សៀមរាបៈ ទឹកជាច្រើនលានម៉ែត្រគុបត្រូវបានអាជ្ញាធរជាតិអប្សរាទប់រក្សាទឹកទុកនៅតាមអាងស្ដុកទឹកនានាក្នុងតំបន់រមណីយដ្ឋានអង្គរ បន្ទាប់ពីមានភ្លៀងធ្លាក់ជាបន្តបន្ទាប់ដោយសារការរងនូវឥទ្ធិពលព្យុះពីតំបន់ជុំវិញនារយៈពេលប៉ុន្មានថ្ងៃចុងក្រោយ។ ការទប់ទឹកទុកនេះ ក្រៅពីដើម្បីបម្រើដល់ការអភិរក្សប្រាសាទក៏សម្រាប់ប្រើប្រាស់ក្នុងក្រុងសៀមរាប និងការធ្វើកសិកម្មនារដូវប្រាំងខាងមុខផងដែរ។
អនុប្រធាននាយកដ្ឋានគ្រប់គ្រងទឹកនៃអាជ្ញាធរជាតិអប្សរាលោក ភឿន សុឃីម ប្រាប់ភ្នំពេញ-ប៉ុស្តិ៍ម្សិលមិញថា បច្ចុប្បន្នក្រុមការងាររបស់លោកបានខិតខំទប់ទឹកស្ដុកទុកបានគ្រប់គ្រាន់ហើយនៅតាមកសិន្ធុអង្គរវត្ត កសិន្ធុក្រុងអង្គរធំ បារាយណ៍ខាងជើងបារាយណ៍ខាងលិច និងតាមទំនប់នានា ដើម្បីទុកសម្រាប់ធ្វើការផ្គត់ផ្គង់នារដូវប្រាំងខាងមុខ។ ការទប់ទឹកស្ដុកទុកនេះមួយផ្នែកគឺដើម្បីបម្រើកិច្ចការអភិរក្សប្រាសាទ និងមួយផ្នែកទៀតគឺត្រៀមសម្រាប់ចែកចាយដល់ប្រជាពលរដ្ឋក្នុងតំបន់សម្រាប់ប្រើប្រាស់នារដូវប្រាំងខាងមុខ។
លោក ភឿន សុឃីម ថ្លែងថា៖ «ស្ថានភាពទឹកនៅរដូវវស្សាឆ្នាំនេះមានផលល្អដល់មន្ត្រីជំនាញក្នុងការប្រមូលស្តុកទុកតាមបារាយណ៍ និងកសិន្ធុនានានៅក្នុងតំបន់អង្គរដែលត្រូវការទឹកដល់ទៅជាង ១០០ លានម៉ែត្រគុបសម្រាប់ទ្រទ្រង់ប្រាសាទ និងការងារអភិរក្សនៅរដូវប្រាំង»។
ទឹកដែលអាជ្ញាធរជាតិអប្សរាបានទប់ស្តុកទុកក្នុងអំឡុងពេលភ្លៀងនេះ គឺបានគ្រប់គ្រាន់ហើយខាងលោកក៏កំពុងតែបញ្ចៀសទឹកនេះទៅតាមផ្លូវទឹកបុរាណដែលអាជ្ញាធរអប្សរាបានស្តារនាពេលកន្លងមកទៅតាមស្ទឹងពួក ស្ទឹងសៀមរាបជាដើម។
លោក សុឃីម បន្ថែមថា ក្រោយពីអាជ្ញាធរជាតិអប្សរារៀបចំស្ដារឡើងវិញនូវប្រព័ន្ធធារាសាស្ដ្របុរាណមក គឺការងារគ្រប់គ្រងទឹកមានភាពងាយស្រួល ពិសេសបញ្ចៀសទឹកភ្លៀងមិនឱ្យជន់លិចតំបន់អង្គរ និងក្នុងក្រុងសៀមរាបដូចប៉ុន្មានឆ្នាំកន្លងទៅនោះទេ។ ការងារបញ្ចៀសទឹកនេះ គឺអ្នកជំនាញទឹករបស់អាជ្ញាធរជាតិអប្សរាបានធ្វើការបង្ហូរទម្លាក់ទៅតាមដៃស្ទឹងមួយចំនួនក៏ដូចជាតាមប្រឡាយជាដើម។
បើតាមអាជ្ញាធរអប្សរាជំហានដំបូងគឺរក្សាទឹកទុកឱ្យបានដើម្បីទ្រទ្រង់ដល់ប្រាសាទបុរាណ ដោយសារប្រាសាទត្រូវការទឹក ហើយមួយផ្នែកទៀតគឺរក្សាទុកសម្រាប់ប្រើប្រាស់រយៈពេលមួយឆ្នាំក្នុងក្រុងសៀមរាបទាំងមូល ឯមួយផ្នែកទៀតគឺទុកសម្រាប់ស្រោចស្រពស្រែប្រមាណជា ១ ម៉ឺនហិកតា ទាំងស្រូវប្រាំង និងស្រូវប្រដេញទឹកផងដែរ។
ជាមួយគ្នានេះដែរ ទឹកដែលស្តុកក្នុងបារាយណ៍គឺធានាបានចំពោះរដ្ឋាករទឹក ចំពោះអ្នកប្រើប្រាស់នៅខាងក្រោមដោយសារអាជ្ញាធរអាចដឹងពីកម្រិតនៃការផ្គត់ផ្គង់ដោយសារការងារនេះលោកធ្វើជារៀងរាល់ឆ្នាំជាការប្រើប្រាស់ដដែលៗដែលអាចឱ្យលោក និងក្រុមការងារដឹងមុនបាន។
លោក សោម តុលា អាយុ ៣៥ ឆ្នាំជាអាជីវករលក់វត្ថុអនុស្សាវរីយ៍នៅក្នុងផ្សាររាត្រី ខេត្តសៀមរាបបានប្រាប់ភ្នំពេញប៉ុស្តិ៍ម្សិលមិញថា លោកតែងតែសរសើរទៅដល់ក្រុមការងារអាជ្ញាធរជាតិអប្សរាដែលបានគិតគូរទៅដល់ប្រជាពលរដ្ឋក្នុងក្រុងនេះ ជាពិសេសការថែរក្សាប្រាង្គប្រាសាទអង្គរវត្ត និងប្រាសាទនានាដោយរក្សាទឹកទុកជារៀងរាល់ឆ្នាំ មិនឲ្យខ្វះខាត។
លោកថ្លែងថា៖ «ប្រជាពលរដ្ឋមិនមានអាងធំៗសម្រាប់ស្តុកទឹកទុកប្រើប្រាស់ពេញ ១ ឆ្នាំនោះទេ ប៉ុន្តែយើងសំណាងដែលមានខាងក្រុមការងាររបស់អាជ្ញាធរអប្សរាបានប្រមូលទឹកទុកផ្គត់ផ្គង់ដល់ពលរដ្ឋក្នុងការប្រើប្រាស់មិនដែលខ្វះខាតក្នុង ១ ឆ្នាំៗ»។
លោក ភឿន សុឃីម បានលើកឡើងទៀតថា ក្រោយពីអាជ្ញាធរជាតិអប្សរារៀបចំស្ដារឡើងវិញនូវប្រព័ន្ធធារាសាស្ដ្របុរាណមកគឺការងារគ្រប់គ្រងទឹកមានភាពងាយស្រួល ពិសេសបញ្ចៀសទឹកភ្លៀងមិនឱ្យជន់លិចតំបន់អង្គរ និងក្នុងក្រុងសៀមរាប។ ការងារបញ្ចៀសទឹកនេះ គឺអ្នកជំនាញទឹករបស់អាជ្ញាធរជាតិអប្សរាបានធ្វើការបង្ហូរទម្លាក់ទៅតាមដៃស្ទឹង និងប្រឡាយជាដើម៕