.jpg)
មន្ត្រីក្នុងពេលចុះពិនិត្យផ្ទះសង់ក្នុងតំបន់អប្សរា។ រូបថត អាជ្ញាធរអប្សរា
សៀមរាបៈ អាជ្ញាធរជាតិអប្សរាក្នុងរយៈពេល ៩ ខែឆ្នាំនេះបានអនុញ្ញាតឲ្យពលរដ្ឋនៅក្នុងតំបន់អប្សរាជួសជុលផ្ទះ និងសង់សំណង់តូចតាចបានចំនួន ៨៧៩ ករណី ក្នុងចំណោមសំណើទាំងអស់ចំនួន ១ ៧៤៦ ករណី។ នេះបើតាមរបាយការណ៍របស់អាជ្ញាធរជាតិអប្សរាដែលបានចេញផ្សាយកាលពីម្សិលមិញ។
តាមរបាយការណ៍នេះក្នុងរយៈពេល ៩ ខែអាជ្ញាធរជាតិអប្សរាបានអនុញ្ញាតឲ្យដល់ពលរដ្ឋនៅស្រុកប្រាសាទបាគងចំនួន ១០៦ ករណី ស្រុកអង្គរធំចំនួន ១១៥ ករណី ស្រុកពួកចំនួន ១៨៥ ករណី ស្រុកបន្ទាយស្រីចំនួន ១៦៧ ករណីនិងក្រុងសៀមរាបចំនួន ៣០៦ ករណី។
លោក អឿន សំអុន ប្រធានលេខាធិការដ្ឋានសហគមន៍នៃអាជ្ញាធរអប្សរាបានឲ្យដឹងថា ៩ ខែនេះមានពលរដ្ឋដាក់ពាក្យស្នើសុំជួសជុលកែលម្អផ្ទះចំនួន ១៧៤៦ ករណីក្នុងនោះក្រុមការងារបានអនុញ្ញាតឲ្យចំនួន ៨៧៩ ករណីដែលស្របទៅតាមលក្ខខណ្ឌនៃការអភិរក្ស។
លោកថា៖ «ការអនុញ្ញាតនេះគឺផ្អែកលើគោលការណ៍គ្រប់គ្រងលំនៅឋានស្របតាមលក្ខខណ្ឌនៃកិច្ចអភិរក្សតំបន់រមណីយដ្ឋានបេតិកភណ្ឌពិភពលោក»។
លោក អឿន សំអុន បានបញ្ជាក់ថាក្នុងករណីពលរដ្ឋមានតម្រូវការកែលម្អគេហដ្ឋានរបស់ខ្លួនអាចទាក់ទងមន្ដ្រីមូលដ្ឋានដើម្បីឲ្យមន្ដ្រីយកពាក្យស្នើសុំនោះ មកលេខាធិការដ្ឋានសហគមន៍អាជ្ញាធរជាតិអប្សរា។
លោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរាបានថ្លែងថា ក្រុមការងារអាជ្ញាធរជាតិអប្សរាក៏ជួបការលំបាកមួយចំនួនផងដែរ ចំពោះការអនុញ្ញាតឲ្យពលរដ្ឋជួសជួល និងសាងសង់ផ្ទះនៅក្នុងតំបន់អប្សរានេះ ព្រោះពលរដ្ឋខ្លះមិនគោរពតាមបទដ្ឋានច្បាប់ដែលបានកំណត់។
លោកថា៖ «ពលរដ្ឋមួយចំនួនបានសហការល្អជាមួយអាជ្ញាធរមូលដ្ឋាន និងអាជ្ញាធរអប្សរាដោយពួកគាត់បានទៅដាក់ពាក្យស្នើសុំការអនុញ្ញាតត្រឹមត្រូវ និងបានគោរពតាមបទដ្ឋានច្បាប់ដែលបានកំណត់។ ប៉ុន្ដែក៏មានពលរដ្ឋមួយចំនួនទៀតមិនបានស្នើសុំការអនុញ្ញាតឲ្យបានត្រឹមត្រូវ ហើយនាំគ្នាសាងសង់ និងកែលម្អផ្ទះ ឬសំណង់ដោយបំពានខុសនឹងបទដ្ឋានច្បាប់ដែលបានកំណត់ និងលួចសាងសង់សំណង់ពេលយប់ក៏មាន»។
លោក កុសល បានឲ្យដឹងថាមានពលរដ្ឋមួយចំនួនបានសមគំនិតគ្នាលួចលក់ដីធ្លី និងកាប់ទន្ទ្រានព្រៃអភិរក្សក្នុងតំបន់ថែរក្សាផងដែរ ខណៈដីនៅតំបន់អង្គរក្រោមការគ្រប់គ្រងរបស់អាជ្ញាធរអប្សរាគឺមិនត្រូវបានអនុញ្ញាតឲ្យមានការទិញលក់នោះទេ។
លោកថា៖ «ជារៀងរាល់ថ្ងៃក្រុមការងារអាជ្ញាធរអប្សរាបានចុះបង្ក្រាបសំណង់ខុសច្បាប់បានច្រើនណាស់។ ដូចជាចំនួនដែលស្នើសុំសាងសង់ខាងលើអ៊ីចឹងមានចំនួនជិត ២០០០ ករណីដែលបានស្នើសុំជួសជួល និងកែលម្អ ប៉ុន្ដែយើងអនុញ្ញាតបានតែជិត ១០០០ ករណី ក៏ព្រោះតែពលរដ្ឋមួយចំនួនបានដាក់លិខិតស្នើសុំដោយមិនត្រឹមត្រូវ និងមិនមែនជាពលរដ្ឋរស់នៅជាក់ស្ដែង»៕
