ព្រះសីហនុៈ រដ្ឋបាលខេត្តព្រះសីហនុនៅថ្ងៃអង្គារម្សិលមិញនេះបានអំពាវនាវជាថ្មីម្ដងទៀតដល់ប្រជានេសាទសមុទ្រក៏ដូចជាអ្នកប្រកបរបរទូកទេសចរណ៍កម្សាន្តតាមប្រជុំកោះនានានៃខេត្តជាប់មាត់សមុទ្រមួយនេះឲ្យបង្កើនការប្រុងប្រយ័ត្នខ្ពស់ចំពោះបញ្ហាអាកាសធាតុ ដែលអាចនាំមកនូវខ្យល់កន្ត្រាក់ និងរលកសមុទ្រធំៗដែលអាចបោកពន្លិចទូកបាន។
សេចក្ដីអំពាវនាវនេះបានធ្វើឡើងបន្ទាប់ពីមានករណីទូកនេសាទ ២ គ្រឿង ត្រូវបានខ្យល់កន្ត្រាក់ និងរលកសមុទ្របោកពន្លិចឲ្យជាប់កឿងលើថ្មនៅក្បែរកោះថាសកាលពីរសៀលថ្ងៃទី ២៩ ខែ មិថុនា ឆ្នាំ ២០២០។ ប៉ុន្តែសំណាងល្អ ប្រជានេសាទ ៥ នាក់ដែលនៅលើទូកនេសាទទាំង ២ នោះត្រូវបានក្រុមនាវិករបស់លោក ទៀ វិចិត្រ ប្រធានសមាគមទូកទេសចរណ៍ខេត្តព្រះសីហនុ ចុះជួយអន្តរាគមន៍សង្គ្រោះទាន់ពេល។
អ្នកនាំពាក្យរដ្ឋបាលខេត្តព្រះសីហនុលោក ឃាង ភារម្យ បានប្រាប់ភ្នំពេញប៉ុស្តិ៍កាលថ្ងៃអង្គារថា បច្ចុប្បន្នលម្ហផ្ទៃសមុទ្រខេត្តព្រះសីហនុមានរលកធំៗ ដែលមានកម្ពស់ចន្លោះពី ១,៥ ម៉ែត្រដល់ ២ ម៉ែត្រ និងមានខ្យល់កន្ត្រាក់កើតឡើងដោយកន្លែង។ ដើម្បីចៀសវាងគ្រោះថ្នាក់កើតឡើងជាយថាហេតុ នោះប្រជានេសាទសមុទ្រក៏ដូចជាអ្នកប្រកបរបរទូកទេសចរណ៍ដឹកអ្នកដំណើរកម្សាន្តតាមតំបន់ប្រជុំកោះនានាក្នុងខេត្តព្រះសីហនុ ពិសេសប្រជុំកោះរ៉ុង និង កោះរ៉ុងសន្លឹម គប្បីបង្កើនការប្រុងប្រយ័ត្នបន្ថែមទៀតចំពោះបញ្ហាអាកាសធាតុ ខ្យល់កន្ត្រាក់ និងរលកសមុទ្រនេះ។
លោកបានថ្លែងថា៖ «ករណីទូកនេសាទ ២ គ្រឿងដែលត្រូវបានខ្យល់កន្ត្រាក់ និងរលកសមុទ្របោកពន្លិចនៅក្បែរកោះថាសកាលពីល្ងាចថ្ងៃចន្ទនោះប្រសិនបើគ្មានការជួយអន្តរាគមន៍ពីលោកឧកញ៉ា ទៀ វិចិត្រ ប្រធានសមាគមទូកទេសចរណ៍ខេត្តព្រះសីហនុបញ្ជូនក្រុមនាវិក និងអូប័រល្បឿនលឿនទៅជួយសង្គ្រោះទាន់ពេលទេនោះមនុស្ស ៥ នាក់នៅលើទូកនេសាទទាំង ២ នោះ នឹងត្រូវស្លាប់ដោយសារតែរលកសមុទ្រជាមិនខាន»។
ជុំវិញករណីនេះលោក ទៀ វិចិត្រ បានថ្លែងប្រាប់ភ្នំពេញ-ប៉ុស្តិ៍កាលពីថ្ងៃអង្គារថា ក្នុងកិច្ចអន្តរាគមន៍នោះ ក្រុមកងនាវិករបស់លោកបានចំណាយពេលប្រមាណជា ២ ម៉ោងទើបអាចជួយសង្គ្រោះប្រជានេសាទទាំង ៥ នាក់ពីទូកនេសាទដែលលិចកឿងជាប់លើថ្មក្បែរកោះថាសនោះបាន។
លោកបានបញ្ជាក់ថា៖ «ដោយសារខ្យល់ និងរលកសមុទ្របក់បោកខ្លាំងពេក ការជួយសង្គ្រោះជួបការលំបាក និងប្រើប្រាស់រយៈពេលយូរ។ ទោះយ៉ាងណាជនរងគ្រោះទាំង ៥ នាក់ ត្រូវបានក្រុមសង្គ្រោះរបស់យើង ជួយសង្គ្រោះពីសមុទ្រ និងបាននាំមកដល់កន្លែងសុវត្ថិភាពតាំងពីល្ងាចថ្ងៃចន្ទនោះម្ល៉េះ»។
ដោយឡែកនៅឯខេត្តកំពត អាជ្ញាធរមូលដ្ឋានបានរាយការណ៍ថា មានផ្ទះប្រជាពលរដ្ឋចំនួន ៣០ ខ្នង ស្ថិតក្នុងភូមិត្រពាំងរពៅ ឃុំព្រែកត្នោត ស្រុកទឹកឈូបានរងការខូចខាតយ៉ាងដំណំ បន្ទាប់ពីមានករណីភ្លៀងលាយឡំខ្យល់កន្ត្រាក់បក់បោកខ្លាំងកាលពីរសៀលថ្ងៃទី ២៩ ខែ មិថុនា ឆ្នាំ ២០២០។
លោក គង់ ប៊ុនរា មេឃុំព្រែកត្នោតបានប្រាប់ភ្នំពេញប៉ុស្តិ៍ថា៖ «ផ្ទះប្រជាពលរដ្ឋ ៣០ ខ្នងក្នុងភូមិត្រពាំងរពៅ ឃុំព្រែកត្នោតបានរងការខូចខាតយ៉ាងដំណំ ក្នុងនោះផ្ទះប្រជាពលរដ្ឋ ៦ ខ្នងបានដួលរលំរាបដល់ដី។ ប៉ុន្តែមិនមានពលរដ្ឋណាម្នាក់រងរបួស ឬស្លាប់នោះទេ»។
ជុំវិញបញ្ហាអាកាសធាតុនេះដែរ ក្រសួងធនធានទឹក និងឧតុនិយមនៅព្រឹកថ្ងៃទី ៣០ ខែ មិថុនា ឆ្នាំ ២០២០ បានប្រកាសថា ចាប់ពីថ្ងៃទី ១-៧ ខែ កក្កដា ឆ្នាំ ២០២០ ខាងមុខនឹងមានភ្លៀងធ្លាក់ខ្លាំងក្នុងក្របខ័ណ្ឌទូទាំងប្រទេស ពិសេសក្នុងតំបន់មាត់សមុទ្រ។ ជាមួយគ្នានេះក្រសួងក៏បានអំពាវនាវដល់សាធារណជន ជាពិសេសអ្នកដំណើរសមុទ្រ និងប្រជានេសាទត្រូវបង្កើនការប្រុងប្រយ័ត្នចំពោះរលកសមុទ្រខ្ពស់ និង បង្កើនការប្រុងប្រយ័ត្នចំពោះបាតុភូតផ្គរ រន្ទះ និងខ្យល់កន្ត្រាក់ដែលនឹងអាចកើតមានជាយថាហេតុ៕