.jpg)
សមត្ថកិច្ចរុះរើបង្គោលរបងវាតយកដីនៅគិរីរម្យ។ រូបថត Chea Hean page
កំពង់ស្ពឺៈ លោក វ៉ី សំណាង អភិបាលខេត្តកំពង់ស្ពឺបានថ្លែងថា ខេត្តនឹងដកហូតដីពីអ្នកដែលដណ្តើមកាន់កាប់ដោយខុសច្បាប់នៅតំបន់ឧទ្យានជាតិគិរីរម្យមកទុកជាដីរដ្ឋវិញខណៈមានប្រជាពលរដ្ឋជិត ២០ នាក់បានអះអាងថា បុគ្គល ២ នាក់ដែលម្នាក់ជាមន្ត្រីបរិស្ថានបានរំលោភបំពានយកដីជាង ២ ហិកតាក្នុងតំបន់ឧទ្យានជាតិនេះ។
លិខិត ១ ច្បាប់រួមទាំងមានស្នាមមេដៃពលរដ្ឋជិត ២០ នាក់ដែលអះអាងថា ជាសាក្សីរស់នៅភូមិថ្មី ឃុំចំបក់ ស្រុកភ្នំស្រួចបានដាក់ជូនមេឃុំចំបក់កាលពីថ្ងៃទី ១៣ ខែមិថុនា ឲ្យដឹងថាលោក ហេង សុខា ជាមន្ត្រីបរិស្ថានឧទ្យានជាតិគិរីរម្យ រស់នៅក្នុងភូមិថ្មី និងលោក ម៉ាង សុវណ្ណតារ៉ា ដែលត្រូវជាកូនប្រសាមានលំនៅក្នុងភូមិបុរីកម្មករ ឃុំបែកចាន ស្រុកអង្គស្នួល ខេត្តកណ្តាល មិនធ្លាប់មានដី និងរស់នៅអាស្រ័យផលលើទីកន្លែងមានទំនាស់នោះទេ។
ពលរដ្ឋអះអាងក្នុងលិខិតថា៖ «តបតាមកម្មវត្ថុខាងលើ យើងខ្ញុំទាំងអស់គ្នាជាប្រជាពលរដ្ឋរស់នៅភូមិថ្មី ឃុំចំបក់ សូមធ្វើការផ្តិតស្នាមមេដៃទុកជាភ័ស្តុតាង។ អាស្រ័យហេតុនេះលោកមេឃុំមេត្តាទទួលស្នាមមេដៃស្តាំរបស់ពួកយើងទាំងអស់គ្នា ដើម្បីធ្វើជាសាក្សីដោយក្តីអនុគ្រោះ»។
លោក ជ័យ ហ៊ីម មេឃុំចំបក់ និងលោក ហន ពិសិដ្ឋ អភិបាលស្រុកភ្នំស្រួច មិនអាចសុំការបញ្ជាក់ជុំវិញករណីនេះបានទេ ដោយសារពួកលោកបានចុចបិទទូរស័ព្ទនៅពេលឮភ្នំពេញប៉ុស្តិ៍សាកសួរពីបញ្ហានេះ ហើយក្រោយមកទូរស័ព្ទរបស់ពួកលោកក៏ទាក់ទងលែងចូល។
លោក ជា ទិត អនុប្រធានមន្ទីរបរិស្ថានខេត្តកំពង់ស្ពឺទទួលបន្ទុកក្នុងតំបន់ឧទ្យានជាតិគិរីរម្យបានប្រាប់ភ្នំពេញប៉ុស្តិ៍យ៉ាងខ្លីនៅថ្ងៃទី ៧ ខែកក្កដា ថា លោក និងក្រុមការងារកំពុងធ្វើការស៊ើបអង្កេតជុំវិញករណីនេះ។ ប៉ុន្តែលោកបានបដិសេធបកស្រាយរាល់ព័ត៌មានទាំងអស់ដែលទាក់ទងនឹងជម្លោះដីធ្លី និងការរំលោភបំពានកាន់កាប់ដីធ្លីនៅក្នុងតំបន់ឧទ្យានជាតិគិរីរម្យ។ លោកថា៖ «កំពុងចុះធ្វើរឿងហើយ យើងកំពុងធ្វើការហ្នឹងមិនទាន់មានករណីណាទៀតទេ។ មិនទាន់មានអ្វីបកស្រាយបានទេ»។
យោងតាមឯកសារជាច្រើនសន្លឹក និងការចុះផ្សាយរបស់សារព័ត៌មាន Fresh News កាលពីថ្ងៃទី ៦ កក្កដា បានឲ្យដឹងថាលោក ហេង សុខា និងកូនប្រសាប្រុសលោក ម៉ាង សុវណ្ណារ៉ា មានទំនាស់ជាមួយប្រជាពលរដ្ឋរឿងដីធ្លីស្ថិតនៅភូមិថ្មី ឃុំចំបក់ រហូតដល់ប្រជាពលរដ្ឋបានប្តឹងពួកគេទាំង ២ នាក់ទៅកាន់អាជ្ញាធរមានសមត្ថកិច្ចគ្រប់ជាន់ថ្នាក់។
ការប្តឹងប្តល់នេះកើតឡើងបន្ទាប់ពីលោក ហេង សុខា និងកូនប្រសា បានបង្ហាញលិខិតទិញលក់ដីក្នុងភូមិឃុំខាងលើរវាងឈ្មោះ ហង្ស សុភាព ហើយបុគ្គលទាំង ២ នាក់ ឪពុក និងកូននេះក៏បានរងការចោទថា វាយបំផ្លិចបំផ្លាញបង្គោលរបងចោលគ្មានសល់ហើយបានចូលកាន់កាប់ដីរបស់អ្នកដទៃដោយគ្មានហេតុផល។ នេះបើតាមសារព័ត៌មាន Fresh News។
ភ្នំពេញប៉ុស្តិ៍មិនអាចស្វែងរកប្រភពទាក់ទងបុគ្គលទាំង ៣ នាក់ដែលមានជម្លោះដីធ្លីនេះបានទេ។
លោកជា ហ៊ាន ប្រធានអង្គការប្រឆាំងអំពើពុករលួយ ទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋដែលកំពុងស៊ើបអង្កេតក្នុងករណីនេះ ប្រាប់ភ្នំពេញប៉ុស្តិ៍ថា ករណីនេះគឺភាគីដែលពាក់ព័ន្ធសុទ្ធតែជាអ្នកដណ្តើមកាន់កាប់ដីឧទ្យានជាតិគិរីរម្យដែលមានទំហំជាង ២ ហិកតា។
លោកបន្តថា អាជ្ញាធរភូមិឃុំក៏មានជាប់ពាក់ព័ន្ធផងដែរ ព្រោះបានចូលរួមបំពេញឯកសារដោយខុសច្បាប់។ លោកបានបញ្ជាក់ថា៖ «តាមពិតរឿងនេះមកពីអាជ្ញាធរ គាត់ចុះហត្ថលេខាផ្ទេរសិទ្ធិទៅលើលិខិតកាន់កាប់ទៅឲ្យពលរដ្ឋម្ខាងទៀត ធ្វើឲ្យមានការជាន់គ្នា។ នីតិវិធីនៃការប្រយុទ្ធនឹងអំពើខុសច្បាប់ មន្ត្រីបរិស្ថានខ្លួនឯងមិនដឹងជាគាត់ដោះស្រាយយ៉ាងម៉េច នៅពេលដោះស្រាយ បើទោះជាគាត់មិនដាក់ឈ្មោះគាត់ តែគាត់បានដាក់ឈ្មោះសាច់ញាតិគាត់ដែលនេះជាបញ្ហាមួយ»។
លោក វ៉ី សំណាង អភិបាលខេត្តកំពង់ស្ពឺព្រមានថា ខេត្តត្រូវតែដកហូតដីទាំងនោះមកវិញ ដោយសារពួកគេបានបង្កជាជម្លោះ ដើម្បីដណ្តើមកាន់កាប់ដីរដ្ឋតែប៉ុណ្ណោះ។ លោកបញ្ជាក់ថា៖ «កុំឲ្យនាំគ្នាទៅធ្វើជាឈ្លោះគ្នានៅលើដីរដ្ឋ។ នៅពេលគេធ្វើឈ្លោះគ្នាអ៊ីចឹងទៅ គេឲ្យអាជ្ញាធរដោះដល់ពេលយើងដោះទៅ កាត់ឲ្យអ្នកនេះតិច អ្នកនោះតិច ប៉ុន្តែតាមពិតដីទាំងនេះគឺជាដីរដ្ឋហ្នឹង។ បញ្ជាក់សម្រាប់អាជ្ញាធរ យើងអត់ត្រូវធ្វើអ៊ីចឹងទេ អត់មានទៅគាំទ្រអ្នកណាទេ។ អ្នកណាក៏ដោយ មន្ត្រីក៏ដោយ ឧត្តមមន្ត្រីក៏ដោយ ប្រជារាស្ត្រក៏ដោយឲ្យតែកាន់កាប់លើដីរដ្ឋដោយខុសច្បាប់គឺត្រូវតែដកហូតមកវិញ»។
បើតាមលោក វ៉ី សំណាង បន្ទាប់ពីមានការប្រកាសពីលោកនាយករដ្ឋមន្ត្រី ហ៊ុន សែន ក្នុងការផ្តល់សិទ្ធិកាន់កាប់ដល់ប្រជាពលរដ្ឋដែលរស់នៅជាយូរឆ្នាំលើដីរបស់រដ្ឋ ថ្មីៗនេះក៏មានជនឆ្លៀតឱកាសមួយចំនួនបានលួចទៅសាងសង់ផ្ទះនៅក្នុងតំបន់ឧទ្យានជាតិគិរីរម្យ។ លោកបញ្ជាក់ថា ទង្វើដណ្តើមកាន់កាប់ដីរដ្ឋក្នុងតំបន់ឧទ្យានជាតិគិរីរម្យដោយខុសច្បាប់នេះ អាជ្ញាធរត្រូវតែចាត់វិធានការតាមផ្លូវច្បាប់ជាដាច់ខាត៕
វីដេអូ៖
