សៀមរាបៈ អាជ្ញាធរអប្សរាកំពុងសិក្សាពីអត្ថប្រយោជន៍និងផលប៉ះពាល់ជុំវិញសំណើរបស់ក្រសួងប្រៃសណីយ៍និងទូរគមនាគមន៍ដែលសុំបំពាក់អុីនធឺណិតអត់ខ្សែនិងមិនគិតថ្លៃដើម្បីឲ្យភ្ញៀវទេសចរប្រើប្រាស់នៅតំបន់អង្គរ។ នេះបើតាមលោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរអប្សរា។
កាលពីចុងខែមករាឆ្នាំនេះ លោក ត្រាំ អុីវតឹក រដ្ឋមន្ដ្រីក្រសួងប្រៃសណីយ៍ និងទូរគមនាគមន៍បានចូលរួមក្នុងកិច្ចប្រជុំនៅរមណីយដ្ឋានអង្គរខេត្តសៀមរាបដើម្បីពិភាក្សាអំពីគម្រោងបំពាក់ប្រព័ន្ធអុីនធឺណិតគ្មានខ្សែបច្ចេកវិទ្យាជំនាន់ទី ៥ (5G WiFi) នេះ ក្នុងបំណងបម្រើសេវាអុីនធឺណិតល្បឿនលឿន និងសេវាកម្ម Online ផ្សេងទៀតជូនភ្ញៀវទេសចរជាតិ និងអន្តរជាតិក្នុងតំបន់រមណីយដ្ឋានអង្គរ ខណៈក្រសួងរបស់លោកស្នើទៅអាជ្ញាធរអប្សរាឲ្យពិចារណ។
លោក ឡុង កុសល បានបញ្ជាក់កាលពីម្សិលមិញថា អាជ្ញាធរអប្សរាបានទទួលសំណើនេះហើយ ប៉ុន្តែការសម្រេចយ៉ាងណានោះនៅមិនទាន់ដឹងនៅឡើយទេ។
លោកថ្លែងថា៖ «យើងទទួលបានការស្នើគម្រោងនេះឡើងមកហើយ។ អ្វីដែលអាជ្ញាធរអប្សរាបានជម្រាបទៅគាត់វិញបន្ទាប់ពីកិច្ចប្រជុំថ្នាក់ដឹកនាំរបស់អាជ្ញាធរអប្សរា យើងកំពុងពិនិត្យ ពិចារណាទៅលើសំណើហ្នឹង»។ «យើងពិនិត្យទៅលើភាពវិជ្ជមាន និងភាពអវិជ្ជមានចំពោះសំណើហ្នឹង។ ក្នុងពេលនេះ ខ្ញុំមិនអាចមានយោបល់អីច្រើនទៅលើរឿងហ្នឹងទេ។ យើងនឹងផ្ដល់ព័ត៌មានចុងក្រោយនៅពេលមានការសម្រេចពីថ្នាក់ដឹកនាំ»។
យ៉ាងណាក្ដី បើតាមលោក កុសល សំណើរបស់ក្រសួងប្រៃសណីយ៍នេះ ទាក់ទងនឹងគម្រោងបំពាក់អុីនធឺណិតប្រើប្រាស់ដោយសេរីមិនគិតថ្លៃនៅក្នុងតំបន់អង្គរ ដែលជាបច្ចេកទេសចុងក្រោយ។
លោកបានបញ្ជាក់ថា៖ «សំណើរបស់ក្រសួងនេះគឺជាការបំពាក់នូវប្រព័ន្ធអុីនធឺណិតកម្រិតទី ៥ ចុងក្រោយ (5G WiFi) ដែលជាលក្ខណៈប្រព័ន្ធអុីនធឺណិតមិនប្រើខ្សែដែលនឹងភ្ជាប់ទៅតាមបង្គោលអង់តែនសេវាមានស្រាប់ក្នុងតំបន់នោះ»។
អ្នកនាំពាក្យក្រសួងប្រៃសណីយ៍ និងទូរគមនាគមន៍ លោក មាស ប៉ូ និងលោក ខូវ មករា មិនអាចសុំការអត្ថាធិប្បាយបានទេ កាលពីម្សិលមិញ ដោយសារទូរស័ព្ទរបស់លោកទាំង ២ មិនមានអ្នកទទួល។ ប៉ុន្តែបើតាមគេហទំព័រក្រសួងប្រៃសណ៍យ៍ និងទូរគមនាគមន៍ លោករដ្ឋមន្រ្ដី ត្រាំ អុីវតឹក បានលើកឡើងថា គម្រោងប្រព័ន្ធអុីនធឺណិតឥតខ្សែបច្ចេកវិទ្យាជំនាន់ទី ៥ (5G WiFi) នេះ គឺជាផ្នែកមួយនៃការពង្រឹង និងពង្រីកហេដ្ឋារចនាសម្ព័ន្ធជាតិដើម្បីជំរុញការផ្ដល់សេវារបស់រាជរដ្ឋាភិបាលកម្ពុជាតាមប្រព័ន្ធឌីជីថល ពាណិជ្ជកម្មឌីជីថលនិងសេដ្ឋកិច្ចឌីជីថលដែលនឹងចូលរួមចំណែកលើកស្ទួយជីវភាពរស់នៅរបស់ពលរដ្ឋឲ្យកាន់តែប្រសើរឡើង និងឈានទៅសម្រេចបានជាប្រទេសមានចំណូលមធ្យមកម្រិតខ្ពស់នៅឆ្នាំ ២០៣០។
នៅក្នុងជំនួបជាមួយតំណាងប្រធានក្រុមហ៊ុន HyalRoute Group ជាក្រុមហ៊ុនមេរបស់ក្រុមហ៊ុន Cambodia Fiber Optic Communication NetworkCo.,Ltd (CFOCN) ដែលជាក្រុមហ៊ុនអូសបណ្ដាញខ្សែកាប្លិ៍អុបទិកដ៏ធំ ១ នៅកម្ពុជា កាលពីចុងខែមករាថ្មីៗនេះ លោក ត្រាំ អុីវតឹក ក៏ធ្លាប់បានថ្លែងដែរថា រាជរដ្ឋាភិបាលកម្ពុជាបានកំណត់យ៉ាងច្បាស់ នូវគោលនយោបាយ ដើម្បីជំរុញការអភិវឌ្ឍ ពាណិជ្ជកម្មអេឡិចត្រូនិក និងបច្ចេកវិទ្យាគមនាគមន៍និងព័ត៌មាន។
លោកបន្ដថា៖ «យើងត្រូវគិតគូរដល់អ្នកប្រើប្រាស់នៅតាមជនបទដែលនៅមិនទាន់មានលទ្ធភាពក្នុងការទទួលបានសេវាឌីជីថល»។
ទាក់ទងនឹងការបំពាក់ប្រព័ន្ធអុីនធឺណិតដោយឥតគិតថ្លៃនៅតំបន់អង្គរនេះ លោក តុប សុភ័ក អ្នកនាំពាក្យក្រសួងទេសចរណ៍បានលើកឡើងកាលពីម្សិលមិញថា នេះជាការល្អប្រសើរសម្រាប់ភ្ញៀវទេសចរជាតិ និងអន្ដរជាតិដែលជាផ្នែកមួយដើម្បីចូលរួមផ្សព្វផ្សាយពីតំបន់ទេសចរណ៍នៅកម្ពុជាឲ្យរឹតតែលឿនជាងមុន។
លោកថា៖ «ភ្ញៀវទេសចរពេលគេមកលេងកម្សាន្ដពេលគេថតរូបហើយគេត្រូវការចែកចាយបន្ដឬក៏ពួកគាត់អាច (Live) វីដេអូផ្ទាល់នៅលើបណ្ដាញសង្គមអីទៅប្រាប់មិត្ដភក្ដិក្រុមគ្រួសារគេពេលគេបានមកដល់អង្គរវត្ដរបស់កម្ពុជាអីជាដើម»។ កិច្ចការនេះធ្លាប់មានការសិក្សាមកយូរហើយ ប៉ុន្ដែចំពោះការរៀបចំយ៉ាងណាជាជំនាញរបស់អាជ្ញាធរអប្សរា»៕