.jpg)
លោកស្រី រស់ សុផានី ពេលបើកយុទ្ធនាការសម្អាតបរិស្ថាន។ រូបថត សហការី
បន្ទាយមានជ័យៈ អាជ្ញាធរខេត្ដបន្ទាយមានជ័យសហការជាមួយសមាគមក្រុមយុវជនស្ត្រីដើម្បីសង្គម ក្រុមយុវនិស្សិតស្ម័គ្រចិត្តបរិស្ថាននៅធានីភ្នំពេញក្រុមយុវជន ស.ស.យ.ក រួមនឹងព្រះសង្ឃសរុបប្រមាណ ២០០ អង្គ/នាក់ បានធ្វើយុទ្ធនាការ «ខ្ញុំដើម្បីបរិស្ថានស្អាតខេត្តបន្ទាយមានជ័យ» ដោយបានសម្អាតនៅតាមបរិវេណប្រាសាទបន្ទាយឆ្មារ និងក្រុងប៉ោយប៉ែត។
លោកស្រី រស់ សុផានី អភិបាលរងខេត្តបន្ទាយមានជ័យដែលបានចូលរួមជាអធិបតីនៃការបើកយុទ្ធនាការនេះបានប្រាប់ភ្នំពេញប៉ុស្ដិ៍កាលពីម្សិលមិញថា យុទ្ធនាការនេះធ្វើឡើងរយៈពេល ២ ថ្ងៃ (២៧-២៨ ខែមិថុនា) ដើម្បីរួមគ្នារើសសំរាម សម្អាតបរិស្ថានតាមបរិវេណប្រាសាទបន្ទាយឆ្មារ និងបរិវេណក្រុងប៉ោយប៉ែត។
លោកស្រីបានបញ្ជាក់ថា៖ «សកម្មភាពរបស់យុវជនទាំងនេះគឺជាគំរូល្អសម្រាប់យុវជនដទៃ និងសង្គមជាតិ។ យើងក៏ចង់ឱ្យយុវជនទាំងអស់ទូទាំងប្រទេសកម្ពុជា ត្រូវតែមានជំហរមានឆន្ទៈក្នុងការចូលរួមថែរក្សាបរិស្ថាន សម្អាតទីក្រុង សម្អាតប្រទេសកម្ពុជាយើងឱ្យមានបរិស្ថានល្អ ទាក់ទាញភ្ញៀវទេសចរដូចទៅនឹងប្រទេសជឿនលឿននៅលើពិភពលោកដែរ»។
យុវតី កែវ ទិត្យលីដា ប្រធានសមាគមក្រុមយុវជនស្ត្រីដើម្បីសង្គមបានប្រាប់ភ្នំពេញប៉ុស្ដិ៍ម្សិលមិញថា កម្មវិធី «ខ្ញុំដើម្បីបរិស្ថានស្អាតខេត្តបន្ទាយមានជ័យ» ធ្វើឡើងក្នុងបំណងផ្ដល់គំរូល្អដល់ក្មេងៗជំនាន់ក្រោយតាមរយៈមិនចោលសំរាមពាសវាលពាសកាលលើដងផ្លូវហើយមិនទុកគំរូអាក្រក់ដែលនាំឱ្យប៉ះពាល់ដល់បរិស្ថាន និងសង្គមជាតិទាំងមូល។
យុវតីរូបនេះបន្តថា៖ «សូមបងប្អូនគ្រប់រូប ជាពិសេសពលរដ្ឋខ្មែរ និងភ្ញៀវទេសចរជាតិទាំងមូលមេត្តារក្សាកិត្តិយសជាតិ និងកិត្តិយសខ្លួនឯងតាមរយៈទុកដាក់សំរាមឱ្យបានត្រឹមត្រូវ។ សូមរួមគ្នាធ្វើជារៀមច្បងគំរូល្អដល់ក្មេងជំនាន់ក្រោយ និងធ្វើជាម្ចាស់ផ្ទះដ៏គំរូសម្រាប់ភ្ញៀវជាតិ និងភ្ញៀវអន្តរជាតិដែលមកកម្សាន្តនៅតាមរមណីយដ្ឋានប្រាសាទបន្ទាយឆ្មារ និងនៅតំបន់ទេសចរណ៍វប្បធម៌ផ្សេងៗទៀត»។
បើតាមយុវតី ទិត្យលីដា ក្រុមយុវជននៃសមាគមក្រុមយុវជនស្ត្រីដើម្បីសង្គម និងក្រុមយុវជនស្ម័គ្រចិត្ដដទៃទៀតកំពុងរៀបចំផែនការដើម្បីស្នើដល់រដ្ឋបាលខេត្ដបន្ទាយមានជ័យក្នុងការដាំដើមត្នោតនៅតាមតំបន់មួយចំនួនក្នុងខេត្ដនេះ និងសាងសង់រូបសំណាកព្រះបាទជ័យវរ្ម័នទី ៧ នៅក្នុងបរិវេណប្រាសាទបន្ទាយឆ្មារផងដែរ៕
