ភ្នំពេញៈ អាជ្ញាធរ បានកោះហៅអ្នកទិញរថយន្តបង់រំលស់ពីឃ្លាំង សេង ហួត ជាង ១០០ នាក់ និងម្ចាស់ឃ្លាំងនេះ ឲ្យចូលទៅជួបតទល់មុខគ្នាដើម្បីដោះស្រាយនៅសាលាសង្កាត់ចោមចៅ ២ នៅថ្ងៃពុធនេះ ពាក់ព័ន្ធនឹងអ្វីដែលអ្នកទិញរថយន្តបង់រំលស់ទាំងនោះអះអាងថា ម្ចាស់ឃ្លាំងបានឆបោកប្រាក់ពួកគេ។
ការកោះហៅរបស់អាជ្ញាធរនេះធ្វើឡើងបន្ទាប់ពីអ្នកទិញរថយន្តបង់រំលស់ទាំងនោះ បានប្រមូលផ្តុំគ្នាធ្វើការតវ៉ាតាំងពីចុងខែមីនាមក និងបានតវ៉ាជាថ្មីទៀត កាលពីម្សិលមិញដើម្បីទាមទារឲ្យម្ចាស់ឃ្លាំង លោក សេង សុភ័គ ដោះស្រាយជូនពួកគេឲ្យបានឆាប់រហ័សបន្ទាប់ពីការចរចាជាមួយម្ចាស់ឃ្លាំងកាលពីថ្ងៃចន្ទមិនមានលទ្ធផល។
អ្នកទិញរថយន្តបង់រំលស់ទាំងនេះបានអះអាងថា ពួកគេបានចាញ់បោកម្ចាស់ឃ្លាំង សេង ហួត ខណៈដែលអ្នកខ្លះត្រូវបានដកហូតរថយន្តវិញ អ្នកខ្លះបានបង់ប្រាក់កក់រួចហើយ តែមិនទាន់ទទួលបានរថយន្ត និងអ្នកខ្លះទៀត កំពុងភ័យខ្លាចការ ដកហូតរថយន្ត ដោយក្រុមហ៊ុនបានប្រើហេតុផលផ្សេងៗដូចជាថា ត្រូវយករថយន្តមកជួសជុល ប៉ុន្តែនៅទីបំផុតក្រុមហ៊ុនមិនបានប្រគល់រថយន្តឲ្យវិញឡើយ។
លោក លឿង ស៊ីវម៉េង អ្នកទិញរថយន្តបង់រំលស់ម្នាក់ ក្នុងចំណោមអ្នកតវ៉ាទាំងនោះ បានប្រាប់ភ្នំពេញប៉ុស្តិ៍ពីម្សិលមិញថា ការជួបជាមួយម្ចាស់ឃ្លាំង កាលពីថ្ងៃចន្ទគឺពុំមានលទ្ធផលអ្វីទេ ព្រោះតែភាគីម្ចាស់ឃ្លាំង បានស្នើសុំពន្យារពេល ក្នុងការដោះស្រាយដោយនិយាយថា នឹងដោះស្រាយផ្តល់សំណងតាមការទាមទារ ហើយការដោះស្រាយ នឹងត្រូវធ្វើបន្ទាប់ពីបុណ្យចូលឆ្នាំខ្មែរហើយ។
លោកបានបញ្ជាក់ថា៖ «គាត់ (ម្ចាស់ឃ្លាំង) ថា ដំណោះស្រាយ អ្នកដែលចង់បានឡាន គាត់នឹងប្រគល់ឡានឲ្យវិញ ចំពោះអ្នកដែលចង់បានលុយ គាត់ប្រគល់លុយឲ្យវិញតាមដំណាក់កាល។ តែខ្ញុំមិនអាចរង់ចាំបានទៀតទេ ខ្ញុំចំណាយពេលយូរណាស់ ក្នុងការរង់ចាំ បើសិនរង់ចាំដល់ចូលឆ្នាំខ្មែរទៀត អ៊ីចឹងដំណើរការរកស៊ីរបស់ពួកខ្ញុំ ដែលរកមួយថ្ងៃ បានមួយថ្ងៃ នឹងជួបផលលំបាក ហើយមិនប្រាកដថា គាត់គោរពតាមសន្យានោះទេ ព្រោះកន្លងមក ពន្យារពេល និងគេចវេះរហូត»។
ចំណែកលោក វុធ ឆោវ័ន្ត អាយុ ២៧ ឆ្នាំ រស់នៅខេត្តតាកែវ ដែលចូលរួមតវ៉ាដែរនោះនិយាយថា រហូត មក ដល់ពេលនេះ ពួកលោកបានបំបែកគ្នាជា ២ ក្រុម ដោយ ១ ក្រុម ស្វែងរកកិច្ចអន្តរាគមន៍ពីភាគីពាក់ព័ន្ធ និង ១ ក្រុមទៀតរង់ចាំនៅកន្លែងឃ្លាំងសេង ហួត ដើម្បីទាមទារឲ្យមានការដោះស្រាយឲ្យបានឆាប់។
លោកថា បើមិនមានដំណោះស្រាយទេ លើកនេះ ពួកគេនឹងទៅតវ៉ានៅមុខផ្ទះលោកនាយករដ្ឋមន្ត្រី។
លោកបញ្ជាក់ថា៖ «មិនដឹងថា អាចជឿបានឬអត់ នៅពេលម្ចាស់ឃ្លាំងចេញមុខមកអះអាងផ្តល់សំណងដល់ពួកយើងដែលជាអ្នករត់តាក់ស៊ីបន្ទាប់ពីបាត់ចំណូលដែលបណ្តាលមកពីការតវ៉ាក្នុងអំឡុងពេលរង់ចាំដំណោះស្រាយនេះ។ តែខ្ញុំគិតថា មិនអាចទៅរួចទេ ព្រោះគ្រាន់តែសំណងរបស់ពួកខ្ញុំ មិនទាន់សងផង»។
បើតាមអ្នកទិញរថយន្តបង់រំលស់ទាំងនោះ អ្នកដែលបានចាញ់បោកឃ្លាំង សេង ហួត នេះ គឺកើនជាង ១០០ នាក់ហើយ ដោយបានធ្វើកិច្ចសន្យាជាមួយម្ចាស់ឃ្លាំងនេះ ដើម្បីទិញរថយន្តបង់រំលស់ ដោយក្នុងម្នាក់ៗ ត្រូវបង់ប្រាក់កក់មុន ពី ៣០ ទៅ ៤០ ភាគរយ គឺចន្លោះពី ៣ ពាន់ ទៅ ៨ ពាន់ដុល្លារ ទៅតាមប្រភេទរថយន្តដែលមានតម្លៃពីជាង ១ ម៉ឺន ទៅជិត ២ ម៉ឺនដុល្លារ មានម៉ាកព្រុស ម៉ាកហាយឡែនឌ័រ និងម៉ាកបាឡែនជាដើម ដោយត្រូវបង់ប្រាក់ជារៀងរាល់ខែ ជាថ្នូរនឹងការយកឡានមកប្រើប្រាស់។
លោក សេង សុភ័គ អគ្គនាយកឃ្លាំង សេង ហួត មិនអាចសុំការបំភ្លឺបានទេ កាលពីម្សិលមិញ ដោយលោកពុំលើកទូរស័ព្ទ។ ប៉ុន្តែ លោក ម៉ាន់ សុផល មេធាវីលោក សេង សុភ័គ បានប្រាប់ភ្នំពេញប៉ុស្តិ៍ ពីម្សិលមិញថា លោកកំពុងប្រមូលតួលេខ និងប្រមូលព័ត៌មានឲ្យបានគ្រប់ជ្រុងជ្រោយសិន ដើម្បីពិចារណាដោះស្រាយទៅតាមសំណង ដែលអ្នកទិញរថយន្តទាំងនោះបានទាមទារ។
លោកបញ្ជាក់ថា៖ «ខ្ញុំចង់តែបញ្ឈប់ឲ្យបានឆាប់ៗហ្នឹង ព្រោះជារួមវារញ៉េរញ៉ៃណាស់ ព្រោះមានក្រុមច្រើន ខ្ញុំសុំពេលវេលាប្រមូល និងពិនិត្យឯកសាររួចអស់សិន ហើយយើងនឹងដោះស្រាយភ្លាម ជាពិសេសអ្នកចាំបាច់ »។
ជាងនេះទៅទៀតលោក សុផល ក៏បានអះអាងផងដែរថា ចាប់ពីថ្ងៃនេះទៅ អ្នកដែលកំពុងប្រើប្រាស់រថយន្តដែលត្រូវបានបង់រំលស់សូមកុំឲ្យមានការព្រួយបារម្ភ ពីព្រោះខាងឃ្លាំងសេង ហួត បានចរចាជាមួយភាគីពាក់ព័ន្ធបញ្ឈប់ការដកហូតរថយន្តហើយ រហូតទាល់តែមានដំណោះស្រាយ។
លោក វ៉ា សារ៉ង ចៅសង្កាត់ចោមចៅ ២ ខណ្ឌពោធិ៍សែនជ័យ បានប្រាប់ភ្នំពេញប៉ុស្តិ៍ ពីម្សិលមិញថា អាជ្ញាធរ បានកោះហៅម្ចាស់ឃ្លាំង ព្រមទាំងអ្នកទិញរថយន្តបង់រំលស់ឲ្យចូលខ្លួនទៅជួបគ្នា នៅរសៀលថ្ងៃពុធនេះ នៅសាលាសង្កាត់ ដើម្បីចរចាស្វែងរកដំណោះស្រាយ។ ដូច្នេះ លោកសង្ឃឹមថា អ្នកមានជាប់ពាក់ព័ន្ធទាំងអស់ គួរតែចូលរួមទាំងអស់គ្នា។
បើតាមម្ចាស់ឃ្លាំង សេង ហួត ដែលបានឡាយតាមបណ្តាញសង្គមហ្វេសប៊ុក កាលពីថ្ងៃអាទិត្យ រូបលោក ក៏ជាជនរងគ្រោះដែរ ព្រោះរថយន្តចំនួន ៤៣ គ្រឿង ដែលខ្លួនបានបង់រំលស់ឲ្យពលរដ្ឋ គឺជារថយន្តដែលខ្លួនបានបង់រំលស់បន្តពីសមាគមអភិវឌ្ឍន៍អ្នកបើកបរ ដោយមានបុគ្គលឈ្មោះ ផង់ សុគា ជាប្រធាន។
ប៉ុន្តែ នៅពេលក្រោយមក បុគ្គលរូបនោះក៏ត្រូវបានតុលាការចាប់ឃុំខ្លួនបណ្តោះអាសន្ន ក្នុងពន្ធនាគារ ទាក់ ទងនឹងរឿងបោកលុយពីក្រុមហ៊ុនជប៉ុនប្រមាណ ៣ លានដុល្លារ ហើយរថយន្តទាំងនោះ ក៏ត្រូវបានសមាគមនេះ ប្រកាសដកហូត ដែលធ្វើឲ្យអតិថិជនខ្លួនមានការភ័យព្រួយ។
ប៉ុន្តែបើតាមក្រុមពលរដ្ឋដែលទិញរថយន្តបង់រំលស់ រហូតមកដល់ពេលនេះ គឺមានអ្នកទិញរថយន្តបង់រំលស់លើសពី ១០០ នាក់ឬស្មើ ១០០ រថយន្ត បានទាមទារឲ្យម្ចាស់ឃ្លាំងសេង ហួត ត្រូវដោះស្រាយផ្តល់ប្រាក់សំណង ឬផ្តល់រថយន្តទៅឲ្យពួកគេ៕