សៀមរាបៈ ចាប់តាំងពីខែសីហា ឆ្នាំ ២០១៨ មកដល់ខែមករាឆ្នាំនេះគម្រោង PAAGERA នៃអាជ្ញាធរជាតិអប្សរាដែលបានចូលប្រាក់បដិភាគ ៤០ ភាគរយ បានសាងសង់បង្គន់អនាម័យបាន ១ ១១០ បង្គន់ជូនដល់ពលរដ្ឋនៅក្នុងតំបន់រមណីយដ្ឋានអង្គរ ខណៈការខ្វះខាតបង្គន់អនាម័យនៅតែជាបញ្ហាប្រឈមក្នុងតំបន់រមណីយដ្ឋានប្រវត្តិសាស្ត្រនេះ។
តាមទំព័រហ្វេសប៊ុករបស់អាជ្ញាធរអប្សរាបន្ថែមថា ត្រឹមខែមករា ឆ្នាំ ២០២០ អាជ្ញាធរជាតិអប្សរាបានផ្តល់បដិភាគសាងសង់បង្គន់អនាម័យជូនប្រជាពលរដ្ឋចំនួន ២៩ គ្រួសារ ដែលនៅភូមិត្មាតពង ឃុំរុនតាឯក ស្រុកបន្ទាយស្រី ហើយបង្គន់ទាំងនេះធ្វើឡើងតាមរយៈការប្រើប្រាស់ថវិកាបដិភាគរបស់គម្រោងសុវុឌ្ឍិកម្មនៃការសម្អាតទឹក និងការគ្រប់គ្រងទឹកក្នុងតំបន់អង្គរ PAAGERA នៃអាជ្ញាធរជាតិអប្សរាចំនួន ៤០ ភាគរយ និងម្ចាស់សំណើ ៦០ ភាគរយ។
អាជ្ញាធរជាតិអប្សរាបញ្ជាក់ថា៖ «ការចូលរួមចំណែកនេះ គឺដើម្បីឱ្យប្រជាជនដែលរស់នៅក្នុងរមណីយដ្ឋានអង្គរមានបង្គន់អនាម័យសម្រាប់ប្រើប្រាស់ឲ្យបានគ្រប់គ្នា ចៀសវាងការបន្ទោរបង់ពាសវាលពាសកាល កាត់បន្ថយជំងឺឆ្លងផ្សេងៗជំរុញឱ្យអ្នកស្រុកអង្គរចេះរស់នៅស្អាតមានអនាម័យ និងចូលរួមលើកកម្ពស់បរិស្ថានតំបន់អង្គរទាំងមូលផងដែរ»។
លោក ឡុង កុសល អ្នកនាំពាក្យអាជ្ញាធរជាតិអប្សរាបានប្រាប់ភ្នំពេញប៉ុស្តិ៍ពីម្សិលមិញថា ក្នុងមួយថ្ងៃៗការផ្តល់ការអនុញ្ញាតឲ្យប្រជាពលរដ្ឋសាងសង់បង្គន់អនាម័យសម្រាប់ប្រើប្រាស់ប្រចាំថ្ងៃនេះគឺមានច្រើន។ ប៉ុន្តែលោកថា ចំពោះតួលេខនេះគឺជាការសាងសង់ដោយទទួលបានប្រាក់បដិភាគពីអាជ្ញាធរអប្សរា ដើម្បីសម្រួលដល់ពលរដ្ឋមួយចំនួនដែលមិនមានលទ្ធភាពអាចសាងសង់បង្គន់អនាម័យប្រើប្រាស់ផ្ទាល់ខ្លួនប៉ុណ្ណោះ។
លោកបន្តថា ដោយបញ្ហាបង្គន់អនាម័យនៅក្នុងតំបន់រមណីយដ្ឋានអង្គរនៅតែមានការខ្វះខាតដូច្នេះអាជ្ញាធរអប្សរា នៅតែបន្តជំរុញឲ្យពលរដ្ឋចូលរួមតាមរយៈការស្នើមកអាជ្ញាធរអប្សរាក្តី តាមរយៈថវិកាផ្ទាល់ខ្លួនក្តី ដើម្បីសាងសង់បង្គន់អនាម័យនៅតាមគេហដ្ឋានឲ្យបានគ្រប់ៗគ្នា។
លោកបន្ថែមថា៖ «នេះជាការងារមួយចាំបាច់សម្រាប់យើង ដូច្នេះយើងនៅតែបន្តធ្វើអ៊ីចឹងដោយធ្វើយ៉ាងណាឲ្យការរស់នៅរបស់ពលរដ្ឋយើងមានការងាយស្រួល ព្រោះពួកគាត់ជាផ្នែកមួយនៃបេតិកភណ្ឌ ហើយបញ្ហាបង្គន់អនាម័យនេះនៅតែជាចំណុចប្រឈមនៅឡើយបើទោះជាពលរដ្ឋមួយចំនួន គាត់បានងាកមកខ្វល់ខ្វាយពីបញ្ហាសុខភាព បញ្ហាបរិស្ថាននៃការរស់នៅជុំវិញខ្លួនគាត់ក្តី»។
លោក រួន សិទ្ធី ពលរដ្ឋរស់នៅឃុំរុនតាឯក ស្រុកបន្ទាយស្រីដែលទទួលបានប្រាក់បដិភាគពីអាជ្ញាធរអប្សរា ដើម្បីសាងសង់បង្គន់អនាម័យបានប្រាប់ភ្នំពេញប៉ុស្តិ៍ពីម្សិលមិញថា ការផ្តល់ប្រាក់បដិភាគដល់ប្រជាពលរដ្ឋនៅក្នុងភូមិ ដើម្បីធ្វើការសាងសង់បង្គន់អនាម័យនេះគឺជារឿងល្អ។
លោកបន្តថា៖ «បង្គន់អនាម័យភូមិខ្ញុំរស់នៅនេះគឺមានការខ្វះខាតដែរដោយសារតែប្រជាជន គាត់មិនសូវមានសមត្ថភាពក្នុងការដាក់បង្គន់អនាម័យនេះ។ នៅពេលមានការជួយដាក់ដោយអាជ្ញាធរអប្សរានេះ ឃើញថាគាត់ក៏សប្បាយចិត្តម្យ៉ាងដែរ ព្រោះបើប្រៀបធៀបពីសម័យមុនមានលក្ខណៈធូរថ្លៃជាងមុន។ ពីមុនយើងអាចបត់ជើង បត់ដៃតាមព្រៃបាន តែសម័យនេះមិនអាចទេ»។
លោក សិទ្ធី រំពឹងថាប្រជាពលរដ្ឋនៅក្នុងភូមិទាំងអស់ចេះឲ្យតម្លៃទៅលើការប្រើប្រាស់បង្គន់អនាម័យដើម្បីទទួលបាននូវសុខភាពល្អ បរិស្ថានស្អាតមានអនាម័យហើយវាគឺជាទម្លាប់មួយល្អផងដែរ ព្រោះថាបញ្ហានេះ បើគ្មានការចូលរួមពីពលរដ្ឋផ្ទាល់ក៏មិនអាចសម្រេចបាន ១០០ ភាគរយដែរ។
បើតាមខិត្តប័ណ្ណផ្សព្វផ្សាយរបស់អាជ្ញាធរជាតិអប្សរា ប្រជាពលរដ្ឋអាចមានជម្រើសច្រើនក្នុងការជ្រើសរើសបង្គន់អនាម័យដែលមានតម្លៃសមរម្យចន្លោះពី ២៦ ម៉ឺនរៀល ដល់ ៥៨ ម៉ឺនរៀល ដើម្បីសាងសង់នៅតាមគេហដ្ឋាន ខណៈដែលសម្ភារមួយចំនួនសម្រាប់សាងសង់ក៏អាចរកបាននៅតាមផ្ទះដោយពុំចាំបាច់ចំណាយថវិកាដើម្បីទិញនោះដែរ៕