The Phnom Penh Post Search

Search form




Logo of Phnom Penh Post newspaper Phnom Penh Post - អាជ្ញាធរ​ប្រជុំ​ដោះស្រាយ​ពល​រដ្ឋ​ប៉ះពាល់​គម្រោង​ទីក្រុង​រណប

អាជ្ញាធរ​ប្រជុំ​ដោះស្រាយ​ពល​រដ្ឋ​ប៉ះពាល់​គម្រោង​ទីក្រុង​រណប

អាជ្ញាធរ​ប្រជុំ​ដោះស្រាយ​ពល​រដ្ឋ​ប៉ះពាល់​គម្រោង​ទីក្រុង​រណប

121218_05a
លោកពុង ឃាវសែ ប្រធានក្រុមហ៊ុន OCIC ដែលជាម្ចាស់គម្រោងអភិវឌ្ឍន៍ក្រុងរណបជ្រោយចង្វារ

ភ្នំពេញៈ អាជ្ញាធរ​សាលា​រាជ​ធានី​ភ្នំពេញ​ បាន​បើក​កិច្ច​ប្រជុំ​ពិភាក្សា​កាល​ពី​ព្រឹក​ម្សិល​មិញ ដើម្បី​​ដោះ​ស្រាយ​បញ្ហា​ដី​ធ្លី​របស់​ប្រជា​ពលរដ្ឋ​ចំនួន​៣១​ហិកតា​ ដែល​រង​នូវ​ផល​ប៉ះពាល់ គម្រោង​អភិវឌ្ឍន៍​ទីក្រុង​រណប​តំបន់​ជ្រោយ​ចង្វារ​ក្នុង​ខណ្ឌ​ឫស្សីកែវ។

លោក ចៅ ស៊ី​ដន មន្ត្រី​សង្កាត់​ជ្រោយ​ចង្វារ​ដែល​បាន​ចូល​រួម​នៅ​ក្នុង​កិច្ច​ប្រជុំ​នោះ បាន​ប្រាប់​ភ្នំពេញ ប៉ុស្តិ៍​ថា​នៅ​ក្នុង​កិច្ច​ប្រជុំ​នោះ ក្រៅ​ពី​ពិភាក្សា​លើ​បញ្ហា រៀប​ចំ​ពិធី​បើក​សម្ពោធ​ការ​ដ្ឋាន​សាង​សង់​ផ្សារ​ព្រែក​លៀប​ថ្មី លោក​ឃួង​ ស្រេង អភិបាល​រង​រាជធានី​ភ្នំពេញ បាន​ស្នើ​ឲ្យ​ភាគី​ខាង​ក្រុមហ៊ុន OCIC របស់​លោក​ឧកញ៉ា​ពុង ឃាវសែ ម្ចាស់​គម្រោង​អភិវឌ្ឍន៍​តំបន់​កោះ​ពេជ្រ ដាក់​តារាង​កំណត់​តម្លៃ​ឲ្យ​បាន​ច្បាស់​សម្រាប់​ធ្វើ​ការ​ដោះ​ដូរ​ដី​ ជូន​ប្រជា​ពលរដ្ឋ។ លោក​បាន​ថ្លែង​ថា៖«គម្រោង​នេះ មិន​ប៉ះពាល់​លំនៅ​ដ្ឋាន​ប្រជា​ពលរដ្ឋ​ក្នុង​សង្កាត់​ជ្រោយ​ចង្វារ​ទេ គឺ​ប៉ះពាល់​តែ​លើ​លំ​នៅ​ដ្ឋាន​របស់​ប្រជា​ពលរដ្ឋ​ក្នុង​សង្កាត់​ព្រែក​លៀប និង​ព្រែក​តាសេក​ប៉ុណ្ណោះ»។

ចំណែក​លោក​ ព្រាប​ មុន្នី ចៅ​សង្កាត់​ព្រែក​លៀប បាន​ប្រាប់​ភ្នំពេញ​​ ប៉ុស្តិ៍​កាលពី​ម្សិលមិញ​ថា មក​ដល់​ពេល​នេះ​ក្រុមហ៊ុន​បាន​រៀប​ចំ​គោល​នយោបាយ​ដោះស្រាយ​សំណង​ជូន ប្រជា​ពលរដ្ឋ​ដែល​រង​ផល​ប៉ះពាល់​ដោយ​គម្រោង​នេះ នូវ​ផ្ទះ​ល្វែង​ទំហំ​៤​ម៉ែត្រ​x១២​ម៉ែត្រ និង​តូបលក់​ដូរ​មួយ​នៅ​ក្នុង​ផ្សារ ដែល​ក្រុមហ៊ុន​គ្រោង​នឹង​បើក​សម្ពោធ​ការ​ដ្ឋាន​សាង​សង់​នៅ​ថ្ងៃ​ទី​២០ ខែ​ធ្នូ​ខាង​មុខ​នេះ។

លោក​បាន​បន្ត​ថា នៅ​ក្នុង​ការ​ដោះ ស្រាយ​ផល​ប៉ះពាល់​គម្រោង​ជំហាន​ទី​ពីរ​លើ​ផ្ទៃ​ដី​ទំហំ​១២​ហិកតា​នេះ មាន​ផល​ប៉ះពាល់​លំនៅ​ដ្ឋាន​ប្រជា​ពលរដ្ឋ​ក្នុង​សង្កាត់​របស់​លោក​ចំនួន​បួន​ គ្រួសារ ហើយ​មួយ​គ្រួសារ​ផ្សេង​ទៀត​ស្ថិត​ក្នុង​សង្កាត់​ព្រែក​តាសេក។

លោក ​ថ្លែង​ថា៖«​នៅ​ព្រឹក​ថ្ងៃ​អង្គារ​នេះ ពួកគេ​នឹង​ចូល​រួម​ការ​ចាប់​ឆ្នោត ដើម្បី​បាន​ផ្ទះ​ល្វែង​ ដែល​ទើប​សង់​ថ្មី​ ក្បែរ​មជ្ឈមណ្ឌល​ជំងឺ​សើ​ស្បែក​នោះ​ ជា​ថ្នូរ​នឹង​ការ​ដោះ​ដូរ​ដី​ឲ្យ​ក្រុម​ហ៊ុន»​។ ​

ជា​មួយ​គ្នា​នេះ លោក​អឿ ស៊ី​ផុន ចៅ​សង្កាត់​ព្រែក​តាសេក បាន​ប្រាប់​ឲ្យ​ដឹង​កាលពី​ម្សិល​មិញ​ថា កាល​ពី​ជំហាន​ទី​មួយ​ ប្រជា​ពលរដ្ឋ​ក្នុង​សង្កាត់​របស់​លោក ចំនួន​១១ គ្រួសារ បាន​រង​ផល​ប៉ះពាល់​ទៅ​នឹង​គម្រោង​អភិវឌ្ឍន៍​ទីក្រុង​រណប​តំបន់​ជ្រោយ​ ចង្វារ​មួយ​នេះ​ ហើយ​នៅ​ក្នុង​ជំហាន​ទី​ពីរ​នេះ​មាន​ចំនួន​មួយ​គ្រួសារ។

លោក បាន​បន្ត​ថា ផលប៉ះពាល់​ក្នុង​ជំហាន​ទីមួយ​លើផ្ទៃ​ដី​ចំនួ​ន៤​ហិកតា ហើយ​ក្នុង​ជំហាន​ទី​ពីរ​មាន​ផ្ទៃ​ដី​១២ ហិកតា ដែល​ក្នុង​នោះភាគ​ច្រើន​ស្ថិត​ក្នុង​ទឹក​ដី​សង្កាត់​ព្រែក​លៀប។ លោក​បាន​ថ្លែង​ថា៖ «​កាល​ពី​ជំហាន​ទី​មួយ​នោះ​ប្រជាពលរដ្ឋ​ មិន​ទាន់​ព្រមព្រៀង​ទទួល​យក​ដំណោះ​ស្រាយ​គោលនយោបាយ​នេះ​នៅ​ឡើយ​ទេ ហើយ​សាលា​រាជ​ធានី​កំពុង​បន្ត​ការ​ចរចា​ជា​មួយ​ប្រជាពលរដ្ឋ​លើ​បញ្ហា​នេះ​ ដោយ​សន្តិវិធី»។

តំណាង​ក្រុមហ៊ុន OCIC លោក​ ទូច​ សំណាង​ កាល​ពី​ម្សិល​មិញ បាន​បដិសេធ​ផ្ដល់​ការ​ពន្យល់​ទាក់ទង​ទៅ​នឹង​បញ្ហា​ដំណោះស្រាយ​ផល​ប៉ះ​ពាល់​របស់​គម្រោង​មក​លើ​ប្រជា​ពលរដ្ឋ​ឡើយ ដោយ​លោក​បាន​ជំរុញ​ឲ្យ​បង្វែរ​សំណួរ​ទៅ​សួរ​សាលា​រាជធានី​ភ្នំពេញ។

ឆ្លើយ តប​ទៅ​នឹង​បញ្ហា​ដែល​លើក​ឡើង​នោះ​ដែរ​ លោក​ ឡុង ឌីម៉ង់​ អ្នក​នាំ​ពាក្យ​សាលា​រាជ​ធានី​ភ្នំពេញ​ កាល​ពី​ម្សិលមិញ​ក៏​បាន​បដិ​សេធ​ ផ្ដល់​ការ​អធិប្បាយ​ផង​ដែរ​ជុំវិញ​ការ​លើក​ឡើង​នូវ​បញ្ហា​នេះ ដោយ​លោក​បាន​ប្រាប់​ថា៖​ «ខ្ញុំ​មិន​ទាន់​អាច​ប្រាប់​ឲ្យ​ដឹង​បាន​ទេ​នៅ​ពេល​នេះ»៕

អត្ថបទគួរចាប់អារម្មណ៍