.jpg)
ពលរដ្ឋជនជាតិដើមភាគតិចមកតវ៉ារឿងដីភ្នំដោះក្រមុំ នាពេលកន្លងមក។ រូបថត សហការី
មណ្ឌលគីរីៈ រដ្ឋបាលខេត្តមណ្ឌលគិរី និងមន្ទីររៀបចំដែនដីខេត្តបានសហការគ្នាចំណាយពេល ២ ថ្ងៃ ក្នុងការបោះបង្គោលថ្មចំនួន ៥៣ បង្គោល នៅជុំវិញភ្នំដោះក្រមុំ ដើម្បីការពារភ្នំនេះកុំឲ្យមានការរំលោភយកតទៅទៀត។ ប៉ុន្តែសហគមន៍ជនជាតិដើមអះអាងថាការបោះបង្គោលនោះគឺមិនបានអនុវត្តទៅតាមអនុសាសន៍របស់នាយករដ្ឋមន្ត្រីដែលប្រកាសឱ្យដកហូតយកដីរបស់ភ្នំដោះក្រមុំទាំងអស់ដែលត្រូវគេរំលោភ ទុកធ្វើជារបស់រដ្ឋវិញឡើយ។
លោក គ្រើង តុលា លេខាធិការនៃគណៈកម្មាធិការមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំបានប្រាប់ភ្នំពេញប៉ុស្ដិ៍កាលពីថ្ងៃសុក្រថា រដ្ឋបាលខេត្តមណ្ឌលគិរី និងមន្ទីរដែនដីខេត្តបានចុះទៅបោះបង្គោលដើម្បីកំណត់ទីតាំងភ្នំដោះក្រមុំដែលត្រូវរដ្ឋាភិបាលបង្កើតជាមជ្ឈមណ្ឌលវប្បធម៌ជនជាតិភាគតិច។
ប៉ុន្តែលោកថាខាងសហគមន៍ចំនួន ២០ នាក់ និងតំណាងពីក្រសួងវប្បធម៌ដែលចុះទៅចូលរួមធ្វើជាសាក្សីក្នុងការបោះបង្គោលនោះគឺបានជំទាស់ និងដើរចេញពីកន្លែងបោះបង្គោលវិញ បន្ទាប់ពីពិនិត្យឃើញថា ការបោះបង្គោលរបស់រដ្ឋបាលខេត្ត និងមន្ទីរដែនដីនេះគឺនៅតែធ្វើឱ្យបាត់បង់ដីរបស់ភ្នំដោះក្រមុំដដែល និងមិនបានអនុវត្តឱ្យបានត្រឹមត្រូវតាមសម្ដីរបស់លោកនាយករដ្ឋមន្ត្រី ហ៊ុន សែន នោះទេ។
លោកថា៖ «ការចុច (GPS) បោះបង្គោលហ្នឹងគឺមានតែ ៨៥ ហិកតាជាងទេ។ ប៉ុន្តែលិខិតដែលយើងដាក់ទៅសម្ដេចរួចហើយហ្នឹង គឺថាយើងយកតាម ស.ជ.ណ របស់រដ្ឋាភិបាលកាលពីឆ្នាំ ២០០២ ជាគោលគឺភ្នំដោះក្រមុំមានទំហំ ១០២ ហិកតា។ បើធ្វើតាមហ្នឹងគឺជាការអនុវត្តតាមអនុសាសន៍របស់នាយករដ្ឋមន្ត្រី»។
លោក គ្រើង តុលា បញ្ជាក់ថាការបោះបង្គោលនេះគឺមិនបានរាប់បញ្ចូលទាំងដីដែលត្រូវរំលោភយកដោយប្រជាពលរដ្ឋចំនួន ៨៦ គ្រួសារនៅលើភ្នំដោះក្រមុំឡើយ ហើយក៏មិនបានបូកបញ្ចូលដីដែលរដ្ឋបាលខេត្តសម្រេចដកមកវិញ ក្រោយពីបដិសេធឈប់ឱ្យមានការកាត់ដីនៅលើភ្នំដោះក្រមុំឱ្យក្រសួងចំនួន ៣ គឺក្រសួងធនធានទឹក ក្រសួងរ៉ែ និងក្រសួងឧស្សាហកម្មសម្រាប់បង្កើតការិយាល័យរបស់ក្រសួងទាំងនោះដែរ។
លោក តុលា អះអាងថានៅពេលបច្ចុប្បន្ននេះ ខាងសហគមន៍កំពុងរៀបចំធ្វើលិខិតដាក់ទៅកាន់លោកនាយករដ្ឋមន្ត្រី ហ៊ុន សែន ដើម្បីស្នើសុំឱ្យមានកិច្ចអន្តរាគមន៍ដកហូតដីភ្នំដោះក្រមុំទាំង ១០២ ហិកតាត្រឡប់មកជាសម្បត្តិរដ្ឋវិញ។
លោក ឈឹម កាន អភិបាលរងខេត្តមណ្ឌលគិរីបានឲ្យដឹងថា ការបោះបង្គោលដើម្បីកំណត់ទីតាំងព្រំប្រទល់របស់ភ្នំដោះក្រមុំដែលមាន ៥៣ បង្គោលលើទំហំផ្ទៃដីសរុបជាង ៨៥ ហិកតា គឺធ្វើឡើង ២ ថ្ងៃចាប់ពីថ្ងៃទី ៥ ដល់ថ្ងៃទី ៦ ខែធ្នូ។ ការបោះបង្គោលនេះគឺធ្វើឡើងបន្ទាប់ពីមានការឯកភាពនៅក្នុងកិច្ចប្រជុំអន្តរក្រសួងមួយ និងលិខិតសម្រេចរបស់ក្រសួងដែនដីមួយទៀត ដែលឱ្យចុះបញ្ជីចំពោះតំបន់ដែលមានសុវត្ថិភាពជាមុន ហើយលោកថាចំពោះដីដែលនៅមានជម្លោះនៅឡើយ គឺត្រូវទុកដើម្បីពិភាក្សាគ្នាដោះស្រាយនៅពេលក្រោយទៀត។
ការបោះបង្គោលនេះ គឺជាដំណើរការមួយក្នុងការឈានទៅចុះបញ្ជីដីនៅលើភ្នំដោះក្រមុំតាមការស្នើសុំរបស់ក្រសួងវប្បធម៌ ហើយតាមនីតិវិធីក្នុងដំណាក់កាលចុះបញ្ជីខាងខេត្តក៏នឹងរង់ចាំទទួលបានបណ្ដឹងតវ៉ាពីខាងប្រជាពលរដ្ឋដែរ។
លោកថា៖ «ជំហានដំបូងយើងបោះបង្គោលសិនដើម្បីស្នើសុំចុះបញ្ជី»។
លោក ម៉ៅ ចំរើន ប្រធានមន្ទីរដែនដីខេត្តមណ្ឌលគិរីបានលើកឡើងដែរថា ដីដែលបម្រុងឱ្យក្រសួងចំនួន ៣ សម្រាប់បង្កើតការិយាល័យនោះគឺត្រូវដកហូតមកវិញហើយ។ រីឯការបោះបង្គោលដើម្បីរៀបចំចុះបញ្ជីនៅពេលនេះគឺដើម្បីកុំឱ្យមានការរំលោភទន្ទ្រានយកដីលើភ្នំដោះក្រមុំបន្ថែមទៀត ហើយមិនមែនមានន័យថា ឈប់ដោះស្រាយដើម្បីដកហូតយកដីដែលត្រូវបានគេរំលោភយកនាពេលកន្លងមកឡើយ។
លោកថា៖ «យើងមិនទាន់បានដោះស្រាយចប់សព្វគ្រប់ទេ ហើយដូចជម្រាបអ៊ីចឹង យើងបោះបង្គោលព្រំវាស់វែងចុះបញ្ជីកន្លែងដែលយើងគិតថាមានសុវត្ថិភាព គឺចុះបញ្ជីប៉ុណ្ណឹងសិន ព្រោះខ្លាចត្រូវបានរំលោភបន្ថែមទៀត»។
លោក គ្រើង តុលា បានឲ្យដឹងថា តាម ស.ជ.ណ ឆ្នាំ ២០០២ ដីមជ្ឈមណ្ឌលវប្បធម៌ជនជាតិដើមភាគតិចភ្នំដោះក្រមុំគឺមានចំនួន ១០២ ហិកតា ប៉ុន្តែក្រោយមកដីភ្នំនេះត្រូវបានគេទន្ទ្រានយកអស់ចំនួននៅសល់តែ ៩១ ហិកតាកាលពីឆ្នាំ ២០០៩ ដោយសារតែអតីតអភិបាលខេត្តចាស់ខ្វះការយកចិត្តទុកដាក់។ លុះនៅពេលនេះគឺនៅសល់តែជាង ៨៥ ហិកតា។
លោក អ៊ាង ម៉េងលី អ្នកសម្របសម្រួលសមាគមអាដហុកប្រចាំខេត្តមណ្ឌលគិរីបានឲ្យដឹងថា អាជ្ញាធរគួរតែដោះស្រាយបញ្ហាដីធ្លីនៅលើភ្នំដោះក្រមុំឱ្យចប់សព្វគ្រប់ជាមុនសិន មុនមានការបោះបង្គោលចុះបញ្ជីបែបនេះ ដើម្បីចៀសវាងការព្រួយបារម្ភខ្លាចបាត់បង់ដីរដ្ឋ។
លោកថា៖ «ខ្ញុំសង្កេតឃើញថា ការដោះស្រាយដីនៅលើភ្នំដោះក្រមុំមានការអូសបន្លាយវែងឆ្ងាយ (អាជ្ញាធរ) គួរតែអនុវត្តវិធានការតាមប្រសាសន៍របស់សម្ដេចនាយករដ្ឋមន្ត្រី ដើម្បីដោះស្រាយបញ្ហាហ្នឹងឱ្យឆាប់ចប់សព្វគ្រប់»៕
