.jpg)
បដិមាព្រះសិរព្រះពោធិសត្វលោកេសូរដែលទើបប្រទះឃើញ។ រូបថត អាជ្ញាធរអប្សរា
សៀមរាបៈ បដិមាព្រះសិរព្រះពោធិសត្វលោកេសូរ ឬលោកេស្វរៈចំនួន ១ ធ្វើពីថ្មភក់ត្រូវបានប្រទះឃើញ ខណៈអ្នកជំនាញអាជ្ញាធរជាតិអប្សរាធ្វើកំណាយនៅក្នុងខ្លោងទ្វារចូលខាងកើតប្រាសាទតានៃជ្រុងនិរតី ដើម្បីរកថ្មដំបូលដែលធ្លាក់ចុះកប់ក្នុងគំនរថ្ម និងដីដំបូកយកមកជួសជុលប្រាសាទកាលពីព្រឹកថ្ងៃទី ៨ ខែតុលាកន្លងមកនេះ។
លោក ស៊ា សុភារុន ប្រធានគម្រោងជួសជុលប្រាសាទតានៃ និងជាបុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការឱ្យដឹងថា បដិមាព្រះសិរលោកេស្វរៈដែលក្រុមការងារជួសជុលខ្លោងទ្វារចូលខាងកើតប្រាសាទតានៃប្រទះឃើញគឺមានត្រឹមតែព្រះសិរប៉ុណ្ណោះ ប៉ុន្ដែព្រះសិរនេះមានរូបព្រះពុទ្ធនៅលើផ្នួងសក់ មានត្រចៀកខាងស្តាំ តែគ្មានខាងឆ្វេង ច្រមុះឆែប ព្រះភ័ក្ត្រម្ខាងខ្សុះរបកសាច់ថ្ម។
លោកថ្លែងថា៖ «សភាពខូចខាតទាំងនេះជាបឋមមិនដឹងថាមកពីមូលហេតុអ្វីប្រាកដទេ តែអាចជាការប៉ះទង្គិចអ្វីមួយធ្វើឱ្យបែក ឬគុណភាពថ្មនៅលើថ្ពាល់ម្ខាងមិនសូវល្អ ទើបធ្វើឱ្យស្រទាប់ថ្មរបកចេញពីថ្ពាល់។ ម្យ៉ាងវិញទៀតចម្លាក់មួយនេះ ក៏ប្រហែលមិនស្ថិតនៅទីតាំងនេះដែរកាលដើមឡើយ ព្រោះមិនមានភ័ស្តុតាងណាមួយបញ្ជាក់ថាមានដងខ្លួននៅកន្លែងនេះដូចគ្នា»។
លោក ឈូក សុម៉ាឡា មន្ត្រីទទួលបន្ទុកចុះបញ្ជីសារពើភណ្ឌបុរាណវត្ថុនៃនាយកដ្ឋានអភិរក្សប្រាសាទក្នុងឧទ្យានអង្គរនៃអាជ្ញាធរជាតិអប្សរា បានឱ្យដឹងថា ព្រះសិរនេះធ្វើពីថ្មភក់មានកម្ពស់ ៥៤ ស.ម ទទឹង ២៧ ស.ម និងកម្រាស់ ៣៦ ស.ម។
លោក សុម៉ាឡា បានបញ្ជាក់ថា៖ «ព្រះសិរព្រះពោធិសត្វលោកេសូរ ជាបដិមាស្ថិតក្នុងរចនាប័ទ្មបាយ័ន នាអំឡុង ចុង ស.វ.ទី ១២ និង ដើម ស.វ.ទី ១៣ ក្នុងរាជព្រះបាទជ័យវរ្ម័នទី ៧»។
លោក សុម៉ាឡា ឲ្យដឹងទៀតថា លោកេសូ ឬលោកេស្វរៈ គឺជាព្រះពោធិសត្វក្នុងពុទ្ធសាសនាមហាយានដែលមានករុណាធម៌កំពូលក្នុងការជួយសង្គ្រោះមនុស្សលោក។ ក្នុងសិល្បៈខ្មែរគេតែងឃើញចម្លាក់ប្រភេទនេះមានព្រះហស្ថ ២,៤ ឬ ៨ ដោយមានកាន់កេតនភណ្ឌ ដូចជាខ្សែផ្គាំ គម្ពីរ ផ្កាឈូក និងថូ ព្រមទាំងឆ្លាក់រូបព្រះពោធិសត្វ អមិតាភៈ អង្គុយភាវនានៅផ្នួងសក់ ដូចគ្នានឹងបដិមាប្រាជ្ញាបារមិតាដែរ។
លោក ឡុង កុសល ប្រធាននាយកដ្ឋានផ្សព្វផ្សាយនៃអាជ្ញាធរជាតិអប្សរាបន្ថែមថា ព្រះសិរព្រះពោធិសត្វលោកេសូរ ឬលោកេស្វរៈ បច្ចុប្បន្នត្រូវបានក្រុមការងារជំនាញបានយកមករក្សាទុកនៅអាជ្ញាធរជាតិអប្សរាបណ្តោះអាសន្ន ដើម្បីធ្វើការចុះបញ្ជី និងថតរូបទុកជាឯកសារព្រមទាំងរៀបចំបែបបទស្នើយកទៅរក្សាទុកនៅអភិរក្សដ្ឋានអង្គរ។
លោកថ្លែងថា៖ «ក្រោយពេលយើងយកព្រះសិរនេះទៅសម្អាតឲ្យបានស្អាតចប់រួចរាល់ យើងនឹងសិក្សាបន្ថែមទៀត ទើបយើងយកទៅដាក់តាំងបង្ហាញនៅថ្ងៃអនាគត»។
លោក កុសល បានឲ្យដឹងថា ក្រុមការងារអាជ្ញាធរអប្សរាតែងតែស្រាវជ្រាវរកឃើញវត្ថុបុរាណ និងបដិមាជាបន្ដបន្ទាប់នៅក្នុងតំបន់អង្គរ។ ប៉ុន្ដែលោកមិនទាន់អាចបង្ហាញទិន្នន័យសរុបនៃការរកឃើញនេះទេ៕
