The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​អប្សរា​ប្រកាស​ឲ្យ​ទេសចរ​ប្រយ័ត្ន​ការ​ស្លៀក​ពាក់​ពេល​មក​លេង​អង្គរ​

អាជ្ញាធរ​អប្សរា​ប្រកាស​ឲ្យ​ទេសចរ​ប្រយ័ត្ន​ការ​ស្លៀក​ពាក់​ពេល​មក​លេង​អង្គរ​

Content image - Phnom Penh Post
ស្រ្តី​បរទេស​ពីរ​រូប​នៅតុលាការ​ខេត្ត​សៀមរាប បន្ទាប់​ពី​ត្រូវ​បាន​ឃាត់​ខ្លួន កាល​ពី​ខែកុម្ភៈ ឆ្នាំ ២០១៥ ដោយ​សារ​តែ​បានថតរូបអាក្រាត​នៅ​ប្រាសាទ​បុរាណមួយ។ សហការី

អាជ្ញាធរ​អប្សរា​ប្រកាស​ឲ្យ​ទេសចរ​ប្រយ័ត្ន​ការ​ស្លៀក​ពាក់​ពេល​មក​លេង​អង្គរ​

សៀមរាប អាជ្ញាធរ​អប្សរា​បាន​ប្រកាស​ពី​​ម្សិល​មិញ​នេះថា ភ្ញៀវទេសចរណ៍​ដែល​មក​លេង​អង្គរវត្ត​នឹង​ត្រូវ​ប្រុងប្រយ័ត្ន​ចំពោះ​ការ​ស្លៀក​ពាក់ចាប់​ពី​ខែ​ក្រោយ​នេះ​តទៅ។

លោក ឡុង កុសល អ្នក​នាំពាក្យ​របស់​អាជ្ញាធរអប្សរា​បាន​ឲ្យ​ដឹង​ថា ដើម្បី​ជំរុញ​​ឲ្យ​ភ្ញៀវ​ទេសចរឲ្យ​គោរពប្រាសាទ​ដ៏​ពិសិដ្ឋ និង​វប្បធម៌​របស់​ប្រទេស​កម្ពុជា ចាប់​ពី​ថ្ងៃ​ទី ៤ ខែសីហា​ទៅ ភ្ញៀវ​ទេសចរ​​ដែល​មក​ទស្សនា​អង្គរ​នឹង​ត្រូវ​តម្រូវ​ឲ្យ​ស្លៀក​ខោ​ឬ​សំពត់​ក្រោម​ជង្គង់ និង​អាវ​យឹត​ដែល​បិទ​ស្មារ​ជិត។

លោក​​​និយាយ​ថា៖ «យើង​នឹង​មិន​លក់​សំបុត្រ​ចូល​អង្គរ​ឲ្យ​ពួក​គាត់​ទេ ប្រសិនជា​ពួក​គាត់​ស្លៀក​លេច​លើ​លេច​ក្រោម។ ទោះ​បីជា​យ៉ាងណា អាជ្ញាធរ​របស់​ពួក​យើង​នឹង​ជម្រាប​គាត់ថា តើ​ត្រូវ​ពាក់​ខោអាវ​អ្វី​មក ដើម្បី​ឲ្យ​គាត់​អាច​មក​ទិញ​សំបុត្រ​បាន​នៅបន្ទាប់​ពី​​ប្តូរ​ខោអាវ​រួច»។

លោក​​បន្ថែម​ថា៖ «នៅពេល​ដែល​ភ្ញៀវ​ទេសចរ​ស្លៀកពាក់ត្រឹម​ត្រូវ​មក​លេង​ឧទ្យានជាតិ​អង្គរ វា​មានន័យ​ថា ពួក​គេ​កំពុង​តែ​បង្ហាញ​ការ​គោរព​ចំពោះ​ប្រាសាទ​ជាទី​សក្ការៈបូជា វប្បធម៌ និង​តម្លៃ​ស្ត្រី​ខ្មែរ»។

លោក អាង គឹមអ៊ាង ប្រធាន​សមាគមន៍​ទីភ្នាក់ងារ​ទេសចរណ៍ បាន​បង្ហាញ​ការ​យល់ស្រប​ទៅ​លើ​វិធានការ​នេះ ក៏​ប៉ុន្តែ​លោក​បាន​រម្លឹក​ថា ភ្ញៀវ​ទេសចរ និង​បុគ្គលពាក់ព័ន្ធ​ទាំង​ឡាយ​ទៀត​ក្នុង​វិស័យ​ទេសចរណ៍​ត្រូវ​តែ​ត្រូវ​បាន​ទទួល​​ដំណឹង​នេះ។

លោក​​ថា៖ «ខ្ញុំ​មិន​យល់​ថា វាជាបញ្ហា​មួយ​សម្រាប់​ភ្ញៀទេសច​ទេ... ខ្ញុំ​មិន​គិត​ថា​ពួកគាត់​នឹង​មិន​សប្បាយ​ចិត្ត​ទេ ប្រសិន​ជា​យើង​បាន​ជម្រាប​គាត់​មុន»។

សូម​បញ្ជាក់​ថា វិធានការណ៍​នេះ​គឺ​ជា​ផ្នែក​មួយ​នៃ​ក្រម​ប្រតិបត្តិ​អង្គរ ដែល​ត្រូវ​បាន​អនុវត្ត​ឡើង​ជា​ការ​ឆ្លើយ​តប​នឹងការ​ថត​រូប​អាក្រាត​កាយ របស់​ជន​បរទេស​មួ​យ​ចំនួន ដែល​បង្ហាញ​ពី​ការមិន​គោរព​ចំពោះ​រមណីយដ្ឋាន​វប្បធម៌​ដ៏​ចំណាស់​នេះ។

លោក អាង គឹមអ៊ាង បាន​និយាយ​ថា៖ «ទង្វើ​បែប​នេះ​ធ្វើ​ឲ្យ​យើង​មាន​ការ​មិន​សប្បាយ​ចិត្ត​ជា​ខ្លាំង។ ដូច្នេះ​ហើយ​ក្រម​វិន័យ​នេះ​នឹង​ធ្វើ​ឲ្យ​ផល​ប៉ះ​ពាល់​​​ដល់​កម្រិត​អប្បរមា។ នៅ​ក្នុង​ប្រទេស​នេះ អ្នក​មិន​អាច​ធ្វើ​អ្វី​ឆ្កួតៗ​បានទេ អ្នកត្រូវ​តែ​គោរពច្បាប់ទម្លាប់»។

លោក ស៊ី សុផល មគ្គុទេស​ទេសចរណ៍​ភាសាអង់គ្លេស​ម្នាក់ បាន​ឲ្យ​ដឹង​ថា លោក​សុំ​ស្វាគមន៍​ចំពោះ​ក្រម​វិន័យ​នេះ ដោយ​បាន​លើក​ឡើង​ថា ប្រាសាទ​បុរាណ​ពុំ​មែន ជា​កន្លែទាក់ទាញ​ទេសចរ​តែមួយ​មុខ​នោះទេ តែ​ក៏ជា​កន្លែង​សក្ការៈបូជា​មួយ​ផង​ដែរ។ លោក ស៊ិន ឆៃវ័ន ដែល​ជា​មគ្គុទេសន៍​ទេសចរណ៍ភាសាថៃ និង​កូរ៉េ ក៏​បាន​យល់​ស្រប​ផង​ដែរ​ថា ការ​កំណត់​នេះ​គឺ​ជា​ជំហាន​វិជ្ជមាន​មួយ។

លោក​ថា៖ «ពួក​គាត់​ត្រូវ​តែ​គោរព​វប្បធម៌​​នៃ​ប្រទេស​ដែល​ពួក​គាត់​បាន​ឈាន​ជើង​ចូល​មក»៕ TN

អត្ថបទគួរចាប់អារម្មណ៍