កែបៈ អាជ្ញាធរខេត្តកែប បានដាក់សំណើសុំឲ្យក្រសួងឧស្សាហកម្ម លុបចោលអាជ្ញាប័ណ្ណផ្គត់ផ្គង់ទឹកស្អាត របស់ក្រុមហ៊ុន Wes tern Coastal Development Co. ដែលមិនបានអនុវត្តតាមកិច្ចសន្យារបស់ខ្លួនក្នុងការរៀបចំប្រព័ន្ធ ផ្គត់ផ្គង់ទឹកស្អាត ជូនប្រជាពលរដ្ឋនៅទូទាំងខេត្តកែប។
លោក កែន សត្ថា អភិបាលខេត្តកែប បានប្រាប់ភ្នំពេញ ប៉ុស្តិ៍ឲ្យដឹងថា ក្រុមហ៊ុនវិនិយោគលើការផ្គត់ផ្គង់ទឹកស្អាតខាងលើនេះ ទទួលបានអាជ្ញាប័ណ្ណពីក្រសួងឧស្សាហកម្ម រ៉ែ និងថាមពល ដើម្បីបើកប្រតិបត្តិការរៀបចំកសាងប្រព័ន្ធផ្គត់ផ្គង់ទឹកស្អាតនៅ ទូទាំងខេត្តកែប តាំងពីឆ្នាំ២០០៨។ ប៉ុន្តែ រហូតមកទល់ពេលនេះ ក្រុមហ៊ុននៅតែមិនទាន់បានរៀបចំតភ្ជាប់ខ្សែបណ្ដាញផ្គត់ផ្គង់ ទឹកស្អាតជូនប្រជាពលរដ្ឋនៅឡើយទេ។ មិនតែប៉ុណ្ណោះ ក្រុមហ៊ុននេះ នៅមិនទាន់ដោះស្រាយសំណងគោលនយោបាយជូនប្រជាពលរដ្ឋចំនួន៣១ គ្រួសារ ដែលរងផលប៉ះពាល់ពីគម្រោងនេះនៅឡើយ។
លោកបាន បន្តថា ដោយពិនិត្យឃើញថា ក្រុមហ៊ុន Western Coastal Development គ្មានលទ្ធភាព ក្នុងការរៀបចំរចនាសម្ព័ន្ធផ្គត់ផ្គង់ទឹកស្អាតជូនប្រជាពលរដ្ឋបាន និងដើម្បីកុំឲ្យរាំងស្ទះដល់ដំណើការអភិវឌ្ឍន៍នានាក្នុងខេត្ត នេះ កាលពីថ្ងៃទី៥ ខែវិច្ឆកា ឆ្នាំ២០១២ លោកបានដាក់សំណើមួយតាមរយៈមន្ទីរឧស្សាហកម្ម រ៉ែ និងថាមពលខេត្ត សុំឲ្យក្រសួងឧស្សាហកម្ម លុបចោលឬមោឃភាពអាជ្ញាប័ណ្ណផ្គត់ផ្គង់ទឹកស្អាតរបស់ក្រុមហ៊ុន ដើម្បីបើកឱកាសឲ្យក្រុមហ៊ុនផ្សេងទៀតចូលមកសហការវិនិយោគលើ វិស័យនេះជាបន្ត។
លោកថ្លែងថា៖«កង្វះរចនាសម្ព័ន្ធទឹកស្អាត បានជះឥទ្ធិពលជាអវិជ្ជមានដល់ដំណើរការអភិវឌ្ឍគម្រោងវិនិយោគធំៗជាច្រើនផ្សេងទៀតរបស់ខេត្តទេសចរណ៍ធម្មជាតិជាប់សមុទ្ររបស់យើង»។
លោក បានប្រាប់ឲ្យដឹងទៀតថា កន្លងមកក្រសួងឧស្សាហកម្ម រ៉ែ និង ថាមពល ធ្លាប់បានពន្យាររយៈពេល៦ខែឲ្យក្រុមហ៊ុននេះ ប្រឹងប្រែងរកដៃគូវិនិយោគដើម្បីមកជ្រោមជ្រែងលើគម្រោងរបស់ខ្លួន ដែរ តែក្រុមហ៊ុននៅតែពុំមានលទ្ធភាពដដែល ហើយរយៈពេលនៃការពន្យារនេះបានផុតសុពលភាពតាំងពីខែវិច្ឆិកា ឆ្នាំ២០១១មកម្ល៉េះ។
លោកបានបញ្ជាក់ថា៖«ទោះជាបែបណាក្ដីរហូត មកទល់ពេលនេះ ខ្ញុំនៅមិនទាន់ទទួលបានលិខិតឆ្លើយតបពីក្រសួងវិញទេ។ តែបើក្រសួងមិនលុបអាជ្ញាប័ណ្ណ ដែលបានចេញហើយនោះចោលទេ គឺមិនមានក្រុមហ៊ុនថ្មីណាមួយគេហ៊ានចូលមកសិក្សាការងារនេះ បន្តឡើយ»។
លោក តន់ សុខជា ប្រធាននាយកដ្ឋានទឹកស្អាត នៃក្រសួងឧស្សាហកម្ម រ៉ែ និងថាមពល បានប្រាប់ភ្នំពេញ ប៉ុស្តិ៍កាលពីល្ងាចថ្ងៃចន្ទថា លោកទទួលបានសំណើរបស់លោកអភិបាលខេត្តកែប ដែលស្នើសុំឲ្យក្រសួងលុបចោលអាជ្ញាប័ណ្ណផ្គត់ផ្គង់ទឹកស្អាតរបស់ ក្រុមហ៊ុន Western Coastal Development Co. នោះហើយ។
លោកថ្លែង បន្តថា៖«នៅពេលនេះ ខ្ញុំកំពុងរៀបចំធ្វើលិខិតបទដ្ឋានច្បាប់ ដើម្បីលុបចោលនូវអាជ្ញាប័ណ្ណរបស់ក្រុមនេះ តាមសំណើរបស់អាជ្ញាធរខេត្តកែបហើយ»។
អ្នកស្រី ផល ធានី តំណាងក្រុមហ៊ុនផ្គត់ផ្គង់ទឹកស្អាត Western Coastal Development Co. កាលពីម្សិលមិញបានប្រាប់ភ្នំពេញ ប៉ុស្តិ៍ថា ក្រុមហ៊ុនពិតជាមានកង្វះខាតថវិកា សម្រាប់បន្តដំណើរការអនុវត្តគម្រោងផ្គត់ផ្គង់ទឹកស្អាត ជូនប្រជាពលរដ្ឋនៅក្នុងខេត្តនេះមែន។ តែទោះជាបែបណា ក្រុមហ៊ុនបានប្រឹងប្រែងអស់ពីលទ្ធភាពរបស់ខ្លួន និងបានសាងសង់ប្រព័ន្ធអាងទឹកស្អាតបានមួយចំនួនខ្លះហើយ។
អ្នកស្រីបានបន្តថា ក្រុមហ៊ុនរបស់អ្នកស្រីនឹងមិនជំទាស់ចំពោះការសម្រេច របស់ក្រសួងឬអាជ្ញាធរខេត្តក្នុងការលុបចោលនូវអាជ្ញាប័ណ្ណរបស់ក្រុមហ៊ុនអ្នកស្រីនោះទេ ប្រសិនបើមានក្រុមហ៊ុនវិនិយោគថ្មី មកបោះទុនវិនិយោគលើវិស័យនេះ។
អ្នកស្រី ថ្លែងថា៖«ក្រុមហ៊ុនខ្ញុំមិនជំទាស់ទេលុបក៏លុបចុះតែសូមជួយចេញ សោហ៊ុយបង់ខាតឲ្យក្រុមហ៊ុនយើងខ្ញុំបានខ្លះ ព្រោះក្រុមហ៊ុនខ្ញុំបានចំណាយធនធានផ្ទាល់ខ្លួនអស់ជិតកន្លះលានដុលា្លរ ទៅលើការសាងសង់ទំនប់អាងទឹកស្អាត»៕
