ភ្នំពេញៈ សាលារាជធានីភ្នំពេញនឹងអនុញ្ញាតឱ្យជួបជុំគោរពវិញ្ញាណក្ខន្ធនៅទីតាំងរូបសំណាកលោក ជា វិជ្ជា មុខវត្តលង្កាដូចដែលធ្លាប់បានអនុញ្ញាតឱ្យធ្វើពិធីបែបនេះរាល់ឆ្នាំ ប៉ុន្តែមន្ត្រីសាលារាជធានីព្រមានប្រើវិធានការច្បាប់ប្រសិនបើការជួបជុំនោះធ្វើផ្ទុយអំពីអត្ថន័យក្នុងលិខិតជូនដំណឹង។
ក្រុមសហជីព កម្មករ និងសាច់ញាតិគ្រោងជួបជុំគ្នានៅថ្ងៃទី ២២ មករា ខាងមុខនេះដើម្បីធ្វើពិធីគោរពវិញ្ញាណក្ខន្ធលោក ជា វិជ្ជា អតីតប្រធានសហជីពសេរីកម្មករដែលត្រូវឃាតករបាញ់សម្លាប់កាលពី ១៥ ឆ្នាំមុន។ នេះបើតាមលិខិតជូនដំណឹងមួយរបស់សហជីព ដែលបានផ្ញើជូនសាលារាជធានីភ្នំពេញ។
លោក ម៉េត មាសភក្ដី មន្ត្រីនាំពាក្យសាលារាជធានីភ្នំពេញប្រាប់កាសែតភ្នំពេញប៉ុស្ដិ៍ម្សិលមិញថា ក្រុមការងាររបស់លោកបានទទួលលិខិតជូនដំណឹងនេះរួចហើយ និងកំពុងរៀបចំដើម្បីសុំការសម្រេចពីលោក ឃួង ស្រេង អភិបាលសាលារាជធានីភ្នំពេញ។
លោកបានបន្តថា ក្នុងលិខិតនោះគ្រាន់តែបញ្ជាក់ពីការជួបជុំដាក់កម្រងផ្កានៅកន្លែងរូបសំណាកលោក ជា វិជ្ជា ប៉ុណ្ណោះ និងមិនបានបញ្ជាក់អំពីការដើរដង្ហែក្បួនអ្វីឡើយ ដូច្នេះសាលារាជធានីភ្នំពេញនឹងឯកភាពដូចអ្វីដែលធ្លាប់អនុញ្ញាតកន្លងមក ប៉ុន្តែបើខុសពីនោះគឺមិនបានទេ។
លោកបានបញ្ជាក់ថា៖ «ជាធម្មតាទេ ប្រសិនធ្វើអ្វីខុសពីសំណើសុំឬជូនដំណឹងមកក្រុងនេះយើងមិនអាចអនុញ្ញាតជូនបានទេ យើងធ្លាប់ដឹងហើយនៅក្នុងច្បាប់របស់យើង ការជួបជុំលើសពីគ្នា ២០០ នាក់ សាលាក្រុងគ្មានសិទ្ធិសម្រេចទេ ទាល់តែក្រសួងមហាផ្ទៃទើបមានសិទ្ធិសម្រេច។ មួយវិញទៀត ការហែក្បួននិងការដើរផ្សេងៗ នៅតាមដងផ្លូវរបស់យើងក្នុងចំនួនមនុស្សដ៏ច្រើនអ៊ីចឹង ជាទម្លាប់គឺយើងមិនអនុញ្ញាតជូនទេ ព្រោះវាប៉ះពាល់ទៅដល់បញ្ហាសណ្ដាប់ធ្នាប់ និងចរាចរណ៍ផ្សេងៗ ហើយប្រសិនបើធ្វើខុស គឺវាជាការទទួលខុសត្រូវផ្លូវច្បាប់របស់ម្ចាស់សំណើតែម្ដង»។
លោក ម៉េត មាសភក្ដី បន្ថែមថា វិធានការច្បាប់នេះ គឺត្រូវអនុវត្តទៅតាមទំហំនៃអំពើខុសឆ្គង ប្រសិនបើកើតឡើង ដែលលោកមិនអាចជម្រាបជូនលម្អិតជាមុនបានទេ។ ខណៈមិនទាន់ឃើញលិខិតនៅឡើយនោះ លោក ឃួង ស្រេង អភិបាលរាជធានីភ្នំពេញបានបញ្ជាក់យ៉ាងខ្លីកាលពីម្សិលមិញថា សាលាក្រុងមិនដែលរារាំងចំពោះការជួបជុំប្រារព្ធពិធីរំឭកវិញ្ញាណក្ខន្ធលោក ជា វិជ្ញា ឡើយ។
លោកថា៖ «ទាល់តែសំណើហ្នឹងដល់ខ្ញុំបានខ្ញុំឆ្លើយកើតថាខ្ញុំឱ្យកម្រិត (ជួបជុំ) នេះម៉េច។ ប៉ុន្តែយើងមិនដែលរារាំងទេ គ្រាន់តែឱ្យមានសណ្ដាប់ធ្នាប់ទៅ ព្រោះអ្នកគោរពវិញ្ញាណក្ខន្ធ ជា វិជ្ជា ហ្នឹងមានមិនប៉ុន្មានទេ តែអ្នកធ្វើដំណើរជាង ៣ លាននាក់នៅក្នុងរាជធានីភ្នំពេញ អ៊ីចឹង ត្រូវគោរពអ្នកដំណើរតែប៉ុណ្ណឹងទេ»។
សហព័ន្ធសហជីពសេរីកម្មករនៃព្រះរាជាណាចក្រកម្ពុជាបានបញ្ជាក់នៅក្នុងសេចក្ដីជូនដំណឹងថា សម្រាប់ឆ្នាំ ២០១៩ នេះ ថ្នាក់ដឹកនាំនិងសមាជិកសមាជិការបស់ខ្លួន ព្រមទាំងក្រុមគ្រួសារ សាច់ញាតិ មិត្តភក្ដិចំនួន ១៥០ នាក់នឹងជួបជុំគ្នានៅម៉ោង ៨ និង៣០ នាទីព្រឹក ថ្ងៃទី ២២ ខែមករា ដើម្បីដាក់កម្រផ្កាគោរពវិញ្ញាណក្ខន្ធលោកជា វិជ្ជា ក្នុងការចងចាំ និងដឹងគុណរបស់វីរជនកម្មករដ៏ឆ្នើមរូបនេះ។
គិតដល់ឆ្នាំ ២០១៩ នេះ គឺជាគម្រប់ខួប ១៥ ឆ្នាំហើយ ដែលលោក ជា វិជ្ជា ត្រូវបានឃាតករបាញ់សម្លាប់នៅក្បែរតូបលក់កាសែត ១ ជិតរបងវត្តលង្កា ប៉ុន្តែមកទល់ពេលនេះសមត្ថកិច្ចនៅមិនអាចរកមុខឃាតករពិតឃើញនៅឡើយទេ។
លោក អាត់ ធន់ ប្រធានសម្ព័ន្ធសហជីពប្រជាធិបតេយ្យកម្មករកាត់ដេរកម្ពុជា យល់ឃើញថា ករណីបាញ់សម្លាប់លោក ជា វិជ្ជា ដែលមិនទាន់ទទួលបានយុត្តិធម៌ក្នុងរយៈពេល ១៥ ឆ្នាំមកនេះ គឺនៅតែជារូបភាពមួយគំរាមគំហែងដល់ចលនាសហជីព ដែលនាំឱ្យសហជីពខ្លាចរអានិងបាក់ស្បាត។
លោកថា៖ «ខ្ញុំគិតថា ការដែលឃាតករបាញ់សម្លាប់គាត់ (ជា វិជ្ជា) នេះគឺជាការគំរាមកំហែងមកលើចលនាសហជីព ឬក៏រំលោភទៅលើសិទ្ធិសេរីភាពរបស់សហជីពខ្លាំងណាស់ ដែលធ្វើឱ្យមានការខ្លាចរអានិងបាក់ស្បាតអ្វីដែលយើងចង់បាន គឺទី១ រដ្ឋត្រូវធានាអំពីសេរីភាពឡើងវិញទី២ រដ្ឋត្រូវធានាថា ប្អូនរបស់ ជា វិជ្ជា (លោក ជា មុនី) និងអ្នកផ្សេងទៀត ដែលធ្វើការងារជាសហជីពមិនត្រូវរងការគំរាមកំហែងទៀតទេ»។
ទាំងលោក អាត់ ធន់ និង ជា មុនី រួមទាំងសហជីពចំនួន ៤ នាក់ទៀត ត្រូវបានសាលាដំបូងរាជធានីភ្នំពេញសម្រេចកាត់ទោសកាលពីខែធ្នូ ឆ្នាំមុន ឱ្យជាប់ពន្ធនាគារ ២ ឆ្នាំកន្លះ តែត្រូវព្យួរនិងត្រូវសងជំងឺចិត្តជិត ៩ ពាន់ដុល្លារទៅដើមចោទ ២ នាក់ពាក់ព័ន្ធនឹងករណីហិង្សានៅលើផ្លូវវេងស្រេងកាលពីចុងឆ្នាំ ២០១៣។ ប៉ុន្តែក្រុមសហជីពចាត់ទុកចំណាត់ការតុលាការនេះជារឿងអយុត្តិធម៌ហើយបានសម្រេចប្ដឹងឧទ្ធរណ៍។
លោក ជា មុនី មិនអាចទាក់ទងសុំការឆ្លើយតបតាមទូរស័ព្ទបានទេ កាលពីម្សិលមិញ ព្រោះលោកបានចាកចេញទៅប្រទេសថៃក្រោយការកាត់ទោសពីសាលាដំបូងរាជធានីភ្នំពេញ។ នេះបើតាមការបញ្ជាក់ពីលោក អាត់ ធន់។
លោក ខៀវ សុភ័គ មន្ត្រីនាំពាក្យក្រសួងមហាផ្ទៃបានបញ្ជាក់ថា សហជីពគួរឈប់ព្រួយបារម្ភអំពីសុវត្ថិភាពរបស់ខ្លួនទៀត ព្រោះលោកថា ករណីឃាតកម្មលើលោក ជា វិជ្ជា បានកើតឡើងតាំងពី ១៥ ឆ្នាំមកម្ល៉េះ។
លោកថា៖ «តាំងពីពេលនោះមកវាស្ងាត់ឈឹងហើយ វាមានអីទៀត ពីដើមវាមានអ៊ីចឹង ប៉ុន្តែ ១៥ ឆ្នាំហើយ ឈប់ព្រួយបារម្ភអីទៅ ហើយខិតខំធ្វើការងារទៅ។ ចង់បញ្ជាក់ថា សំណុំរឿង (ឃាតកម្មលើលោក ជា វិជ្ជា) មិនទាន់ចប់ទេ»។
ចំពោះសំណួរថា តើការស៊ើបអង្កេតអស់រយៈ ១៥ ឆ្នាំជុំវិញឃាតកម្មលើលោក ជា វិជ្ជា បានរកឃើញភ័ស្ដុតាងបន្ថែមដែរទេ? លោក ខៀវ សុភ័គ ឆ្លើយថា រដ្ឋាភិបាលបានបង្កើតគណៈកម្មការមួយរួចហើយ ដើម្បីស៊ើបអង្កេតពីករណីនេះ៕