សៀមរាប: អាជ្ញាធរជាតិអប្សរា បានជួយសង្គ្រោះភ្ញៀវទេសចររងរបួសដោយរអិល ឬជំពប់ជើងដួល គ្រេច ថ្លោះដៃ ជើង ខ្យល់គរ វិលមុខ ចុកពោះ សត្វស្វាខាំ និងពុលអាហារបាន ១១៣ ករណី ព្រមទាំងបានជួយ រើសប្រគល់វត្ថុដែលភ្ញៀវបាត់ ឬភ្លេច ក៏ ដូចជាហាមឃាត់ភ្ញៀវដែលប្រព្រឹត្តមិនសមរម្យបានចំនួន ១៦៥ ករណី នៅក្នុងត្រីមាសទី១ ឆ្នាំ ២០១៩ នេះ។
តាមរបាយការណ៍សកម្មភាពការងាររបស់នាយកដ្ឋានអភិវឌ្ឍន៍ទេសចរណ៍អង្គរ នៃអាជ្ញាធរជាតិអប្សរា ប្រចាំត្រីមាសទី១ ក្នុងឆ្នាំ ២០១៩ ចេញកាលពីម្សិលមិញបានឲ្យដឹងថា បញ្ហាទាំងនេះ ត្រូវបានភ្នាក់ងារទេសចរណ៍ដែលមានជំនាញសង្គ្រោះបឋម និងមានបរិក្ខារសង្គ្រោះបឋមនៅជាប់ខ្លួន បានជួយសង្គ្រោះបឋមទាន់ពេលវេលា នៅកន្លែងកើតហេតុក្នុងករណីស្រាលៗនិងសហការជាមួយនគរបាលទេសចរណ៍ និងនគរបាលការពារបេតិកភណ្ឌ បញ្ជូនទៅមន្ទីរពេទ្យក្នុងករណីរបួសធ្ងន់ធ្ងរ។
អាជ្ញាធរជាតិអប្សរាបញ្ជាក់ថា៖ «ក្រុមភ្នាក់ងារទេសចរណ៍ ក៏បានរើសសម្ភារភ្ញៀវដែលភ្លេច ឬជ្រុះនៅតាមប្រាសាទចំនួន ៩៣ ករណី ដោយក្នុងនោះ សម្ភារចំនួន ៨៥ ករណី ត្រូវបានរកឃើញរួមមានទូរស័ព្ទដៃ អាយផេត កាបូបស្ពាយ កាបូបយួរដៃ កាបូបលុយ កាតវីសារ និងម៉ាស៊ីនថតជាដើម ហើយបានរកឃើញនិងប្រគល់ជូនម្ចាស់ដើមវិញ»។
លោក ឡុង កុសល់ អ្នកនាំពាក្យនិងជាប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរា បានថ្លែងកាលពីម្សិលមិញថា ក្រៅពីសកម្មភាពសង្គ្រោះ និងការរើសប្រគល់វត្ថុដែលភ្ញៀវបាត់ ឬភ្លេច ក្រុមភ្នាក់ងារទេសចរណ៍ក៏បានហាមឃាត់ភ្ញៀវដែលប្រព្រឹត្តមិនសមរម្យបានចំនួន ១៦៥ ករណីផងដែរក្នុងនោះរួមមាន ការបង្ហោះដ្រូន (Drone) ការបន្ទោបង់ក្នុងបរិវេណប្រាសាទ ជនបរទេសថតរូបអាពាហ៍ពិពាហ៍ដោយគ្មានការអនុញ្ញាត ការថតរូបបញ្ចេញកាយវិការមិនសមរម្យ (ថតបង្ហាញម៉ូដ ថតរូបភាពមិនសមរម្យ) ស្លៀកពាក់មិនសមរម្យ សម្តែងសៀកនៅក្នុងប្រាសាទ រៀបចំពិធីទទួលទានអាហារនៅក្នុងប្រាសាទ ប្រើប្រាស់ម៉ាស៊ីនថតខ្នាតធំ ធ្វើពិធីសាសនាដោយគ្មានការអនុញ្ញាតថតរូបផ្សព្វផ្សាយពាណិជ្ជកម្មនិងគូរគំនូរលក្ខណៈទ្រង់ទ្រាយធំដោយមិនមានការអនុញ្ញាត។
លោកបន្តថា៖ «ក្រុមការងារមន្ត្រី និងបុគ្គលិកនៃអាជ្ញាធរជាតិអប្សរាបានបំពេញការងារល្អណាស់ គឺនៅតំបន់អង្គរ មិនមានបទល្មើសអ្វីកើតឡើងទេគឺមានតែភ្ញៀវភ្លេចរបស់របរបន្ដិចបន្ដួច និងអ្នកខ្លះដើរច្រើនពេកក៏ខ្យល់ចាប់ ហើយអ្នកខ្លះក៏រអិលជើងដួល គ្រេចថ្លោះតិចតួចប៉ុណ្ណោះគឺមិនមានអ្វីគួរកត់សម្គាល់ទេ»៕