប់ពីថ្ងៃ [ចន្ទ] នេះរហូតដល់ថ្ងៃចន្ទសប្ដាហ៍ក្រោយ»។
ជាមួយគ្នានេះលោកបានអំពាវនាវដល់ប្រជាពលរដ្ឋឲ្យបង្កើនការប្រុងប្រយ័ត្នចំពោះបាតុភូតខ្យល់កន្ត្រាក់ និងផ្គររន្ទះផងដែរ ដោយលោកនិយាយថា បាតុភូតទាំងនេះកើតមាននៅពេលមេឃរកកល់ភ្លៀង និងក្នុងអំឡុងពេលមេឃកំពុងធ្លាក់ភ្លៀងខ្លាំង ពិសេសក្នុងតំបន់មាត់សមុទ្រ។ ចំណែករលកសមុទ្រអាចនឹងមានកម្ពស់ចាប់ពី ១,៥០ ម៉ែត្រទៅ ២ ម៉ែត្រ៕
