តាកែវៈ អាជ្ញាធរស្រុកបាទី កាលពីថ្ងៃទី ២៩ ខែ មេសា បានអំពាវនាវដល់ប្រជាពលរដ្ឋដែលទៅលេងនៅល្អាងភ្នំចំបាប់ ក្នុងភូមិតានប់ ឃុំត្នោត កុំឱ្យចុះមុជទឹកល្អាង បន្ទាប់ពីរក ឃើញថា ដីនៅមាត់ល្អាងមានស្នាមប្រេះ និងសង្ស័យទឹកល្អាងនោះ អាចធ្វើឲ្យប៉ះពាល់ដល់សុខភាព។
លោក ភួន ឈីម អភិបាលស្រុកបាទី បានប្រាប់ភ្នំពេញប៉ុស្តិ៍កាលពីថ្ងៃអង្គារថា បន្ទាប់ពីការិយាល័យប្រតិបត្តិស្រុកបាទី ចុះពិនិត្យល្អាងភ្នំនោះ គឺឃើញមានកត្តាខាងក្រៅមានដីប្រេះជាផ្ទាំងធំ ហើយមួយទៀតបន្ទាប់ពីពិនិត្យលើក្មេងដែលលេងទឹករួចហើយ ដូចឃើញមានចេញកន្ទាលត្រអាក ប៉ុន្តែមិនទាន់អាចកំណត់អត្តសញ្ញាណ ឬសន្និដ្ឋានបាននៅឡើយទេថា រមាស់លើស្បែករបស់ក្មេងនោះ បណ្តាលមកពីទឹកនោះ ឬមួយយ៉ាងណា?
លោកបញ្ជាក់ថា៖ «ប៉ុន្តែគ្រាន់តែជាការអំពាវនាវរបស់អាជ្ញាធរ គឺកុំឱ្យបងប្អូនទៅលេងទឹកហ្នឹងអី ខ្លាចវាមានបញ្ហាដីបាក់លើ ដូចការលង់ទឹកអ៊ីចឹងទៅ។ អាហ្នឹងមានផលវិបាក។ អ៊ីចឹងផលប៉ះពាល់នៃគុណភាពទឹកយ៉ាងម៉េចៗ ប៉ះពាល់អីយ៉ាងម៉េច គឺខាងក្រុមការងារត្រឹមកម្រិតស្រុកគឺអត់មានសមត្ថភាព និងលទ្ធភាពពិនិត្យផលប៉ះពាល់»។
លោក ភួន ឈីម មិនបានដឹងថា តើកត្តាខាងក្នុងនៃល្អាងភ្នំមួយនេះមានអ្វីនោះទេ ដោយរង់ចាំក្រុមជំនាញថ្នាក់ខេត្តមកជួយអង្កេតថែមទៀត។ លោកបន្តថា កន្លែងទឹកដក់នោះមិនមែនជាល្អាងបុរាណទេ។ វាគឺជា រណ្តៅដែលការដ្ឋានវាយថ្មពីមុនមកបានជីកជ្រៅ ហើយមានទឹកភ្លៀងហូរចូលមកហើយធ្វើឱ្យដូចជា ទឹកត្រពាំង និងទឹកស្រះ។ បើមើលពីខាងក្រៅ ទេសភាពភ្នំល្អាងនោះ ហាក់ដូចជាស្អាត ហើយទឹកដែលហូរចេញពីថ្មមានពណ៌ដូចទឹកសមុទ្រ។
លោកបញ្ជាក់ថា៖ «ដល់ឃើញកន្លែងរាងស្អាតអ៊ីចឹងទៅ ប្រជាពលរដ្ឋមុនដំបូងគាត់ទៅថតផុស (Post) មើលម្នាក់ ២ នាក់ លាងដៃលាងជើងងូតអីម្នាក់ ២ នាក់ទេ។ ដល់ពេលក្រុមបណ្តាញសង្គម (Facebook) គាត់ចាប់អារម្មណ៍ទៅ មនុស្សទៅលេងច្រើនទៅ»។
បើតាមលោក ឈីម ល្អាងភ្នំចំបាប់នេះ ទើបតែកើតមានថ្មីៗនេះទេ គឺនៅប្រហែលជាក្នុងអំឡុងឆ្នាំ ២០១៨ បន្ទាប់ពីរដ្ឋាភិបាលបានលុបអាជ្ញាប័ណ្ណរបស់ក្រុមហ៊ុនវាយថ្ម ហើយពីមុនមនុស្សមិនដែលទៅលេងនៅកន្លែងនោះទេ។
លោក ឈីម មិនទាន់បានដឹងច្បាស់ទេថា តើទឹកនៅក្នុងល្អាងភ្នំចំបាប់នេះ មានផ្ទុកសារជាតិគីមីឬមួយយ៉ាងណានោះទេ តែលោកគ្រាន់តែដឹងថា អតីតការដ្ឋានវាយថ្មនេះកាលពីមុនមក គឺមានការដាក់រំសេវបំផ្ទុះថ្ម។
លោក ភួន ឈីម បញ្ជាក់ថា៖ «ព្រោះអីយើងបានដឹងបានឃើញទាំងអស់គ្នាហើយឱ្យគាត់មានការប្រុងប្រយ័ត្នហើយផលប៉ះពាល់ពីទឹកហ្នឹង គឺយើងអត់ទាន់បានដឹងនៅឡើយទេ។ ប៉ុន្តែកត្តាខាងក្រៅ យើងមើលឃើញមានដីរាងប្រេះ ដែលអាចធ្លាក់ដុំថ្មអី ធ្លាក់ដុំថ្មប៉ុនកដៃកជើង ១ ដុំ ២ ដុំអី វាអាចគ្រោះថ្នាក់ធំ»៕