.jpg)
ព្រះសីហនុៈ ក្នុងរយៈពេល ៥ ថ្ងៃដែលគិតមកដល់ត្រឹមថ្ងៃម្សិលមិញអាជ្ញាធរក្រុងព្រះសីហនុបានចុះទៅរុះរើដកស្លាកយីហោរបស់ជនជាតិចិន ដែលសរសេរអក្សរខ្មែរខុស ឬដាក់ឈ្មោះយីហោមិនត្រឹមត្រូវបានជាង ២០០ កន្លែងដែលការសរសេរអក្សរខុសនេះគឺដោយសារតែពួកគេមិនចេះអក្សរខ្មែរ ហើយប្រើកម្មវិធីបកប្រែ Google Translate។
ខណៈដែលមានកំណើនយ៉ាងខ្លាំងនៃជនជាតិចិនចូលមករកស៊ីនៅក្នុងប្រទេសកម្ពុជា ជាពិសេសនៅខេត្តព្រះសីហនុ គេឃើញមានការលើកស្លាកយីហោជាច្រើនដែលសរសេរអក្សរខ្មែរខុស អក្ខរាវិរុទ្ធ ឬដាក់ឈ្មោះមិនត្រឹមត្រូវលើស្លាកយីហោដូចជាដាក់ថា «ប្រទេសចិន» «លក់នាយកដ្ឋាន» «លាងសម្លៀកបំពាក់» «ទីក្រុងកំសាន្តក្វាងទុង» ជាដើម។ល។
លោក លឹម ភត្រី មន្ដ្រីរដ្ឋបាលក្រុងព្រះសីហនុទទួលបន្ទុករដ្ឋបាលសាធារណៈ និងបរិស្ថានបានប្រាប់ភ្នំពេញប៉ុស្ដិ៍កាលពីម្សិលមិញថា មូលហេតុដែលបណ្ដាលឲ្យជនជាតិចិនដែលមកបើករបររកស៊ីនៅខេត្ដព្រះសីហនុ ហើយនាំគ្នាសរសេរស្លាកយីហោខុសនេះ ពីព្រោះម្ចាស់ទីតាំងមិនបានទៅសុំច្បាប់ត្រឹមត្រូវ និងបើកកន្លែងធ្វើស្លាកយីហោខ្លួនឯង។
លោកបន្តថា៖ «បើពួកគាត់មកសុំច្បាប់ត្រឹមត្រូវគេតម្រូវឲ្យពួកគាត់ដាក់ឈ្មោះជាអក្សរខ្មែរ ចំណែកអក្ខរាវិរុទ្ធក៏គេត្រួតពិនិត្យមើលដែរ។ ឥឡូវពួកគាត់មកបើកកន្លែងរកស៊ីបោះពុម្ពស្លាកយីហោនៅព្រះសីហនុច្រើនដែរ ហើយពួកគាត់មិនចេះអក្សរខ្មែរ ពេលខ្លះក៏យកទៅបកប្រែតាមហ្គូហ្គលទើបខុសអ៊ីចឹង»។
បើតាមលោក ភត្រី ថាអាជ្ញាធរក៏មានចំណុចចន្លោះប្រហោងដែរ ព្រោះកម្លាំងសមត្ថកិច្ចផ្នែកត្រួតពិនិត្យស្លាកយីហោនេះមានតែម្នាក់ប៉ុណ្ណោះនៅក្នុងក្រុងព្រះសីហនុ។ «កន្លងមកយើងចុះរុះរើស្លាកយីហោដែលធ្វើខុសច្បាប់កំណត់នេះច្រើនមកហើយ ប៉ុន្ដែទើបតែរយៈពេលប្រហែល ៥ ថ្ងៃកន្លងមកនេះយើងបានចុះទៅរុះរើបានច្រើនជាង ២០០ កន្លែង»។
លោក សន ជ័យ នាយកប្រតិបត្ដិអង្គការសម្ព័ន្ធគណនេយ្យភាពសង្គមកម្ពុជាមើលឃើញថា៖ «ដូចជាកំហុសការធ្វើស្លាកយីហោនៅកណ្ដាលក្រុងព្រះសីហនុដែលដាក់ឈ្មោះថា ប្រទេសចិននោះគឺមិនមែនជាកំហុសរដ្ឋបាលទេ នេះជាកំហុសព្រហ្មទណ្ឌអ៊ីចឹងត្រូវតែយកម្ចាស់ទីតាំងនោះ ឬម្ចាស់ហាងនោះមកផ្ដន្ទាទោសតាមច្បាប់»៕
