.jpg)
ផ្ទះពលរដ្ឋនៅក្នុងតំបន់អាជ្ញាធរជាតិអប្សរា។ រូបថត អាជ្ញាធរជាតិអប្សរា
ភ្នំពេញៈ ក្នុងរយៈពេល ៤ ខែឆ្នាំនេះអាជ្ញាធរជាតិអប្សរាបានអនុញ្ញាតឲ្យពលរដ្ឋជួសជុលផ្ទះ និងសាងសង់សំណង់តូចតាចចំនួន ១ ១១០ គ្រួសារ ក្នុងសំណើចំនួន ១ ៥២៣ គ្រួសារ ខណៈបានទប់ស្កាត់ និងរុះរើសំណង់បំពានច្បាប់ចំនួន ៧២៩ ករណីផងដែរ។ នេះបើតាមលោក ឡុង កុសល អ្នកនាំពាក្យអាជ្ញាធរជាតិអប្សរាប្រាប់ភ្នំពេញប៉ុស្ដិ៍ពីថ្ងៃអង្គារ។
លោក ឡុង កុសល ថ្លែងថារយៈពេល ៤ ខែដើមឆ្នាំ ២០២០ ក្រុមការងារសហគមន៍នៃអាជ្ញាធរជាតិអប្សរាបានចុះសំណេះសំណាលជាមួយពលរដ្ឋដើម្បីពិនិត្យសំណើសុំជួសជុល និងសាងសង់តូចតាចតាមភូមិមួយចំនួនក្នុងតំបន់ឧទ្យានអង្គរចំនួន ១ ៥២៣ គ្រួសារ ក្នុងនោះបានអនុញ្ញាតឲ្យសាងសង់ចំនួន ១ ១១០ គ្រួសារ។
លោកបានបន្តថា៖ «ចំពោះពលរដ្ឋដែលមិនទទួលបានការអនុញ្ញាតឲ្យសាងសង់នោះ ព្រោះពួកគាត់មិនបានបំពេញគ្រប់លក្ខខណ្ឌ។ ប៉ុន្ដែរយៈពេល ៤ ខែនេះក៏នៅតែមានពលរដ្ឋលួចសាងសង់សំណង់ខុសច្បាប់ជាច្រើនករណីផងដែរ។ ពួកគាត់ភាគច្រើនជាអ្នកមករស់នៅថ្មីនៅតំបន់គ្រប់គ្រងដោយអាជ្ញាធរជាតិអប្សរាហើយបានលួចសាងសង់សំណង់ផ្សេងៗបំពានច្បាប់តែម្ដង។ ប៉ុន្ដែសំណង់ខុសច្បាប់ទាំងនោះត្រូវបានក្រុមការងារជំនាញយើងចុះទប់ស្កាត់ និងឲ្យរុះរើចេញវិញសរុបមាន ៧២៩ ករណី»។
លោក កុសល បានបញ្ជាក់ថា ក្រៅពីការលួចសង់ដោយគ្មានច្បាប់ក៏មានពលរដ្ឋខ្លះដែលទទួលបានការអនុញ្ញាតឲ្យសាងសង់ហើយ ប៉ុន្ដែបែរជាសង់ខុសពីសំណើទៅវិញដែលករណីនេះអាជ្ញាធរជាតិអប្សរាបានតម្រូវឲ្យរុះរើវិញ។
តាមរបាយការណ៍របស់លេខាធិការដ្ឋានសហគមន៍នៃអាជ្ញាធរជាតិអប្សរាឲ្យដឹងថាករណីអនុញ្ញាតឲ្យសាងសង់នេះគឺមានពលរដ្ឋនៅស្រុកប្រាសាទបាគង ១១៤ គ្រួសារ ស្រុកអង្គរធំ ៧៥ គ្រួសារ ស្រុកពួក ២៥៥ គ្រួសារ ស្រុកបន្ទាយស្រី ៤៩៧ គ្រួសារ និងក្រុងសៀមរាប ១៦៩ គ្រួសារ។
អាជ្ញាធរជាតិអប្សរាបញ្ជាក់ថា ក្រុមការងារសហគមន៍នៃអាជ្ញាធរជាតិអប្សរា បានចុះធ្វើការជាប្រចាំដើម្បីសម្របសម្រួលសំណើផ្សេងៗរបស់ពលរដ្ឋ និងផ្សព្វផ្សាយអប់រំពលរដ្ឋឲ្យកាន់តែយល់ច្បាស់ពីតួនាទី និងភារកិច្ចរបស់អាជ្ញាធរជាតិអប្សរា ការប្រើប្រាស់ដីធ្លីក្នុងតំបន់ការពារនៃរមណីយដ្ឋានអង្គរ នីតិវិធីនៃការដាក់ពាក្យស្នើសុំជួសជុល និងសាងសង់ផ្ទះក្នុងឧទ្យានអង្គរជាដើម។
បើតាមអាជ្ញាធរជាតិអប្សរាប្រភេទសំណើដែលក្រុមការងារសហគមន៍ចុះពិនិត្យ និងដោះស្រាយរួមមានការជួសជុលផ្ទះ ការជួសជុល ឬប្តូរដំបូល ប្តូរជញ្ជាំង ប្តូរសសរ ប្តូរសំយាប ជួសជុលជណ្តើរ ជួសជុលរបងផ្ទះ បន្ទប់ក្រោមផ្ទះ។ ក្រៅពីនេះមានសំណង់តូចតាចដែលបានសាងសង់រួមមាន បង្គន់ ទ្រុងមាន់ ទា ជ្រូក ជង្រុកស្រូវ តូប ឬរោងលក់ដូរនៅមុខផ្ទះ និងការចាក់ដីលុបជង្ហុកក្នុងបរិវេណក្រោមផ្ទះជាដើម។ រីឯរាល់ការស្នើសុំច្បាប់សាងសង់គឺពុំតម្រូវឲ្យមានការបង់ប្រាក់ឡើយ៕
