ព្រះសីហនុៈ រដ្ឋបាលខេត្ដព្រះសីហនុបានបញ្ជាដល់ម្ចាស់ការដ្ឋានសំណង់ដែលសង់រំលោភច្បាប់ចំនួន ២ កន្លែងឲ្យរុះរើជាបន្ទាន់ បន្ទាប់ពីបានចុះណែនាំដល់ម្ចាស់សំណង់មួយចំនួនឲ្យគោរពច្បាប់ និងបានព្រមានអនុវត្ដវិធានការច្បាប់ ប្រសិនបើនៅបន្តសកម្មភាពល្មើសច្បាប់តទៅទៀតនោះ។
លោក លី ចិត្តនិយម ប្រធានការិយាល័យគ្រប់គ្រងការអភិវឌ្ឍនិងសំណង់សាលាខេត្តព្រះសីហនុបានប្រាប់ភ្នំពេញប៉ុស្ដិ៍ពីម្សិលមិញថា ក្រុមការងារចម្រុះដឹកនាំដោយរដ្ឋបាលខេត្តព្រះសីហនុបានណែនាំម្ចាស់ការដ្ឋានសំណង់ជាជនបរទេសដែលសង់រំលោភចំណីផ្លូវនៅកណ្ដាលក្រុងព្រះសីហនុចំនួន ២ ករណីកាលពីថ្ងៃសុក្រសប្ដាហ៍មុនដោយឲ្យរុះរើនិងវាយកម្ទេចសំណង់នោះជាបន្ទាន់។
លោកបានឲ្យដឹងថា ការដ្ឋានសំណង់ខាងលើត្រូវបានមន្ត្រីចុះណែនាំ ៤ ដងរួចមកហើយតែម្ចាស់សំណង់នៅតែបន្តធ្វើទាំងបំពាន ទើបរដ្ឋបាលខេត្ដចាត់វិធានការក្ដៅឲ្យរុះរើចេញតែម្ដងទៅ។
បើតាមលោក ចិត្ដនិយម កន្លងមកក្រុមការងារចម្រុះបានចុះហាមឃាត់និងបញ្ជាឲ្យរុះរើចេញនូវសំណង់រំលោភច្បាប់ជាច្រើនកន្លែង តែម្ចាស់សំណង់ខ្លះបានលួចសាងសង់ខណៈការវិនិយោគលើវិស័យសំណង់បាននិងកំពុងកើនឡើងខ្លាំង។
លោក ចិត្តនិយម បានបញ្ជាក់ថា៖ «ទីតាំងសំណង់ដែលរដ្ឋបាលខេត្ដឲ្យរុះរើនេះ ព្រោះម្ចាស់បានសង់រំលោភចូលដីចំណីផ្លូវប្រវែង ៣,៧ ម៉ែត្រ និងបានសង់ឡើងលើធ្វើឲ្យប៉ះបង្គោលខ្សែអគ្គិសនីផងដែរ»។ «រដ្ឋបាលខេត្ដបញ្ជាឲ្យម្ចាស់ការដ្ឋានសំណង់រុះរើចេញដោយខ្លួនឯងប្រសិនម្ចាស់សំណង់មិនអនុវត្តតាម រដ្ឋបាលខេត្តព្រះសីហនុនឹងចាត់វិធានការតាមផ្លូវច្បាប់ដោយចុះរុះរើវាយកម្ទេចនិងមិនទទួលខុសត្រូវចំពោះការខូចខាតឡើយ»។
លោកបានបង្ហាញជំហរថា នឹងបន្តបេសកកម្មនេះដោយអនុវត្តទៅតាមច្បាប់និងសេចក្តីជូនដំណឹងទាក់ទិនវិស័យសំណង់របស់រាជរដ្ឋាភិបាលនិងរដ្ឋបាលខេត្តព្រះសីហនុដើម្បីធានាបរិស្ថានល្អ និងសុខដុមនីយកម្មជាមួយអ្នកជិតខាងនិងសាធារណៈ។
លោកបានបន្ដថា៖ «ខ្ញុំសំណូមពរឲ្យម្ចាស់ការដ្ឋានសំណង់ទាំងអស់ត្រូវតែគោរពទៅតាមច្បាប់ទាំងអស់គ្នា»។
ទាក់ទងនឹងការបង្ក្រាបសំណង់សាងសង់ល្មើសច្បាប់នេះ លោក ឃាង ភារម្យ អ្នកនាំពាក្យរដ្ឋបាលខេត្ដព្រះសីហនុមិនបានបង្ហាញពីទិន្នន័យទេកាលពីម្សិលមិញដោយសំអាងថាជាថ្ងៃដែលមន្ដ្រីការិយាល័យសាលាខេត្ដសម្រាក ប៉ុន្ដែលោកបានឲ្យដឹងថា កន្លងមក អាជ្ញាធរបង្ក្រាបបានជាច្រើនករណីមានទាំងការបង្ខំក៏មាន ដោយសារម្ចាស់សំណង់មិនអនុវត្ដតាមកិច្ចសន្យា ។
លោកបានបន្តថា៖ «សំណង់មួយចំនួនបានសាងសង់ឡើងខុសបច្ចេកទេស និងស្ដង់ដារច្បាប់ដោយសាងសង់លើសចូលមកដីសាធារណៈរបស់រដ្ឋនិងឆ្នេរសមុទ្រ។ បើមិនទប់ស្កាត់ទេវានឹងក្លាយជាសំណង់អនាធិបតេយ្យ»។
មន្ត្រីសម្របសម្រួលសមាគម អាដហុក ប្រចាំខេត្តព្រះសីហនុ អ្នកស្រី ជៀប សុធារី បានលើកឡើងថា អ្នកស្រី បានឃើញក្រុមការងាររដ្ឋបាលខេត្ដព្រះសីហនុចុះទៅបង្ក្រាបសំណង់ល្មើសច្បាប់ជាបន្ដបន្ទាប់ប៉ុន្ដែអ្នកស្រីថាមិនគួរបណ្ដោយឲ្យសកម្មភាពខុសច្បាប់បែបនេះកើតឡើងដដែលៗនោះទេ។
អ្នកស្រីបន្តថា៖ «ភាគច្រើនសំណង់ធំៗជារបស់ក្រុមហ៊ុនរបស់ជនបរទេសហើយកន្លែងដែលមានបញ្ហាភាគច្រើនគឺជនជាតិចិនជាអ្នកម៉ៅការសំណង់ ។ យើងឃើញមន្ដ្រីរបស់រដ្ឋបាលខេត្ដមួយក្រុមបានចុះត្រួតពិនិត្យនៅតាមការដ្ឋានសំណង់រាល់ថ្ងៃ ប៉ុន្ដែបើចុះពិនិត្យឬបង្ក្រាបសុំឲ្យមន្ដ្រីកុំមានការពុករលួយ គឺត្រូវអនុវត្ដទៅតាមច្បាប់»៕