មណ្ឌលគិរី: អាជ្ញាធរខេត្តមណ្ឌលគិរីបាននិងកំពុងស្រាវជ្រាវរកអត្តសញ្ញាណជនខិលខូចដែលបានលួចបោះបង្គោលរបងថ្មនៅលើដីចម្ការស្រល់របស់រដ្ឋ ដើម្បីធ្វើជាកម្មសិទ្ធិផ្ទាល់ខ្លួន បន្ទាប់ពីសមត្ថកិច្ចចុះដកកម្ទេចបង្គោលរបងថ្មចោលជិត ២០០ បង្គោល នៅក្នុងឃុំសែនមនោរម្យ ស្រុកអូររាំង ខេត្តមណ្ឌលគិរី។
លោក សៀក មុន្នី អភិបាលស្រុកអូររាំងបានថ្លែងកាលពីចុងសប្ដាហ៍មុនថា ជនមិនស្គាល់អត្តសញ្ញាណបានលួចបោះបង្គោលថ្មព័ទ្ធដីជិត ២០០ បង្គោល លើផ្ទៃដីប្រមាណជា ១០០ ហិកតា ដើម្បីប៉ុនប៉ងកាប់រានព្រៃចម្ការស្រល់នោះយកដីធ្វើកម្មសិទ្ធិខុសច្បាប់។
តែក្រោយពីទទួលបានព័ត៌មាននេះកាលពីថ្ងៃទី ២៩ ខែមករា សមត្ថកិច្ចជាង ១០ នាក់ បានចុះទៅដកបង្គោលទាំងនោះចោលវិញ ស្របពេលដែលអាជ្ញាធរកំពុងរៀបចំដំណើរការនីតិវិធីដើម្បីចុះបញ្ជីចម្ការស្រល់នោះទុកជាដីរដ្ឋ។
លោកបញ្ជាក់ថា៖ «ក្នុងអំឡុងពេលនេះយើងត្រូវស្រាវជ្រាវរកអ្នកដែលបោះបង្គោលរបងថ្មលើដីនេះសិនដើម្បីឲ្យពួកគាត់ចូលខ្លួនមកដោះស្រាយជាមួយអាជ្ញាធរតាមផ្លូវច្បាប់ ប៉ុន្ដែប្រសិនបើអ្នកដែលបោះបង្គោលលើដីនេះមានប្លង់រឹង ឬឯកសារបញ្ជាក់ យើងនឹងផ្ទៀងផ្ទាត់ជាមួយឯកសារអាជ្ញាធរ ដើម្បីដោះស្រាយទៅតាមនីតិវិធីច្បាប់»។
លោកបន្ថែមថា កន្លងមកដីតំបន់នេះត្រូវបានជនខិលខូចបោះបង្គោលរបងចំនួន ២ លើករួចមកហើយ ប៉ុន្ដែត្រូវបានអាជ្ញាធរចុះទៅដកចោលវិញ។ រីឯអ្នកដែលដាំបង្គោលនោះមិនបានចូលខ្លួនមកទទួលខុសត្រូវទេ។ ប៉ុន្ដែពេលនេះអាជ្ញាធរនឹងស្រាវជ្រាវរកជនអនាមិកទាំងនោះមកទទួលខុសត្រូវតាមច្បាប់។
លោក ថៃ វណ្ណៈ អធិការរងនគរបាលស្រុកអូររាំងខេត្តមណ្ឌលគិរីបានថ្លែងថា កម្លាំងលោកបានចូលរួមក្នុងប្រតិបត្តិការដកបង្គោលរបងថ្មនេះចោលដែរ ប៉ុន្ដែជុំវិញការទិញ ឬលក់ដី និងមូលហេតុយ៉ាងណានោះ លោកមិនបានដឹងរឿងនេះទេ។
លោកបញ្ជាក់ថា៖ «ពួកខ្ញុំគ្រាន់តែចុះដកបង្គោលហ្នឹងចោលទេ ហើយរឿងគេទិញ ឬលក់ដីរដ្ឋយ៉ាងណានោះខ្ញុំអត់ដឹងទេ។ សួរទៅមន្ត្រីជំនាញបានគេដឹង ខ្ញុំអត់ដឹងទេ»។
លោក កែវ សុភគ៌ ប្រធានមន្ទីរបរិស្ថានខេត្តមណ្ឌលគិរីបានថ្លែងថាលោកបានទទួលដំណឹងនេះដែរ ប៉ុន្ដែដីក្នុងទីតាំងនោះ មិនស្ថិតក្នុងដែនសមត្ថកិច្ចរបស់មន្ទីរបរិស្ថានខេត្តទេ។ ប៉ុន្តែស្ថិតនៅក្រោមការគ្រប់គ្រងរបស់រដ្ឋបាលព្រៃឈើ។
លោកបានបញ្ជាក់ថា៖ «ដីហ្នឹងក្រោមការគ្រប់គ្រងរបស់រដ្ឋបាលព្រៃឈើជាអ្នកគ្រប់គ្រង។ រីឯមន្ទីរបរិស្ថានខេត្តគ្រប់គ្រងដីនៅជាប់គ្នានោះដែរ ប៉ុន្ដែមិនមានអ្នកលួចដាំបង្គោលរបងរំលោភយកដីទេ។ ពួកខ្ញុំនឹងចុះទៅពិនិត្យមើលដីក្រោមការគ្រប់គ្រងរបស់មន្ទីរបរិស្ថានដែរ ព្រោះខ្លាចគេលួចដាំបង្គោលរបងដែរ។ បញ្ហាចុះពិនិត្យនេះ យើងចុះអនុវត្តជាប្រចាំ ព្រោះជនខិលខូច គាត់រង់ចាំមើលតែយើងទេ។ បើយើងមិនសូវចុះទៅមើលទេ គឺគេនឹងលួចយកដីអស់»។
លោក អ៊ុំ សុវណ្ណសុភៈ នាយខណ្ឌរដ្ឋបាលព្រៃឈើខេត្តមណ្ឌលគិរីមិនអាចទាក់ទងសុំការបញ្ជាក់ពីករណីនេះបានទេដោយទូរស័ព្ទលោកមិនមានអ្នកទទួល។
លោក អ៊ាង ម៉េងលី មន្ត្រីសម្របសម្រួលនៃសមាគមសិទ្ធិមនុស្សអាដហុកប្រចាំខេត្តមណ្ឌលគិរីបានថ្លែងថា លោកបានទទួលព័ត៌មានដែរ ប៉ុន្ដែមិនបានទៅពិនិត្យជាក់ស្ដែងទេ។ លោកថា ដីតំបន់នោះត្រូវបានគេរំលោភយកជាច្រើនលើកមកហើយ ប៉ុន្ដែអាជ្ញាធរបានចុះបង្ក្រាបទាន់ពេលវេលា។
លោក អ៊ាង ម៉េងលី បានគាំទ្រចំណាត់ការរបស់អាជ្ញាធរនេះ ប៉ុន្ដែបានស្នើឲ្យស្រាវជ្រាវរកអត្តសញ្ញាណជនខិលខូចដែលលួចបោះបង្គោលរបងយ៉ាងអនាធិបតេយ្យបែបនេះ។ លោកថា អាជ្ញាធរត្រូវតែអនុវត្តច្បាប់ឲ្យបានតឹងរ៉ឹង ដើម្បីព្រមានអ្នកផ្សេងទៀតកុំឲ្យយកដីរដ្ឋ។
លោកបញ្ជាក់ថា៖ «បើយើងនៅតែបណ្ដោយតទៅទៀតគឺករណីនេះនៅបន្តកើតឡើងជាហូរហែហើយកាន់តែពិបាកដោះស្រាយថែមទៀត។ ជាពិសេសត្រូវស្រាវជ្រាវថា ភាគីដែលរំលោភហ្នឹងមានឯកសារបញ្ជាក់អ្វីខ្លះ? ពួកគាត់មកបោះបង្គោលខ្លួនឯង ឬមានបក្ខពួកនៅពីក្រោយខ្នង? ហើយការដែលអាជ្ញាធរទៅបំផ្លាញចោល ២ ឬ ៣ ដងមកនេះគឺបង្ហាញថា អាជ្ញាធរមិនទាន់មានការអនុវត្តច្បាប់បានតឹងរ៉ឹងនៅឡើយ»។
បើតាមលោក សៀក មុន្នី មានដីចម្ការស្រល់របស់ក្រុមហ៊ុនមួយនៅជាប់ដីរដ្ឋដែលគេលួចបោះបង្គោលនោះ ប៉ុន្តែដីក្រុមហ៊ុននោះក៏មិនទាន់អាចចុះបញ្ជីបានដែរ ព្រោះកំពុងមានបញ្ហាជាន់គ្នាលើដីពលរដ្ឋ។ ដូច្នេះត្រូវរង់ចាំឲ្យក្រុមការងារចុះទៅត្រួតពិនិត្យដើម្បីសម្រេចថា តើត្រូវឆ្វៀលចេញក្នុងទំហំប៉ុន្មាន ហើយទីតាំងត្រង់កន្លែងណាត្រូវកាត់ឲ្យក្រុមហ៊ុន និងទីតាំងត្រង់កន្លែងណាត្រូវកាត់ឲ្យពលរដ្ឋ៕
វីដេអូ៖