.jpg)
ក្រុម CPU ចុះណែនាំម្ចាស់បារ៍ ឬក្លិបក្នុងរាជធានីភ្នំពេញនាខែនេះ។ រូបថត CPU
ភ្នំពេញៈ ស្នងការដ្ឋាននគរបាលរាជធានីភ្នំពេញសហការជាមួយអង្គភាពការពារកុមារ (CPU) ក្នុងរយៈពេល ១ សប្ដាហ៍កន្លងមកនេះបានចុះណែនាំដល់ម្ចាស់ភោជនីយដ្ឋាន បារ៍ និងហាងកាហ្វេជាង ៤០ ទីតាំងក្នុងរាជធានីភ្នំពេញដើម្បីពន្យល់ឲ្យមានការយល់ដឹងពីការចូលរួមទប់ស្កាត់បទល្មើសផ្សេងៗមុនពេលសមត្ថកិច្ចចុះអនុវត្ដច្បាប់។
លោក ស ថេត អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញប្រាប់ពីម្សិលមិញថា ការសហការចុះណែនាំនេះគឺដើម្បីឲ្យពួកគាត់ចូលរួមទប់ស្កាត់ កុំឲ្យមានសកម្មភាពជួញដូរផ្លូវភេទ ជួញដូរកុមារ និងផ្សព្វផ្សាយពីការអនុវត្ដច្បាប់យ៉ាងតឹងរ៉ឹងចំពោះបទល្មើសទាំងនេះ។
លោកស្នងការថ្លែងថា៖ «សកម្មភាពនេះគឺជាវិធានការមួយដ៏ល្អសម្រាប់ម្ចាស់អាជីវកម្មដូចជា បារ៍ ភោជនីយដ្ឋាន និងហាងកាហ្វេមុននឹងសមត្ថកិច្ចអនុវត្ដច្បាប់។ ប៉ុន្ដែសកម្មភាពចុះណែនាំនេះមិនមែនជាការចុះទៅអនុវត្ដច្បាប់ចោទប្រកាន់ចំពោះម្ចាស់អាជីវកម្មទេវាគ្រាន់តែជាការណែនាំដើម្បីឲ្យមានការយល់ដឹងជាមុន»។
លោក ស ថេត បន្តថា ក្រោយពីចុះណែនាំរយៈពេល ១ សប្ដាហ៍បានជាង ៤០ ទីតាំង បារ៍ ភោជនីយដ្ឋាន និងហាងកាហ្វេទាំងនោះរួចហើយ ស្នងការដ្ឋាននគរបាលរាជធានីភ្នំពេញនឹងបន្តសហការជាមួយអង្គភាព CPU ដើម្បីអនុវត្ដវិធានការនេះទៀត។
លោកថា៖ «ការចុះណែនាំនេះ មិនមានន័យថាចោទប្រកាន់ម្ចាស់ហាង ឬក៏ទីតាំងនោះថា មានការប្រព្រឹត្ដបទល្មើសជួញដូរផ្លូវភេទ ឬជួញដូរកុមារទេ ប៉ុន្ដែដើម្បីឲ្យមានការបង្ការជាមុន។ មានន័យថា ដើម្បីឲ្យពួកគាត់យល់ដឹង។ ប្រសិនបើមានអ្នកណាប្រព្រឹត្ដនូវអំពើនេះយើងនឹងងាយស្រួលក្នុងការអនុវត្ដច្បាប់ព្រោះពួកគាត់បានយល់ដឹងជាមុនរួចហើយ»។
លោក James McCabe នាយកប្រតិបត្តិអង្គភាព CPU ថ្លែងម្សិលមិញថា CPU មមាញឹកក្នុងការប្រឆាំងការជួញដូរទៅលើអនីតិជននៅតាមបារ៍។ CPU ក្នុងកិច្ចសហប្រតិបត្តិការជាមួយនគរបាលជាតិកម្ពុជាបានធ្វើការផ្សព្វផ្សាយដល់លើសពី ៤០ បារ៍ និងហាងកាហ្វេនៅក្នុងរាជធានីភ្នំពេញក្នុងរយៈពេល ១ សប្ដាហ៍នេះ។
លោកថ្លែងថា៖ «គោលដៅនៃការផ្សព្វផ្សាយនេះ គឺដើម្បីរំឭកម្ចាស់បារ៍អំពីច្បាប់នៅក្នុងប្រទេសកម្ពុជាពាក់ព័ន្ធជាមួយនឹងការទទួលយកបុគ្គលិកក្រោមអាយុនៅក្នុងបារ៍»។ លោកបន្តថា ប្រទេសកម្ពុជាមានច្បាប់តឹងរ៉ឹងក្នុងការប្រឆាំងការជួញដូរអនីតិជន ហើយក្នុងគ្រាលំបាកទៅលើសេដ្ឋកិច្ច បង្កដោយ COVID-19។ CPU ជឿជាក់ថានេះជាពេលវេលាដ៏ល្អដើម្បីធ្វើការផ្សព្វផ្សាយ និងរំឭកអំពីទោសដែលមានប្រសិនបើមានអំពើខុសច្បាប់កើតឡើងលើបទល្មើសទាំងនេះ។
លោកបញ្ជាក់ថា៖ «នគរបាលជាតិកម្ពុជា និង CPU នឹងបន្តធ្វើការត្រួតពិនិត្យនៅតាមបារ៍ ដើម្បីធ្វើឲ្យប្រាកដថាមិនឲ្យមានការជួញដូរទៅលើអនីតិជនអាចកើតឡើងបាន។ គ្រប់បារ៍ដែលយើងបានធ្វើទស្សនកិច្ចបានគាំទ្រដល់គោលការណ៍របស់យើង និងមិនមានប្រព្រឹត្តអំពើខុសច្បាប់ឡើយ»៕
