កណ្តាល: ប្រធានគណបក្សយុវជនកម្ពុជាដែលជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់ដែលទើបបង្កើតថ្មីលោក ពេជ្រ ស្រស់ បានអះអាងកាលពីម្សិលមិញថា អាជ្ញាធរខេត្តកណ្តាលបានរារាំងរូបលោកមិនឱ្យចុះពិនិត្យ និងសិក្សាពីបញ្ហាជម្លោះដីធ្លីដ៏រ៉ាំរ៉ៃរបស់ពលរដ្ឋ ២៩២ គ្រួសារនៅឃុំកណ្ដោក ស្រុកកណ្តាលស្ទឹង និងក្រុងតាខ្មៅដោយអាជ្ញាធរសុំលិខិតបេសកកម្ម។
លោក ពេជ្រ ស្រស់ បញ្ជាក់ថាដើម្បីតបតាមការអញ្ជើញរបស់ពលរដ្ឋ ២៩២ គ្រួសារ រស់នៅឃុំកណ្ដោក និងឃុំជើងកើប ស្នើសុំឲ្យលោកជួយអន្តរាគមន៍បញ្ហាទំនាស់ដីធ្លីជាមួយក្រុមហ៊ុន និងអ្នកមានអំណាច ប៉ុន្ដែត្រូវបានអាជ្ញាធរខេត្ត មិនអនុញ្ញាតឲ្យលោកចុះទៅជួប និងសិក្សាអំពីផលប៉ះពាល់ដល់ពលរដ្ឋទាំងនោះទេ។
លោកអះអាងថា ក្នុងនាមលោកជាសមាជិកឧត្តមក្រុមប្រឹក្សាពិគ្រោះ និងផ្តល់យោបល់គឺលោកមានសិទ្ធិចុះសិក្សាបញ្ហារបស់ជាតិ និងប្រជាពលរដ្ឋដោយមិនចាំបាច់មានលិខិតបេសកកម្មក្នុងករណីបន្ទាន់នោះទេ «ឯកឧត្តម ម៉ៅ ភិរុណ អភិបាលខេត្តបាននិយាយថាមិនទទួលខុសត្រូវទេបើសិនជាខ្ញុំមានបញ្ហាអ្វីមួយក្នុងដែនដីរបស់គាត់ ព្រោះខ្ញុំមិនមានលិខិតបេសកកម្មចុះតាមមូលដ្ឋាន»។
លោក អៀង យ៉ាន តំណាងប្រជាពលរដ្ឋដែលមានទំនាស់ដីធ្លីជាមួយក្រុមហ៊ុន ហេង អភិវឌ្ឍន៍បានសរសេរលិខិតកាលពីថ្ងៃទី ២០ កញ្ញា ២០១៨ ដោយបង្ហាញថា៖ «ស្នើសុំឯកឧត្តម ពេជ្រ ស្រស់ សមាជិកឧត្តមក្រុមប្រឹក្សាពិគ្រោះ និងផ្តល់យោបល់មកពិនិត្យ សិក្សា ស្រាវជ្រាវរឿងទំនាស់ដីធ្លីចំនួន ៤៥០ ហិកតា ជាមួយក្រុមហ៊ុនរបស់លោកស្រី សៀង ចាន់ហេង ដែលមានឈ្មោះថា ហេង អភិវឌ្ឍន៍ អស់រយៈពេលជាង ១០ ឆ្នាំមកហើយ»។
លោក ម៉ៅ ភិរុណ អភិបាលខេត្តកណ្ដាលថ្លែងថាលោកមិនបានហាមឃាត់នោះទេ ប៉ុន្ដែលោក ពេជ្រ ស្រស់ មិនគោរពតាមបែបបទរដ្ឋបាលដោយគ្មានលិខិតបេសកកម្មត្រឹមត្រូវ។
លោកបញ្ជាក់ថា៖ «ឯកឧត្តម ពេជ្រ ស្រស់ បានទូរស័ព្ទមកខ្ញុំ ថាគាត់នឹងចុះទៅជួបពលរដ្ឋមានទំនាស់ដីធ្លីនៅហ្នឹង ហើយខ្ញុំសួរវិញថា តើឯកឧត្តមមកនេះក្នុងនាមជាគណបក្សនយោបាយ ឬក្នុងនាមជាសមាជិកឧត្តមក្រុមប្រឹក្សាពិគ្រោះយោបល់ ហើយមានលិខិតបេសកកម្មអត់? គាត់ថាអត់មានទេ ហើយខ្ញុំថា បើអត់មានលិខិតអ៊ីចឹង ខ្ញុំមិនអាចធ្វើការជាមួយឯកឧត្តមបានទេ ព្រោះខ្ញុំមិនចេះធ្វើការងារជាមួយឯកឧត្តមគ្មានលិខិតស្នាមត្រឹមត្រូវទេ»។
លោក ម៉ៅ ភិរុណ បន្ថែមថាបើលោក ស្រស់ ចុះមកក្នុងនាមជាសមាជិកឧត្តមក្រុមប្រឹក្សាពិគ្រោះយោបល់គឺគួរតែមានលិខិតត្រឹមត្រូវ។ «ក្រុមប្រឹក្សាពិគ្រោះយោបល់គឺគេធ្វើការងារជាក្រុម ហើយគាត់មកធ្វើការម្នាក់ឯង បើធ្វើអ៊ីចឹងគឺក្នុងនាមជាបុគ្គលខ្លួនគាត់ទេ រឿងនេះគឺគាត់ចង់ចំណេញផ្នែកនយោបាយទេ»។
ពាក់ព័ន្ធនឹងរឿងវិវាទដីធ្លីនេះលោកស្រី សៀង ចាន់ហេង ប្រធានក្រុមហ៊ុន ហេងអភិវឌ្ឍន៍បានដាក់លិខិតទៅលោក ជា សុផារ៉ា រដ្ឋមន្ត្រីក្រសួងរៀបចំដែនដីកាលថ្ងៃទី ២៥ ខែមិថុនា ឆ្នាំ ២០១៨ ដោយបានស្នើសុំបើកវេទិកាសាធារណៈមួយដើម្បីដោះស្រាយទំនាស់ដីធ្លីជាមួយពលរដ្ឋ ២៩២ គ្រួសារ ដែលបានប្តឹងចោទប្រកាន់ក្រុមហ៊ុនលោកស្រីរំលោភយកដីពួកគាត់។
លោកស្រីបញ្ជាក់តាមហ្វេសប៊ុកថាការដាក់លិខិតនេះដើម្បីបញ្ចប់ទំនាស់ ហើយប្រសិនបើក្រុមហ៊ុនពិតជាបានរំលោភយកដីប្រជាពលរដ្ឋដូចការលើកឡើងមែន លោកស្រីសុខចិត្តប្រគល់ដីជូនពលរដ្ឋវិញទាំងអស់ ព្រមទាំងហ៊ានទទួលខុសត្រូវចំពោះមុខច្បាប់។ ប៉ុន្តែបើរកឃើញថា វាមិនពិត ហើយជាករណីប្តឹងមួលបង្កាច់ ឬទម្លាក់កំហុសនោះ សូមលោករដ្ឋមន្ត្រីផ្តល់នូវកិត្តិយស សេចក្តីថ្លៃថ្នូរ ចំពោះលោកស្រីវិញ និងសូមឲ្យចាត់វិធានការផ្លូវច្បាប់ចំពោះពលរដ្ឋទាំងនោះ។
ក្រុមពលរដ្ឋអះអាងថាដីរបស់ពួកគេដែលមានជម្លោះនោះស្ថិតនៅភូមិព្រែកហូរ សង្កាត់ព្រែកហូរ ក្រុងតាខ្មៅ ភូមិអំពៅព្រៃ ភូមិឆ្មាពួន ឃុំជើងកើប និងភូមិទួលតាម៉ក់ ឃុំកណ្ដោក។ ពួកគេអះអាងទៀតថា ពួកគេបានអាស្រ័យផលលើដីនោះតាំងពីឆ្នាំ ១៩៨៧ មកហើយនៅឆ្នាំ ២០០៤ ស្រាប់តែក្រុមហ៊ុនហេងអភិវឌ្ឍន៍មកប្ដឹងពួកគាត់ថា បានកាន់កាប់ដីរបស់ក្រុមហ៊ុនដោយខុសច្បាប់។
ទោះបីជាយ៉ាងណាករណីទំនាស់ដីធ្លីដ៏រ៉ាំរ៉ៃនេះធ្លាប់ឆ្លងកាត់ការដោះស្រាយជាច្រើនសាមកហើយទាំងនៅតុលាការ និងនៅថ្នាក់ក្រសួងជំនាញ។
ជាក់ស្ដែងតាមសេចក្ដីប្រកាសព័ត៌មានរបស់ក្រសួងរៀបចំដែនដីចុះថ្ងៃទី ២៥ ខែមិថុនា ឆ្នាំ ២០១៨ បង្ហាញថា៖ «ផ្អែកលើដីកាសម្រេចចុះថ្ងៃទី ២២ ខែមេសា ឆ្នាំ ២០០៨ របស់លោក ហួត វុទ្ធី ព្រះរាជអាជ្ញាអមសាលាដំបូងខេត្តកណ្ដាល ក្រសួងរៀបចំដែនដី នគរូបនីយកម្ម និងសំណង់សម្រេចមិនធ្វើការពិនិត្យដោះស្រាយករណីនេះទៀតទេ។ ដូច្នេះតំណាងប្រជាពលរដ្ឋទាំង ២៩២ គ្រួសារជ្រាបជាព័ត៌មាន»៕