.jpg)
គ្រឿងចក្រដែលសមត្ថកិច្ចបញ្ឈប់សកម្មភាពពីម្សិល។ រូបថត សហការី
កណ្តាល: អាជ្ញាធរស្រុកស្អាង និងមន្ត្រីជំនាញខេត្តកណ្ដាលកាលពីម្សិលមិញបានចុះបញ្ឈប់សកម្មភាពគ្រឿងចក្រចំនួន ៣ គ្រឿង ដែលកំពុងកាយដីធ្វើទំនប់ជាន់លើដីបឹងរបស់រដ្ឋនៅឃុំប្រាសាទ ស្រុកស្អាង ខេត្តកណ្តាលដោយមន្ត្រីអះអាងថា ក្រុមឈ្មួញបម្រុងរំលោភយកដីបឹងធម្មជាតិនេះធ្វើជាកម្មសិទ្ធិផ្ទាល់ខ្លួន។
លោក ឈាង លី មេឃុំប្រាសាទបានប្រាប់ភ្នំពេញប៉ុស្ដិ៍ពីម្សិលមិញថា អាជ្ញាធរស្រុកស្អាង និងមន្ត្រីជំនាញខេត្តកណ្ដាលប្រមាណ ២០ នាក់ បានចុះមកឃាត់សកម្មភាពគ្រឿងចក្រចំនួន ៣ គ្រឿងពេលកំពុងកាយដីបឹងធម្មជាតិរបស់រដ្ឋប្រមាណជាង ១០០ ហិកតា។ ក្រុមឈ្មួញបាននាំគ្នាកាយដីធ្វើទំនប់ក្រវាត់ព្រំដី ដោយរំលោភមកលើដីបឹងរបស់រដ្ឋដែលពលរដ្ឋធ្លាប់បានអាស្រ័យផលជារៀងរាល់ឆ្នាំ។
លោកបន្តថាលោកមិនបានស្គាល់អត្តសញ្ញាណក្រុមឈ្មួញដែលដាក់គ្រឿងចក្រមកកាយដីបឹងធ្វើទំនប់រំលោភលើដីបឹងធម្មជាតិរបស់រដ្ឋនេះទេ ប៉ុន្ដែពួកគេបានធ្វើសកម្មភាពកាយដីបឹងនេះជាង ១០ ថ្ងៃមកហើយ។ ទំនប់ដែលពួកគេបានធ្វើនោះមានប្រវែងជិត ១ គីឡូម៉ែត្រហើយ ប៉ុន្ដែត្រូវបានអាជ្ញាធរហាមឃាត់ទាន់។
លោក ឈាង លី បញ្ជាក់ថា៖ «ខ្ញុំអត់ស្គាល់ពួកគាត់ទេ ហើយពួកគាត់ក៏មិនបានមកប្រាប់ខ្ញុំពីកាយដីធ្វើទំនប់ហ្នឹងដែរ។
ខ្ញុំអត់ដឹងពីបំណងគាត់គិតយ៉ាងណាទេ ប៉ុន្ដែខ្ញុំយល់ថា ប្រហែលជាគាត់បម្រុងរំលោភយកដីបឹងនេះ។ ដូច្នេះនៅថ្ងៃទី ៤ ខែឧសភា នេះ អាជ្ញាធរយើងបានហាមឃាត់គាត់ហើយឥឡូវគាត់បើកគ្រឿងចក្រចេញពីដីបឹងនោះ ហើយខ្ញុំក៏អត់ដឹងថាមន្ត្រីជំនាញដាក់ទោសទណ្ឌគាត់បែបណាទេ»។
លោក ហេង សុភារិទ្ធ នាយខណ្ឌជលផលខេត្តកណ្ដាលបានថ្លែងពីម្សិលមិញថា លោកបានចាត់មន្ត្រីជំនាញឲ្យចុះទៅត្រួតពិនិត្យទីតាំងនោះជាក់ស្ដែងរួចរាល់ហើយ ប៉ុន្ដែលោកនៅមិនទាន់បានទួលរបាយការណ៍ពីករណីនេះទេ។
លោកបញ្ជាក់ថា៖ «ខ្ញុំមិនទាន់បានទទួលរបាយការណ៍លម្អិតនៅឡើយ ខ្ញុំអត់ទាន់ដឹងថា ត្រូវផាកពិន័យ ឬតម្រូវឲ្យធ្វើកិច្ចសន្យាយ៉ាងណាទេ ព្រោះខ្ញុំមិនទាន់ដឹងរឿងច្បាស់។ ខ្ញុំគិតថា ប្រហែលជាគាត់កំពុងធ្វើរបាយការណ៍ពីរឿងនេះហើយ»។
លោក ប៊ុន នួនស៊ីម៉ូណា ប្រធានមន្ទីរកសិកម្ម រុក្ខាប្រមាញ់ និងនេសាទខេត្តកណ្ដាលបានថ្លែងពីម្សិលមិញដែរថា មន្ត្រីជំនាញបានចុះទៅហាមឃាត់រួចរាល់ហើយនៅថ្ងៃទី ៤ ខែឧសភានេះ ប៉ុន្ដែលោកមិនទាន់ដឹងពីលទ្ធផលច្បាស់នៅឡើយ។
លោកបញ្ជាក់ថា៖ «ខ្ញុំកំពុងរង់ចាំមើលរបាយការណ៍ជុំវិញករណីនេះដែរ ប៉ុន្ដែមន្ត្រីជំនាញយើងមិនទាន់បញ្ជូនរបាយការណ៍លម្អិតមកខ្ញុំផង។ អ៊ីចឹងបើពួកគាត់ផ្ដល់របាយការណ៍មកទើបបានដឹងរឿងច្បាស់»។
ប្រជាពលរដ្ឋម្នាក់រស់នៅឃុំប្រាសាទសុំមិនបញ្ចេញឈ្មោះបាននិយាយពីម្សិលមិញថា លោកបានឃើញសកម្មភាពកាយដីធ្វើទំនប់នេះជាង ១០ ថ្ងៃហើយ ប៉ុន្ដែមិនទាន់មានអាជ្ញាធរចុះមកសួរនាំអ្វីទេ។ លោកក៏មិនបានដឹងរឿងច្បាស់ដែរថា តើមានក្រុមហ៊ុនមកទិញដីនេះ ឬមករំលោភយកដីបឹងនេះ?
លោកថា៖ «ដីបឹងនេះរបស់រដ្ឋហើយពួកខ្ញុំធ្លាប់អាស្រ័យផលដូចជា រកត្រី បេះបន្លែ ឃ្វាលគោក្របី និងអ្នកខ្លះដាំដំណាំរួមផ្សំតិចតួច ប៉ុន្ដែខ្ញុំឃើញមានឈ្មួញអ្នកទិញដីតែងតែមកឈរមើលដីបឹងនេះ ហើយប្រហែលជាអាជ្ញាធរឃុំមិនព្រមលក់ឲ្យពួកគាត់ទើបពួកគាត់ចេះស្ដាយដីនេះ»។
លោក ញឹម វណ្ណឌិន អភិបាលស្រុកស្អាងមិនអាចសុំការបញ្ជាក់បន្ថែមបានទេកាលពីថ្ងៃម្សិលមិញដោយទូរស័ព្ទចូលតែត្រូវបានចុចផ្ដាច់វិញ។
តាមសារព័ត៌មានក្នុងស្រុកមួយបានផ្សាយពីម្សិលមិញថា គ្រឿងចក្រទាំងនេះ បានធ្វើសកម្មភាពអំឡុងខែមេសារហូតដល់ថ្ងៃទី ៣ ខែឧសភា បើទោះបីពលរដ្ឋ និងអ្នកសារព័ត៌មានបានរាយការណ៍ទៅអាជ្ញាធរយ៉ាងណាក៏ដោយ។ គ្រឿងចក្រទាំងនេះត្រូវបានគេស្គាល់ថាមានម្ចាស់ឈ្មោះ តូ, ឈ្មោះ តាំង ឡឺយ, ឈ្មោះ តាំង ម៉េង និងឈ្មោះ ហុក ឡេង។
សារព័ត៌មានដដែលបន្តថា អ្នកទាំង ៤ រូបនេះតែងយកគ្រឿងចក្រមកស៊ីឈ្នួលជីកទំនប់ក្រវាត់ព្រំដីឲ្យឈ្មួញខុសច្បាប់ដែលពលរដ្ឋសង្ស័យថា អាជ្ញាធរបើកដៃឲ្យធ្វើសកម្មភាពយកដីរដ្ឋធ្វើជាកម្មសិទ្ធិផ្ទាល់ខ្លួន។
ទោះជាយ៉ាងណាភ្នំពេញប៉ុស្ដិ៍មិនទាន់អាចស្វែងរកប្រភពអ្នកទាំង ៤ នាក់នេះ ដើម្បីទាក់ទងសុំការបញ្ជាក់បន្ថែមជុំវិញករណីនេះបាននៅឡើយទេកាលពីម្សិលមិញ៕
