.jpg)
ទីតាំងដែលកុមារទាំងពីរលង់ទឹកស្លាប់ស្ថិតក្នុងភូមិព្រែកក្រឹស ឃុំព្រែកក្រឹស ស្រុកកំពង់ត្រាច។ រូបថត ប៉ូលិស
កំពតៈ អាជ្ញាធរខេត្តកំពតនិងក្រុមយុវជន សប្បុរស បានផ្ដល់អំណោយដល់គ្រួសារក្រីក្រ មួយគ្រួសារ នៅភូមិព្រែកក្រឹស ឃុំព្រែកក្រឹស ស្រុកកំពង់ត្រាច ក្រោយពីកូនពួកគេ ២ នាក់លង់ទឹកស្លាប់ កាលពីថ្ងៃទី១ ខែឧសភា។
លោក សេង សុគន្ធចាន់ អធិការនគរបាលស្រុកកំពង់ត្រាច បានឱ្យដឹងនៅថ្ងៃទី ២ ឧសភាថា ស្ត្រីឈ្មោះ ឃិន ស្រីនាង អាយុ ២៧ឆ្នាំ និង ប្តីឈ្មោះ នួ នឿត អាយុ ៤៥ឆ្នាំ ដែលមានកូនឈ្មោះ ឆេង សូ ភេទប្រុស អាយុ ៦ឆ្នាំ និងឈ្មោះ ឆេង រ័ត្ន ភេទស្រី អាយុ៤ឆ្នាំ ក្មេងទាំង ២ លង់ទឹកអណ្ដូងស្លាប់ ពេលដែលឪពុកកំពុងដើររកគោះអង្ក្រងយកទៅលក់។ គ្រួសារមួយនេះមានកូន ៤ នាក់ រីឯក្មេងស្លាប់ជាកូនបន្ទាប់ និង នៅសល់កូនតូចៗប្រុស ២ នាក់ទៀត។ ចំពោះអំណោយទាំងនោះមាន មី ត្រីខ ទឹកត្រី អង្ករ រួមទាំងថវិកា មួយចំនួន ដើម្បីជួយដោះស្រាយទុក្ខលំបាកក៏ដូចជាជួយរំលែកទុក្ខរបស់ម្តាយ-ឪពុក។
លោកប្រាប់ថា ៖«ចំពោះចំនួនថវិកាដែលឧបត្ថម្ភនោះ នៅមិនទាន់អាចកំណត់បានទេព្រោះនៅតែមានបន្តបន្ទាប់»។
លោក សុគន្ធចាន់ រំឭកប្រាប់ថា កាលពីម៉ោងប្រហែល ៨ ព្រឹកថ្ងៃទី ១ ខែឧសភា ឆ្នាំ ២០២១ បុរសជាឪពុកក្មេងរងគ្រោះបានចេញទៅរកអង្ក្រងលក់ រីឯប្រពន្ធធ្វើកិច្ចការផ្ទះ។លុះប្រមាណជាកន្លះម៉ោងក្រោយទើបស្រែកហៅកូន តែមិនឮឆ្លើយក៏មានការភ្ញាក់ផ្អើលនិងពឹងឱ្យអ្នកភូមិព្រមទាំងប្រជាការពារភូមិជួយតាមរក។ ពេលនោះ អ្នកភូមិបាននាំគ្នារកឃើញក្នុងអណ្តូងទឹក។ បន្ទាប់មកអ្នកភូមិបានដឹកក្មេងរងគ្រោះទៅមន្ទីរពេទ្យបង្អែកស្រុកកំពង់ត្រាចតែលោកគ្រូពេទ្យប្រាប់ថា ពួកគេដាច់ខ្យល់ស្លាប់តាំងពីមុនបញ្ជូនដល់មន្ទីរពេទ្យម៉្លេះ៕
