.jpg)
អាជ្ញាធរខេត្តកែបចុះរុះរើរោងសង់ខុសច្បាប់លើដីព្រៃកោងកាងថ្ងៃទី ២៣ សីហា។រូប ខេត្តកែប
កែបៈ អាជ្ញាធរខេត្ដកែបបានកំណត់មុខសញ្ញា និងកំពុងរៀបចំរបាយការណ៍ប្តឹងទៅតុលាការ ករណីជនខិលខូចឆ្លៀតឱកាសក្នុងអំឡុងថ្ងៃឈប់សម្រាក កាលពីសប្ដាហ៍មុននេះ លួចចូលទន្ទ្រាន បោះបង្គោល សង់រោង និងដាំដំណាំ នៅលើដីព្រៃកោងកាងលិចទឹកជិត ៤ ហិកតាក្នុងតំបន់សហគមន៍ នេសាទ ស្ថិតក្នុងភូមិអង្កោល ឃុំអង្កោល ស្រុកដំណាក់ចង្អើរ។
លោក រស់ ឧត្ដង្គ អ្នកនាំពាក្យរដ្ឋបាលសាលាខេត្ដកែបបានប្រាប់ភ្នំពេញប៉ុស្ដិ៍ពីម្សិលមិញថា ក្រោយទទួលបានព័ត៌មានពីករណីជនខិលខូចចូលទៅទន្ទ្រានបោះបង្គោល សង់រោង ពុះឡូត៍ដីរដ្ឋធ្វើជាកម្មសិទ្ធិក្នុងតំបន់សហគមន៍នេសាទខាងលើលោក សោម ពិសិដ្ឋ អភិបាលខេត្តកែបបានដឹកនាំកម្លាំងគណៈបញ្ជាការឯកភាពខេត្ត មន្ទីរអង្គភាព ពាក់ព័ន្ធចុះពិនិត្យទីតាំងនោះ។ ជាមួយគ្នានោះ បានរុះរើសំណង់រោងឈើចំនួន ២ មានទំហំទទឹង ៣ ម៉ែត្រ និងបណ្ដោយ ៦ ម៉ែត្រ និងបានដកបង្គោលថ្ម ដែលជនខិលខូចបោះកំណត់ព្រំដីប្រមាណ ១០០ បង្គោលផងដែរ។
លោកថ្លែងថា៖ «ក្រោយពីឯកឧត្ដមអភិបាល [ខេត្ត] បានចុះពិនិត្យ និងបញ្ជាឲ្យអនុវត្ដរុះរើសំណង់រោង និងដកបង្គោលថ្មដែលជនខិលខូចលួចបោះកំណត់ព្រំដីនោះរួច លោកអភិបាលបានបញ្ជាឱ្យស្រាវជ្រាវរកមុខសញ្ញាជនខិលខូច ដើម្បីយកមកផ្តន្ទាទោសតាមច្បាប់»។
អ្នកនាំពាក្យរូបនេះឱ្យដឹងថា ករណីជនខិលខូចលួចចូលទន្ទ្រានដីព្រៃកោងកាងរបស់រដ្ឋនេះគឺពួកគេបានធ្វើនៅពេលយប់ក្នុងអំឡុងពេលថ្ងៃឈប់សម្រាកដែលជាថ្ងៃសងចូលឆ្នាំខ្មែរកន្លងទៅនេះ។ លោកបានអំពាវនាវដល់ពលរដ្ឋកុំចាញ់បោកមេខ្យល់ ហើយចូលទៅទន្ទ្រានដីរដ្ឋដែលជាអំពើខុសច្បាប់អាចឈានទៅប្រឈមមុខនឹងទោសទណ្ឌផងដែរ។
លោក ថឹង បូរិន ប្រធានមន្ទីរ កសិកម្ម រុក្ខាប្រមាញ់ និងនេសាទខេត្ដកែប បញ្ជាក់ពីម្សិលមិញដែរថា ករណីនេះសមត្ថកិច្ចបានកំណត់មុខសញ្ញាជនខិលខូចរួចហើយ និង កំពុងរៀបចំរបាយការណ៍ដាក់ទៅតុលាការ ដើម្បីអនុវត្ដវិធានការតាមផ្លូវច្បាប់ចំពោះជនខិលខូច។
លោកថ្លែងថា៖ «យើងបានកំណត់មុខសញ្ញាជនខិលខូចបានចំនួន ១ រូប រួចហើយ។ យើងកំពុងរៀបចំសំណុំរឿងនេះដាក់ទៅតុលាការ ដើម្បីឱ្យតុលាការអនុវត្ដតាមនីតិវិធីច្បាប់។ ការងារនេះយើងបានរាយការណ៍ជូនទៅព្រះរាជអាជ្ញាអមសាលាដំបូងខេត្ដរួចតាំងពីថ្ងៃដំបូងហើយ ប៉ុន្ដែអ្វីដែលយើងកំពុងធ្វើគឺចងក្រងឯកសារ ភ័ស្តុតាងបន្ថែមទៀត»។
លោក ថឹង បូរិន បន្ថែមថាករណីនេះជាបទល្មើសជាក់ស្ដែង ព្រោះជនខិលខូចបានរំលោភ ទន្ទ្រានយកដីរដ្ឋមកធ្វើជាកម្មសិទ្ធិផ្ទាល់ខ្លួនក្នុងនោះមានភ័ស្តុតាងសំណង់រោង និងបង្គោលថ្មដែលជនខិលខូចទើបតែសាងសង់មិនទាន់រួចរាល់។
លោកឱ្យដឹងទៀតថា ករណីនេះជនខិលខូចបានទន្ទ្រានយកដីព្រៃកោងកាងប្រមាណ ៤ ហិកតាក្នុងនោះជនខិលខូចបានបោះបង្គោលថ្មកំណត់ព្រំប្រទល់លើដីនោះធ្វើជាដីឡូត៍ៗក្នុង ១ ឡូត៍ ទំហំ ១ ហិកតា ដើម្បីទុកសម្រាប់លក់។ ប៉ុន្ដែដីនេះជាដីស្ថិតនៅក្រោមដែនសមត្ថកិច្ចគ្រប់គ្រងរបស់ក្រសួងកសិកម្មដែលមានមន្ទីរកសិកម្មខេត្ដជាសេនាធិការថែរក្សា ការពារ។
មន្ដ្រីសម្របសម្រួលសមាគមការពារសិទ្ធិមនុស្ស (អាដហុក) ប្រចាំខេត្ដកែប លោក យន់ ផល្លី លើកឡើងថាកន្លងមកខេត្ដកែបមិនសូវមានជនខិលខូចចូលមកប្រព្រឹត្តបទល្មើសកាប់រានទន្ទ្រានយកដីរដ្ឋធ្វើជាកម្មសិទ្ធិទេ។ ប៉ុន្ដែទើបតែអំឡុងពេលថ្មីៗនេះមានជនខិលខូចចូលទន្ទ្រានយកក្នុងតំបន់សហគមន៍ នេសាទ ស្ថិតក្នុងភូមិអង្កោល ឃុំអង្កោល ស្រុកដំណាក់ចង្អើរព្រោះតំបន់នេះ រាជរដ្ឋាភិបាលបានរៀបចំគម្រោងអភិវឌ្ឍន៍ជាតំបន់ទេសចរណ៍។
លោកបានបន្តថា៖ «ករណីនេះ បើអាជ្ញាធរអនុវត្ដច្បាប់ ដើម្បីការពារទ្រព្យសម្បត្ដិរបស់រដ្ឋ គឺធ្វើយ៉ាងម៉េចអនុវត្ដឱ្យមានភាពស្មើគ្នា កុំឱ្យគេមើលឃើញថា អាជ្ញាធរអនុវត្ដច្បាប់តែចំពោះពលរដ្ឋក្រីក្រ។ ប៉ុន្ដែចំពោះបុគ្គលអ្នកមានអំណាច ឬអ្នកដែលមានទ្រព្យសម្បត្ដិមិនបានអនុវត្ដឱ្យបានដូចគ្នា»៕
