.jpg)
សមត្ថកិច្ចខេត្តព្រះសីហនុរុះរើស្លាកប្រើពាក្យពេចន៍ខុសឆ្គង។ សហការី
ព្រះសីហនុៈ អាជ្ញាធរខេត្តព្រះសីហនុ បានព្រមានចាត់វិធានការរុះរើនិងបិទទីតាំងអាជីវកម្មជាបណ្ដោះសន្ន ចំពោះម្ចាស់គ្រឹះស្ថាន សិប្បកម្ម និងអាជីវកម្មទាំងឡាយណា ដែលបន្តប្រើប្រាស់ស្លាកពាណិជ្ជកម្ម ដែលផ្ទុយពីគោលការណ៍ណែនាំ ខណៈដែលបច្ចុប្បន្នខេត្តជាប់មាត់សមុទ្រមួយនេះមានជន បរទេសប្រមាណជាង ៧ ម៉ឺននាក់ កំពុងស្នាក់នៅ ប្រកបមុខរបរនិងធ្វើការងារផ្សេងៗ ក្នុងនោះភាគច្រើនគឺជនជាតិចិន។
លោក ឃាង ភារម្យ អ្នកនាំពាក្យសាលាខេត្តព្រះសីហនុ ប្រាប់ភ្នំពេញប៉ុស្តិ៍កាលពីថ្ងៃចន្ទថា ចាប់ពីថ្ងៃនេះតទៅ រាល់ស្លាកផ្សព្វផ្សាយពាណិជ្ជកម្មទាំងអស់ ដែលធ្វើឡើងខុសពីបទដ្ឋានបច្ចេកទេសដូចជាការប្រើពាក្យពេចន៍ខុសឆ្គង សរសេរខុសអក្ខរាវិរុទ្ធ ឬសរសេរតែភាសាបរទេសមិនមានភាសាខ្មែរ មិនត្រឹមតែត្រូវកាត់ទម្លាក់ទេ ប៉ុន្តែទីតាំងគ្រឹះស្ថាន អាជីវកម្ម និងសិប្បកម្មទាំងនោះ អាចនឹងត្រូវបិទទ្វារជាបណ្ដោះអាសន្នផងដែរ បើរកឃើញថា ម្ចាស់ទីតាំងមិនមានការកែប្រែក្រោយពីមានការអប់រំណែនាំម្ដង ឬ ២ ដងពីមន្ត្រីជំនាញ។
លោកថ្លែងថា៖ «កន្លងមកយើងបានធ្វើការអប់រំណែនាំឲ្យម្ចាស់គ្រឹះស្ថាន អាជីវកម្ម សិប្បកម្មទាំងអស់ធ្វើការកែតម្រូវ អក្ខរាវិរុទ្ធ និងខ្លឹមសារនៅលើស្លាកផ្សព្វផ្សាយពាណិជ្ជកម្មរបស់ពួកគេឲ្យបានត្រឹមត្រូវ ប៉ុន្តែពេលនេះ យើងនឹងចាត់វិធានការរដ្ឋបាលតឹងរុឹងបំផុត ដោយបិទការធ្វើពាណិជ្ជកម្មរហូតដល់ម្ចាស់ទីតាំងទាំងនោះ បានធ្វើការកែតម្រូវ ស្របតាមបទដ្ឋានបច្ចេកទេស និងគតិយុត្ត ដែលមានជាធរមាន»។
លោកថា៖ «ចំពោះម្ចាស់អាជីវកម្ម ជាជនបរទេសមិនត្រឹមតែប្រឈមការបិទផ្អាកអាជីវកម្មជាបណ្ដោះអាសន្នទេ ថែមទាំងអាចនឹងត្រូវឃាត់ខ្លួន យកមកអប់រំណែនាំ នៅអធិការដ្ឋាន ឬស្នងការដ្ឋាននគរបាលអន្តោប្រវេសន៍ផងដែរក្នុងករណីរកឃើញថា ពួកគេគ្មានឯកសារបញ្ជាក់អំពីភាពស្របច្បាប់ដើម្បីបើកអាជីវកម្មនៅកម្ពុជា»។
បើតាមលោកភារម្យការព្រមានអំពីចំណាត់ការដ៏តឹងរឹុងនេះ គឺជាវិធានការថ្មីមួយទៀតរបស់លោក គួច ចំរើន អភិបាលខេត្តព្រះសីហនុ ដើម្បីធ្វើឲ្យប្រសើរឡើងនូវការគ្រប់គ្រងរដ្ឋបាលសាធារណៈ និងការគ្រប់គ្រងការធ្វើពាណិជ្ជកម្ម អាជីវម្មរបស់ពលរដ្ឋ ក៏ដូចជាការគ្រប់គ្រងស្ថិតិជនអន្តោប្រវេសន៍។
កន្លងមកក្រុមសមត្ថកិច្ចជំនាញបានត្រួតពិនិត្យរកឃើញមានស្លាកផ្សព្វផ្សាយពាណិជ្ជកម្មរាប់រយបានប្រើប្រាស់ពាក្យពេចន៍មិនសមស្រប ឬមានខ្លឹមសារអសុរោះដូចជា «តូបលក់សាច់កម្ពុជា, កំពូឡឆ្នេរហាងលក់នាយកដ្ឋាន,» និងមានស្លាកផ្សព្វផ្សាយពាណិជ្ជកម្មជាច្រើនទៀតដែលសរសេរអក្សរបញ្រ្ចាសជើង ខុសអក្ខរាវិរុទ្ធ ឬសរសេរតែភាសាបរទេស គ្មានភាសាខ្មែរ។
ភាពខុសឆ្គងទាំងនេះ គឺដោយសារតែម្ចាស់អាជីវកម្មជាជនបរទេសទាំងនោះ បានបោះពុម្ពស្លាកពាណិជ្ជកម្ម ដោយខ្លួនឯង និងពឹងផ្អែកការបកប្រែតាម Google Translate ហើយភាគច្រើននៃអាជីវកម្មរបស់ពួកគេគឺគ្មានច្បាប់អនុញ្ញាត។
លោក ដេត ណូ ប្រធានមន្ទីរវប្បធម៌ និងវិចិត្រសិល្បៈខេត្តព្រះសីហនុ ថ្លែងថា នៅពេលនេះក្រុមការងាររបស់លោក កំពុងបន្តចុះត្រួតពិនិត្យនៅគ្រប់ទីប្រជុំជននៃបណ្ដាស្រុក ក្រុង ទូទាំងខេត្តព្រះសីហនុ ដើម្បីរុះរើ និងអប់រំណែនាំឲ្យម្ចាស់ទីតាំង ធ្វើការកែសម្រួលឡើងវិញ។
លោកបន្តថា ក្នុងរយៈពេល ៧ ខែកន្លងមកនេះ ក្រុមការងាររបស់លោកបានរុះរើ ស្លាកផ្សព្វផ្សាយពាណិជ្ជកម្មធំ តូច និងមធ្យមដែលខុសបទដ្ឋានបច្ចេកទេស និងបទដ្ឋានគតិយុត្តនៃកម្ពុជាសរុបចំនួន ៤៥០ ផ្ទាំង និងបានប្រកាសបិទជាបណ្ដោះអាសន្ន ទីតាំងបោះពុម្ពស្លាកពាណិជ្ជកម្មខុសច្បាប់ចំនួន ២ ទីតាំងផងដែរ ដោយបានធ្វើការអប់រំណែនាំឲ្យម្ចាស់ទីតាំងទាំងនោះ ធ្វើការកែតម្រូវ និងសុំច្បាប់អនុញ្ញាតធ្វើអាជីវកម្ម។
លោកបន្តថា៖ «ស្លាកពាណិជ្ជកម្មដែលមានលក្ខណៈខុសឆ្គងទាំងនោះភាគច្រើនជារបស់ពាណិជ្ជករជនជាតិចិន»។
ខេត្តព្រះសីហនុ នាពេលបច្ចុប្បន្ន មានជនបរទេស ៦១ សញ្ជាតិ មានចំនួនសរុបជាង ៧ ម៉ឺននាក់ កំពុងស្នាក់នៅនិងបម្រើការងារ ព្រមទាំងបើកអាជីវកម្មប្រកបមុខរបរផ្សេងៗ។ ក្នុងនោះជនជាតិចិនមានចំនួនច្រើនជាងគេលើសលប់បន្ទាប់មកគឺ មីយ៉ាន់ម៉ា ឥណ្ឌូនេស៊ី និងហ្វីលីពីន។ នេះបើយោងតាម លោក ជួន ណារិន្ទ ស្នងការនគរបាលខេត្តព្រះសីហនុ។
លោក ជួន ណារិន្ទ បញ្ជាក់ថា៖ «យោងតាមការចុះធ្វើបញ្ជីបច្ចុប្បន្នភាពនាពេលថ្មីៗនេះ ជនអន្តោប្រវេសន៍ ដែលកំពុងស្នាក់នៅនិងបំពេញការងាររកស៊ីនៅខេត្តព្រះសីហនុ យើងមានជាង ៤ ម៉ឺននាក់ ប៉ុន្តែ បើគិតពីសម្ទុះនៃការស្នាក់នៅ និងបំពេញការងារចល័ត ភ្នំពេញ ក្រុងព្រះសីហនុ និងខេត្តផ្សេងទៀត គឺមានជាង ៧ ម៉ឺននាក់»៕
