មន្ត្រីរដ្ឋបាលព្រៃឈើខេត្តកំពង់ឆ្នាំង នៅថ្ងៃអង្គារនេះ បានចុះបង្ក្រាបរោងកែច្នៃឈើខុសច្បាប់ចំនួន ៤ កន្លែង ដោយរឹបអូសឈើជាង ៤ ម៉ែត្រគុបនៅឃុំទួលខ្ពស់ ស្រុកទឹកផុស ខេត្តកំពង់ឆ្នាំង ប៉ុន្ដែ ម្ចាស់ទីតាំងកែច្នៃឈើបានរត់គេចខ្លួន ខណៈសមត្ថកិច្ចខេត្តឧត្តរមានជ័យ ក៏បានឃាត់ខ្លួនម្ចាស់ទីតាំងកែច្នៃឈើម្នាក់និងរឹបអូសឈើជាង ១៤ ម៉ែត្រគុបនៅឃុំត្រពាំងប្រាសាទ ស្រុកត្រពាំងប្រាសាទ។
លោក ថោង វាន់វីរ៉ាវុឌ្ឍី នាយខណ្ឌរដ្ឋបាលព្រៃឈើខេត្តកំពង់ឆ្នាំង ថ្លែងនៅថ្ងៃនេះថា រោងកែច្នៃឈើធ្វើគ្រឿងសង្ហារឹមគ្មានច្បាប់អនុញ្ញាតចំនួន ៤ កន្លែង ត្រូវបានសមត្ថកិច្ចចុះបង្ក្រាបជាបន្តបន្ទាប់ ដោយរឹបអូសឈើប្រមាណជាង ៤ ម៉ែត្រគុប(ឈើចម្រុះ)។
លោកថា ឈើទាំងអស់នោះ ត្រូវបានដឹកជញ្ជូនយកមករក្សាទុកនៅទីស្នាក់ការរដ្ឋបាលព្រៃឈើខេត្ត កំពង់ឆ្នាំង។
លោកបន្តថា ក្រៅពីទីតាំង ៤ កន្លែងនេះ លោកគ្រោងដឹកនាំកម្លាំងចុះទៅបង្ក្រាបទីតាំងកែច្នៃឈើចំនួន ៦ កន្លែងទៀត ដែលកំពុងធ្វើសកម្មភាពយ៉ាងសកម្មក្នុងការកែច្នៃឈើធ្វើជាគ្រឿងសង្ហារឹម ដោយគ្មានការអនុញ្ញាតត្រឹមត្រូវតាមច្បាប់។
ប៉ុន្ដែលោកមិនទាន់អាចបញ្ជាក់ពីទីតាំងច្បាស់លាស់បានទេ។
លោក វាន់វីរ៉ាវុឌ្ឍី បញ្ជាក់ថា៖ «ម្ចាស់ទីតាំងកែច្នៃឈើទាំងនោះបានរត់គេចខ្លួនបាត់អស់ហើយ ដោយបន្សល់ទុកឈើ និងគ្រឿងម៉ាស៊ីនកែច្នៃឈើនៅនឹងកន្លែង។ ឥឡូវនេះយើងបានប្រមូលទាំងឈើ និងគ្រឿងម៉ាស៊ីនកែច្នៃឈើហ្នឹងមករក្សាទុកនៅស្នាក់ការរដ្ឋបាលព្រៃឈើខេត្តហើយ អ៊ីចឹងម្ចាស់ទាំងអស់ គួរតែចូលខ្លួនមកដោះស្រាយតាមច្បាប់»។
ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកំពង់ឆ្នាំង លោក ងិន ហ៊ុន ថ្លែងនៅថ្ងៃអង្គារនេះដែរថា ក្រុមមន្ត្រីជំនាញនៃរដ្ឋបាលព្រៃឈើបានចុះទៅបង្ក្រាបទីតាំងកែច្នៃឈើមួយចំនួនហើយ។ ជនដែលប្រព្រឹត្តបទល្មើស ត្រូវតែមកទទួលការពិន័យ ឬ ត្រូវផ្ដន្ទាទោសតាមច្បាប់ដោយគ្មានការលើកលែងទេ។
លោកបញ្ជាក់ថា៖«ខ្ញុំអត់ទាន់បានរបាយការណ៍លំអិតទេ ព្រោះមន្ត្រីយើងកំពុងធ្វើការ អ៊ីចឹងគាត់មិនទាន់ធ្វើរបាយការណ៍រួចរាល់ទេ។ ក្រៅពីបង្ក្រាបប៉ុន្មានកន្លែងនេះ យើងនៅតែបន្តចុះស៊ើបអង្កេត និងបង្ក្រាបបន្ថែមទៀត យើងមិនមែនធ្វើត្រឹមនេះទេ។ ឈើដែលក្រុមឈ្មួញកំពុងកែច្នៃនេះ ភាគច្រើននាំចូលមកពីខេត្តពោធិ៍សាត់ និងកំពង់ស្ពឺ រីឯនៅខេត្តកំពង់ឆ្នាំងមិនមានឈើសម្រាប់កែច្នៃទេ»។
តាមសារព័ត៌មានក្នុងស្រុកមួយបានដកស្រង់សម្តីពលរដ្ឋម្នាក់សុំមិនបញ្ចេញឈ្មោះ កាលពីថ្ងៃទី១៩ មេសា ថា ករណីឈ្មួញរកស៊ីបទល្មើសបើកសិប្បកម្ម កែច្នៃឈើ គឺធ្វើបានយ៉ាងរលូនគ្រប់ៗគ្នា ដោយមិនរំខានពីមន្ត្រីជំនាញពាក់ព័ន្ធនៅក្នុងស្រុកទឹកផុស និងខេត្តកំពង់ឆ្នាំងទេ។ អ្នកដែលរកស៊ីបង់ពន្ធជូនរដ្ឋចេះតែបង់តាមច្បាប់ រីឯអ្នករកស៊ីមិនគោរពច្បាប់ ចេះតែធ្វើបានស្រេចតែចិត្ត ព្រោះមន្ត្រីជំនាញពាក់ព័ន្ធមិនចុះបង្ក្រាបទប់ស្កាត់រាល់ទង្វើអ្នករកស៊ីល្មើសច្បាប់កាប់ឈើ ដឹកជញ្ជូនឈើ កែច្នៃឈើទាំងអស់នោះទេ។
ករណីស្រដៀងគ្នានេះ មន្ត្រីកងរាជអាវុធហត្ថស្រុកត្រពាំងប្រាសាទ ខេត្តឧត្តរមានជ័យ នៅថ្ងៃនេះ បានឃាត់ខ្លួនបុរសជាម្ចាស់ទីតាំងកែច្នៃឈើម្នាក់នៅភូមិថ្នល់កែង ឃុំ-ស្រុកត្រពាំងប្រាសាទ ខេត្តឧត្តរមានជ័យ ដោយបានរឹបអូសឈើជាង ១៤ ម៉ែត្រគុប។
លោក ភួង លីណា ប្រធានមន្ទីរបរិស្ថានខេត្តឧត្តរមានជ័យប្រាប់នៅថ្ងៃអង្គារនេះថា ជនសង្ស័យម្នាក់ឈ្មោះ យ៉ុត វ៉ាន់ស៊ុន ភេទប្រុសអាយុ ៣៩ឆ្នាំ ដែលជាម្ចាស់ទីតាំងសន្និធិផលអនុផលព្រៃឈើគ្មានច្បាប់អនុញ្ញាត ត្រូវបានសមត្ថកិច្ចឃាត់ខ្លួននៅថ្ងៃទី២១ ខែមេសា។ សមត្ថកិច្ចបានប្រមូលឈើទាំងអស់យកមករក្សាទុកនៅស្នាក់ការបរិស្ថានគូលេនព្រហ្មទេព។ រីឯម្ចាស់ត្រូវបានបញ្ជូនមកមន្ទីរបរិស្ថានខេត្តឧត្តរមានជ័យ ដើម្បីសាកសួរបន្តនីតិវិធីច្បាប់។
លោកបញ្ជាក់ថា៖«ខ្ញុំមិនទាន់ដឹងថា មន្ត្រីជំនាញបញ្ជូនខ្លួនជនសង្ស័យទៅតុលាការនៅពេលណាទេ ប៉ុន្ដែ ជនសង្ស័យស្ថិតនៅក្នុងការសាកសួរនៅឡើយ។ ខ្ញុំគិតថាប្រហែលជានៅថ្ងៃទី ២២ ខែមេសានេះ មន្ត្រីជំនាញរៀបចំសំណុំរឿងរួចរាល់ហើយ អាចនឹងបញ្ជូនទៅតុលាការតែម្ដង»។
តាមរបាយការណ៍របស់កងរាជអាវុធហត្ថលើផ្ទៃប្រទេស ដែលបង្ហាញលើគេហទំព័ររបស់ខ្លួន (GRK News) ពីម្សិលមិញឲ្យដឹងថា កម្លាំងមូលដ្ឋានកងរាជអាវុធហត្ថស្រុកត្រពាំងប្រាសាទ ដឹកនាំដោយលោក ម៉ៅ អូដេ មេបញ្ជាការរងមូលដ្ឋានកងរាជអាវុធហត្ថស្រុកត្រពាំងប្រាសាទ សហការជាមួយកម្លាំងចម្រុះ ដឹកនាំរួម ដោយលោកប៉េង ម៉េងគ័ង ព្រះរាជអាជ្ញារងអមសាលាដំបូងខេត្តឧត្តរមានជ័យ បានចុះបង្ក្រាបទីតាំងសន្និធិផលអនុផលព្រៃឈើគ្មានច្បាប់អនុញ្ញាតរបស់ម្ចាស់ឈ្មោះ យ៉ុត វ៉ាន់ស៊ុន ភេទប្រុសអាយុ ៣៩ឆ្នាំ នៅភូមិថ្នល់កែង ឃុំ-ស្រុកត្រពាំងប្រាសាទ ខេត្តឧត្តរមានជ័យ។
របាយការណ៍បន្តថា មន្ត្រីជំនាញបានដកហូតឈើលេខ ១ (ស្រឡៅ) ចំនួន ៣១៦ សន្លឹក ស្មើនឹង ១៤,០៦ ម៉ែត្រគុប។
បច្ចុប្បន្ននេះ ឈើដែលរឹបអូសបានទាំងអស់យកមករក្សាទុកនៅស្នាក់ការបរិស្ថានគូលេនព្រហ្មទេព រីឯម្ចាស់ឈើ ត្រូវបានសមត្ថកិច្ចបញ្ជូនទៅសាកសួរនៅមន្ទីរបរិស្ថានខេត្តឧត្តរមានជ័យ៕