កណ្តាលៈ អាជ្ញាធរឃុំស្វាយជ្រុំក្នុងស្រុកខ្សាច់កណ្តាលកាលពីថ្ងៃទី ១៨ ខែឧសភា បានកោះហៅម្ចាស់ក្រុមហ៊ុន និងភាគីពាក់ព័ន្ធឲ្យមកជួបប្រជុំ និងបានតម្រូវឲ្យកាយដីដែលពួកគេបានចាក់លុបចំណីប្រឡាយទឹកសាធារណៈក្របៅត្របត់ចេញវិញ បន្ទាប់ពីបានចាក់លុបប្រឡាយនេះអស់ប្រមាណ ៤០% ដោយគ្មានការអនុញ្ញាតពីអាជ្ញាធរ។
លោក ប៊ុន ផេង អភិបាលស្រុកខ្សាច់កណ្តាលបានប្រាប់ភ្នំពេញប៉ុស្តិ៍នៅថ្ងៃទី ១៨ ខែឧសភា ថា នៅពេលថ្មីៗនេះរដ្ឋបាលស្រុកខ្សាច់កណ្តាលបានពិនិត្យឃើញមានក្រុមហ៊ុនមួយចំនួនដែលមានក្បាលដីជាប់នឹងប្រឡាយក្របៅត្របត់បាននាំគ្នាចាក់ដីលុបប្រឡាយសាធារណៈ ដើម្បីធ្វើផ្លូវតភ្ជាប់ទៅកាន់ទីតាំងដីរបស់ពួកគេដោយគ្មានការអនុញ្ញាតធ្វើឲ្យមានការរិះគន់ពីសាធារណជនមកលើអាជ្ញាធរមូលដ្ឋានថា ខ្វះការទទួលខុសត្រូវក្នុងកិច្ចការពារ និងទប់ស្កាត់ សកម្មភាពនៃការរំលោភចាក់ដីលុបចំណីប្រឡាយទឹករបស់រដ្ឋខាងលើនេះ។
លោកបន្តថា ក្រោយពីពិនិត្យឃើញមានបាតុភាពរំលោភបំពានច្បាប់ខាងលើនេះ រដ្ឋបាលស្រុកស្វាយជ្រុំបានជំរុញឲ្យអាជ្ញាធរភូមិ-ឃុំ ចុះធ្វើការណែនាំដល់ម្ចាស់ ឬតំណាងក្រុមហ៊ុនទាំងនោះឲ្យផ្អាកសកម្មភាពនៃការចាក់ដីលុបចំណីប្រឡាយទឹកជាបន្ទាន់ និងត្រូវកោះហៅឲ្យម្ចាស់ ឬតំណាងក្រុមហ៊ុនទាំងនោះ រួមទាំងភាគីពាក់ព័ន្ធទាំងអស់ចូលរួមប្រជុំដោះស្រាយនូវបញ្ហានេះឲ្យបានសមស្រប។
លោក ផេង បន្តថា៖ «ខ្ញុំបានចុះណែនាំ និងផ្អាកសកម្មភាពនៃការចាក់ដីលុបចំណីប្រឡាយទឹកនៅចំណុចខាងលើនេះតាំងពីថ្ងៃសុក្រសប្ដាហ៍មុនមក»។
លោក សុន សំបូរ មេឃុំស្វាយជ្រុំបានប្រាប់ភ្នំពេញប៉ុស្តិ៍ថា ដីចំណីប្រឡាយប្រមាណ ៤០ ភាគរយត្រូវបានចាក់លុបដោយគ្មានការអនុញ្ញាត។ ក្នុងជំហានដំបូងនេះអាជ្ញាធរបានណែនាំដល់ម្ចាស់ក្រុមហ៊ុន និងភាគីពាក់ព័ន្ធ ធ្វើយ៉ាងណា កាយដីទាំងនោះចេញវិញ ហើយរៀបចំដាក់បង្កប់ប្រព័ន្ធលូធំៗ ដែលមានទំហំមុខកាត់ ២ ម៉ែត្រ និងមានប្រវែងពី ៤ ម៉ែត្រទៅ ៦ ម៉ែត្រ ដើម្បីធ្វើជាផ្លូវតភ្ជាប់ទៅក្បាលដីរបស់ពួកគេ ដោយរក្សាការពារនូវដីចំណីប្រឡាយរបស់រដ្ឋសម្រាប់អភិវឌ្ឍជាផ្លូវខ្នងទំនប់ប្រឡាយនាថ្ងៃអនាគត។
លោកនិយាយថា៖ «ប្រឡាយនោះមានសារៈសំខាន់ណាស់សម្រាប់ប្រជាពលរដ្ឋក្នុងតំបន់នេះទាំងពេលបច្ចុប្បន្ន និងអនាគត ដូច្នេះយើងចាំបាច់ត្រូវរក្សាការពារពីការរំលោភដោយចាក់ដីលុបយកដីចំណីប្រឡាយនេះធ្វើជាកម្មសិទ្ធិឯកជន»។ យ៉ាងណាក៏ដោយលោក សំបូរ មិនបានប្រាប់ឲ្យដឹងថា តើក្រុមហ៊ុនឯកជនណាខ្លះដែលបានធ្វើសកម្មភាពចាក់ដីលុបយកប្រឡាយនោះទេ។
លោក តែហួរ គឹមស្រេង តំណាងក្រុមហ៊ុនទេសចរណ៍ហួរណាន ដែលមានក្បាលដីស្ថិតនៅភាគខាងលិចនៃប្រឡាយទឹកនេះបានប្រាប់ភ្នំពេញប៉ុស្តិ៍ថា ការចាក់ដីលុបចំណីប្រឡាយទឹកក្នុងតំបន់ខាងលើនេះគឺមិនមែនជាទង្វើរបស់ក្រុមហ៊ុនលោកឡើយ ហើយក្រុមហ៊ុនរបស់លោកក៏មិនគាំទ្រចំពោះសកម្មភាពនោះដែរ។
លោកថ្លែងថា៖ «ប្រឡាយទឹកនេះគឺជាប្រព័ន្ធរំដោះទឹកពីគ្រោះជំនន់ទឹកភ្លៀងនារដូវវស្សាដ៏សំខាន់មួយក្នុងតំបន់ស្វាយជ្រុំ។ ក្រុមហ៊ុនយើងសូមគាំទ្រចំពោះចំណាត់ការរបស់អាជ្ញាធរក្នុងការការពារនូវប្រព័ន្ធប្រឡាយទឹកនេះ»។
លោក សេង សូរិយា ប្រជាពលរដ្ឋនៅភូមិស្វាយជ្រុំថ្លែងថា ចាប់តាំងពីតំបន់នេះ មានការអភិវឌ្ឍសំណង់ផ្ទះល្វែង និងខុនដូរមក ប្រព័ន្ធអូរ និងប្រឡាយមួយចំនួនត្រូវបានគេចាក់ដីលុបយកធ្វើជាកម្មសិទ្ធិជាបន្តបន្ទាប់។
លោកបានថ្លែងថា៖ «ខ្ញុំរីករាយចំពោះការអភិវឌ្ឍនាពេលបច្ចុប្បន្ន ប៉ុន្តែសកម្មភាពនៃការអភិវឌ្ឍខ្លះក៏បានធ្វើឲ្យខ្ញុំមិនសប្បាយចិត្តដែរ ដូចជាករណីក្រុមហ៊ុនមួយចំនួនបានរំលោភចាក់ដីលុបយកដីចំណីប្រឡាយទឹកសាធារណៈរបស់រដ្ឋនៅភូមិស្វាយជ្រុំនេះជាដើម»។
លោក លឹម គានហោ រដ្ឋមន្ត្រីក្រសួងធនធានទឹក និងឧតុនិយមតាមរយៈលិខិតមួយកាលពីថ្ងៃទី ៨ ខែ ឧសភា ឆ្នាំ ២០២០ បានបង្ហាញពីក្ដីព្រួយកង្វល់អំពីលទ្ធភាពនៃការរំដោះទឹកជំនន់ ដែលបង្កឡើងពីការរំលោភចាក់ដីលុបចំណីមាត់ច្រាំងទន្លេ ស្ទឹង ព្រែក អូរ ប្រឡាយ អាងទឹក បឹងបួ និងតំបន់រងទឹកភ្លៀងមួយចំនួនក៏ដូចជាការសាងសង់បិទផ្លូវទឹកនានាដោយពុំស្របតាមលិខិតបទដ្ឋានគតិយុត្តជាធរមាន។ ទន្ទឹមនឹងនេះលោក លឹមគានហោ ក៏បានស្នើដល់អភិបាលរាជធានី-ខេត្តទាំងអស់ចូលរួមជួយទប់ស្កាត់នូវសកម្មភាពល្មើសច្បាប់ទាំងនេះឲ្យមានប្រសិទ្ធភាព៕