The Phnom Penh Post Search

Search form

Logo of Phnom Penh Post newspaper Phnom Penh Post - អាជ្ញាធរ​បញ្ចប់​ការ​ស្រង់​ស្ថិតិ​ពលរដ្ឋ​មាន​ជម្លោះ​ដី​នៅ​បឹងកក់

អាជ្ញាធរ​បញ្ចប់​ការ​ស្រង់​ស្ថិតិ​ពលរដ្ឋ​មាន​ជម្លោះ​ដី​នៅ​បឹងកក់

អាជ្ញាធរ​បញ្ចប់​ការ​ស្រង់​ស្ថិតិ​ពលរដ្ឋ​មាន​ជម្លោះ​ដី​នៅ​បឹងកក់

130610_07
អ្នកស្រី ង៉ែត ឃុន នៅពេលតវ៉ានៅខាងមុខសាលាឧទ្ធរណ៍ កាលពីពេលកន្លងមក Ruth Keber

ភ្នំពេញៈ ការ​ចុះ​ស្រង់​ស្ថិតិ​សាលាកបត្រ​ប្រជា​ពលរដ្ឋ​ក្នុង​សហគមន៍​បឹងកក់​ដោយ​សាលា​រាជធានី​ដើម្បី​ឈាន​ទៅ​រក​ដំណោះ​ស្រាយ​បញ្ចប់​ជម្លោះ​ដី​ធ្លី​ដ៏​រ៉ាំ​រ៉ៃ និង​តែង​តែ​កើត​មាន​អំពើ​ហិង្សា រវាង​បាតុករ​និង​ក្រុម​សមត្ថកិច្ច​នោះ​បាន​រួច​រាល់​ហើយ​កាល​ពី​ថ្ងៃ​សុក្រ។

ប្រជា​ពលរដ្ឋ ដែល​នៅ​មិន​ទាន់​ទទួល​បាន​ដំណោះ​ស្រាយ​ក្រោយ​ពី​អនុក្រត្យ​លេខ ១៨៣ ឬ អ្នក​ដែល​ត្រូវ​បាន​កាត់​ចេញ​ពី​គម្រោង​ទទួល​បាន​ប្លង់​កម្មសិទ្ធិ​ដី​ធ្លី ពី​ចំណែក​ដី ១២,៤៤ ហិកតា ត្រូវ​បាន​គេ​រក​ឃើញ​មាន​ចំនួន​៧៥ គ្រួសារ។ ប៉ុន្តែ​បើ​តាម​តួលេខ​ដែល​ក្រុម​អ្នក​តវ៉ា ក្នុង​សហគមន៍​នេះ​ធ្លាប់​បាន​អះអាង​មាន​តែ​ចំនួន​៦៣​គ្រួសារ​ប៉ុណ្ណោះ។

តំណាង​សហគមន៍​បឹង​កក់ អ្នក​ស្រី ទេព វន្នី បាន​និយាយ​ថា ចំនួន​តួលេខ ដែល​បាន​រក​ឃើញ​ថ្មី​នេះ ចាំ​បាច់​ត្រូវ​មាន​ការ​ផ្ទៀង​ផ្ទាត់​សា​ជា​ថ្មី​ដើម្បី​រក​ចំណុច​ឯកភាព​រួម​មុន​ពេល​ឈាន​ដល់​ដំណាក់​កាល​ចុង​ក្រោយ​នៃ​ការ​ដោះស្រាយ​បញ្ចប់​ជម្លោះ។

អ្នក​ស្រី​ថ្លែង​ថា​៖«​យើង​ចង់​ឲ្យ​មាន​ការ​បិទ​បញ្ជី​សាលាកបត្រ ដែល​បាន​រក​ឃើញ​ដោយ​ក្រុម​ការងារ​របស់​អាជ្ញាធរ​រាជធានី នៅ​តាម​ភូមិ​នីមួយៗ ដើម្បី​ងាយ​ស្រួល​ឲ្យ​ប្រជា​ពលរដ្ឋ បាន​ធ្វើ​ការ​ផ្ទៀង​ផ្ទាត់​សា​ជា​ថ្មី​ទាំង​អស់​គ្នា​ចៀស​វាង​ការ​ចោទ​ប្រកាន់​ដាក់​គ្នា​អំពី​ករណី​តួលេខ​បំប៉ោង ហើយ​បង្កក​ការ​ដោះស្រាយ​តទៅ​ទៀត​»។ អ្នក​ស្រី​ឲ្យ​ដឹង​ផង​ដែរ​ថា ចំនួន​គ្រួសារ​ដែល​រក​ឃើញ​ថ្មី​នោះ អាច​ថា កន្លង​មក​ពួក​គាត់​មិន​ដែល​បាន​ចូល​រួម​ជាមួយ​សហគមន៍​ទាល់​តែ​សោះ ក្នុង​ការ​តវ៉ា​ទាម​ទារ​ដំណោះ​ស្រាយ​ប្លង់​កម្មសិទ្ធិ​លើ​ចំណែក​ដី ១២,៤៤ ហិកតា​ដែល​រដ្ឋាភិបាល​បាន​កាត់​ចេញ​ពី​ក្រុមហ៊ុន​ទុក​ចែក​ជូន​ពលរដ្ឋ​។

អ្នក​ស្រី​វន្នី​បន្ត​ថា​៖«​ទោះ​ជា​បែប​ណា​ក្ដី យើង​ខ្ញុំ​អំពាវនាវ​សុំ​ឲ្យ​អាជ្ញាធរ​ផ្ដល់​នូវ​ដំណោះ​ស្រាយ​ជូន​ពួក​គាត់ ឲ្យ​បាន​គ្រប់​គ្នា​ក្នុង​ករណី​រក​ឃើញ​ថា​ពួក​គាត់​គឺ​ជា​គ្រួសារ​រងគ្រោះ​ពិត​ប្រាកដ»។

អ្នក​ស្រី​ង៉ែត ឃុន អាយុ ៧២ឆ្នាំ ដែល​ត្រូវ​បាន​គេ​កាត់​ចេញ​ពី​ចំណែក​ដី​១២,៤៤ ហិកតា កាល​ពី ពេល​មុន​នោះ បាន​សម្តែង​ក្ដី​ត្រេកអរ និង​រំពឹង​ថា អាជ្ញាធរ​រាជធានី ដែល​ដឹក​នាំ​ដោយ​លោក ប៉ា សុជាតិ​វង្ស នឹង​ផ្ដល់​ដំណោះ​ស្រាយ​ជូន​ពួក​គាត់​ក្នុង​ពេល​ឆាប់ៗ​នេះ។

អ្នក​ស្រី​ថ្លែង​ថា៖ «ខ្ញុំ​មាន​ជំនឿ​ថា អាជ្ញាធរ​នឹង​ដោះដូរ​ដី​ឲ្យ​ខ្ញុំ​ទៅ​ក្នុង​ដី​១២,៤៤ ហិកតា និង​ផ្ដល់​ប្លង់​កម្មសិទ្ធិ​ឲ្យ​ខ្ញុំ​ប៉ុន្តែ​បើ​មិន​ដោះស្រាយ​ទេ​ហើយ​នៅ​តែ​បន្ត​ពន្យារ​ពេល​ដោយ​យក​លេស​នេះ​យក​លេស​នោះ ខ្ញុំ​នឹង​ចេញ​តវ៉ា​រហូត​ដល់​ស្លាប់»។

លោក ឡុង ឌីម៉ង់ អ្នក​នាំ​ពាក្យ​សាលា​រាជធានី​បាន​ឲ្យ​ដឹង​កាល​ពី​ម្សិលមិញ​ថា ពេល​នេះ​ក្រុម​ការងារ​របស់​សាលា​ក្រុង​កំពុង​ធ្វើ​របាយ​ការណ៍​លម្អិត ស្ដី​ពី​ចំនួន​ស្ថិតិ​សាលាកបត្រ​ប្រជា​ពលរដ្ឋ​ក្នុង​សហគមន៍​បឹងកក់ ដើម្បី​ដាក់​ជូន​លោក​អភិបាល​រាជធានី​សម្រេច​។ លោក​ថ្លែង​ថា៖ «​ជំហាន​បន្ទាប់ យើង​នៅ​មិន​ទាន់​ដឹង​ទេ ប៉ុន្តែ​វា​ពិត​ណាស់​ថា​នឹង​ត្រូវ​មាន​កិច្ច​ប្រជុំ​ពិភាក្សា​ផ្ទៀង​ផ្ទាត់​ទៅ​លើ​តួលេខ​ឲ្យ​បាន​ត្រឹម​ត្រូវ»។

កាល​ពី​ថ្ងៃ​សៅរ៍ លោក​ប៉ា សុជាតិវង្ស បាន​ថ្លែង​នៅ​ក្នុង​ពិធី​សម្ពោធ​ផ្លូវ​មួយ​ខ្សែ​ក្នុង​សង្កាត់​និរោធន៍ ខណ្ឌ​មាន​ជ័យ​ថា បច្ចុប្បន្ន​អាជ្ញាធរ​រាជធានី​កំពុង​យក​ចិត្ត​ទុក​ដាក់​ក្នុង​ការ​ដោះស្រាយ​វិវាទ​ដី​ធ្លី ក្នុង​សហគមន៍​បឹង​កក់ បុរី​កីឡា និង​ថ្ម​គោល។

លោក​ថ្លែង​ថា៖ «យើង​មិន​ដែល​យក​ប្រជាជន​ធ្វើ​ជា​សត្រូវ​របស់​យើង​នោះ​ទេ» បើ​ទោះ​ជា​ប្រជា​ពលរដ្ឋ​បាន​ធ្វើ​ការ​តវ៉ា​ជា​ច្រើន​លើក​ច្រើន​សា ដោយ​រិះគន់​ឥត​សំចៃ ប្រឆាំង​នឹង​អាជ្ញាធរ​យ៉ាង​ណា​ក៏​ដោយ​៕

អត្ថបទគួរចាប់អារម្មណ៍