សៀមរាបៈ អាជ្ញាធរជាតិអប្សរាបានសម្រេចទុកពេល ២ ថ្ងៃ ឲ្យពលរដ្ឋចំនួន ៣ គ្រួសារ ដែលបានសាងសង់សំណង់រំលោភលើខ្នងទំនប់ត្រពាំងហែផ្កាផ្នែកខាងត្បូង ក្នុងភូមិបុស្សក្រឡាញ់ សង្កាត់ជ្រាវ ក្រុង និងខេត្តសៀមរាប បន្ទាប់ពីភាគីទាំង ២ បានជួបពិភាក្សាគ្នាកាលពីរសៀលថ្ងៃអង្គារម្សិលមិញ។
កាលពីដើមខែនេះលោក ហង់ ពៅ អគ្គនាយកនៃអគ្គនាយកដ្ឋានអាជ្ញាធរជាតិអប្សរាបានផ្ញើលិខិតជាបន្តបន្ទាប់ទៅបុគ្គល ៣ រូប រួមមានឈ្មោះ ឈិត សុឌាំង, យន់ សុខន និង ពុម សុគន្ធា ដើម្បីឲ្យរុះរើសំណង់ និងការរំលោភដោយខុសច្បាប់លើខ្នងទំនប់ត្រពាំងហែផ្កាផ្នែកខាងត្បូង។ ជាមួយនឹងការឲ្យរុះរើនេះ អាជ្ញាធរមួយនេះក៏បានព្រមានចាត់វិធានការរដ្ឋបាលរួមទាំងកសាងសំណុំរឿងបញ្ជូនទៅតុលាការផងដែរ។
លោក ឡុង កុសល អ្នកនាំពាក្យអាជ្ញាធរជាតិអប្សរាបានប្រាប់ភ្នំពេញប៉ុស្តិ៍កាលពីម្សិលមិញថា ក្រោយពីមានការជួបជាមួយប្រជាពលរដ្ឋទាំងនោះរួចមក ពួកគេបានស្នើសុំទុកពេលឲ្យ ២ ថ្ងៃបន្ថែមទៀត ដើម្បីឲ្យពួកគេត្រៀមរៀបចំរុះរើសំណង់ដែលពួកគេបានសង់ទាំងនោះចេញវិញ។
លោកបានបញ្ជាក់ថា៖ «ការជួបនេះ ពួកគាត់បានទទួលស្គាល់នូវអ្វីដែលពួកគាត់បានធ្វើគឺខុសច្បាប់ ហើយគាត់ក៏បានបង្ហាញនូវទឹកចិត្តក្នុងការចូលរួមថែរក្សាសម្បត្តិបេតិកភណ្ឌវប្បធម៌នេះដែរ។ ដូច្នេះគាត់ស្នើសុំទុករយៈពេល ២ ថ្ងៃឲ្យពួកគាត់សម្រេចថាគាត់នឹងត្រូវរុះរើខ្លួនឯង ឬត្រូវប្រឈមមុខនឹងតុលាការ»។
យ៉ាងណាក៏ដោយលោក កុសល បានអះអាងថានៅពេលថ្ងៃកំណត់បានមកដល់ ប្រសិនបើពួកគាត់មិនព្រមរុះរើចេញដូចការកំណត់ទេនោះ អាជ្ញាធរអប្សរានឹងបន្តនីតិវិធីដោយប្តឹងទៅតុលាការឲ្យមានចំណាត់ការបន្តទៅតាមផ្លូវច្បាប់ និងលែងទុកពេលឲ្យបន្តទៀតហើយ។
លោកបញ្ជាក់ថា៖ «គឺនៅថ្ងៃទី ២៤ ខាងមុខនេះ យើងនឹងដឹងថា គាត់សម្រេចយ៉ាងម៉េច ហើយយើងនឹងអនុវត្តកិច្ចការងាររបស់យើងដោយមិនបន្តពន្យារពេលអីទៀតទេ គឺនឹងត្រូវដាក់ពាក្យបណ្តឹងទៅតុលាការតែម្តង។ ចំណែកសំណង់ដែលរំលោភនេះក៏យើងនឹងចុះទៅរុះរើដែរ»។
ត្រពាំងហែផ្កាស្ថិតក្នុងភូមិបុស្សក្រឡាញ់ ត្រូវបានកំណត់ជាបុរាណដ្ឋានមួយក្នុងចំណោមបុរាណដ្ឋានជាច្រើននៅក្នុងខេត្តសៀមរាបដែលអាជ្ញាធរជាតិអប្សរាមានកាតព្វកិច្ចថែរក្សាការពារ និងអភិរក្សទុកជាសម្បត្តិបេតិកភណ្ឌរបស់ជាតិ ហើយរាល់សកម្មភាពរុករាន សាងសង់សំណង់ថ្មី ជីកគាស់កកាយ បំផ្លិចបំផ្លាញ កែប្រែរូបរាងនៅតាមបុរាណដ្ឋានទាំងនោះដោយគ្មានការអនុញ្ញាតគឺជាបទល្មើសបំផ្លិចបំផ្លាញសម្បត្តិបេតិកភណ្ឌវប្បធម៌។ នេះបើតាមអាជ្ញាធរជាតិអប្សរា។
លោក យន់ សុខន ជាម្ចាស់ដី និងសំណង់ដែលតម្រូវឲ្យរុះរើបានប្រាប់ភ្នំពេញប៉ុស្តិ៍ បន្ទាប់ពីជួបជាមួយអាជ្ញាធរអប្សរាថាលោកនឹងរុះរើសំណង់នេះដោយខ្លួនឯង បើទោះដីនេះជាដីដូនតារបស់លោកក៏ដោយ។
លោកបានបញ្ជាក់ថា៖ «ប្រសិនបើមានការប៉ះពាល់ដល់ផ្នែកដែលគេតម្រូវខានមិនបានទេ យើងក៏ធ្វើការរុះរើតាមគេ កុំឲ្យប៉ះពាល់ដល់កិត្តិយស និងកេរ្តិ៍ឈ្មោះរបស់យើង ព្រោះខ្ញុំបានធ្វើបុណ្យច្រើនហើយតាមរយៈយើងធ្វើផ្លូវធ្វើអី ដូច្នេះពិបាកដោះស្រាយ យើងដោះស្រាយតាមនីតិវិធីទៅ ហើយក៏មិនដឹងថាម៉េចដែរ ព្រោះជាដីដូនតាយើង បើមិនអាចធ្វើអីបានទេ គេដាក់ជាបុរាណដ្ឋានហើយ ក៏យើងធ្វើតាមគេទៅ»។
លោក ស៊ន់ សុជាតិ មេធាវីរបស់អាជ្ញាធរជាតិអប្សរាបានប្រាប់ភ្នំពេញប៉ុស្តិ៍ថា ក្រុមមេធាវីបានត្រៀមឯកសាររួចរាល់ហើយដោយរង់ចាំតែនីតិវិធី ចុងក្រោយរបស់អាជ្ញាធរជាតិអប្សរាដែលទុកពេលឲ្យប្រជាពលរដ្ឋប៉ុណ្ណោះ។
លោក សុជាតិ បន្តថាក្នុងករណីដែលអាជ្ញាធរជាតិអប្សរាដាក់ពាក្យប្តឹងតុលាការ នោះពួកគេនឹងយកមាត្រាដែលមានចែងនៅក្នុងច្បាប់ភូមិបាល និងច្បាប់ការពារបេតិកភណ្ឌដែលអាចប្រឈមទោសជាប់ពន្ធនាគារ និងពិន័យជាប្រាក់ក្នុងករណីដែលពួកគេបានបំផ្លិចបំផ្លាញសម្បត្តិបេតិកភណ្ឌរបស់ជាតិ៕