ភ្នំពេញៈ លោក ឃួង ស្រេង អភិបាលរាជធានីភ្នំពេញ ស្នើជាថ្មីឲ្យប្រជាពលរដ្ឋដែលមានលំនៅឋាននៅលើប្រឡាយបឹងត្របែកត្រូវរំកិលផ្ទះចេញជាបណ្តោះអាសន្ន ដើម្បីធ្វើការស្តារប្រឡាយ និងបុកស៊ីផាយស្ថាបនាប្រឡាយឡើងវិញ ដែលជាប្រយោជន៍សម្រាប់ទប់ស្កាត់ជំនន់ទឹកភ្លៀងលិចទីក្រុង។
ការប្រកាសជាថ្មីនេះ បានធ្វើឡើងអំឡុងពេល លោកដឹកនាំមន្ត្រីជំនាញអាជ្ញាធរមូលដ្ឋានចុះពិនិត្យស្ថានភាពប្រឡាយបឹងត្របែក ក្នុងសង្កាត់ផ្សារដើមថ្កូវ ខណ្ឌចំការមន រាជធានីភ្នំពេញកាលពីថ្ងៃអង្គារ។ លោកអភិបាល ជំរុញការស្ថាបនាជញ្ជាំងបេតុងសងខាងប្រឡាយ ដែលនៅសេសសល់ប្រមាណ ៥០% ទៀតឲ្យបានរួចរាល់ និងជំរុញឲ្យធ្វើការស្ដារភក់សំរាម ចេញពីប្រឡាយដើម្បីឱ្យទឹកហូរបានលឿនទៅស្ថានីយបូមទឹកបឹងត្របែក និងបញ្ចៀសការជន់លិចក្នុងតំបន់នោះនារដូវវស្សានេះ។
លោក ឃួង ស្រេង ថ្លែងថា ដោយសារតែឥឡូវនេះ មនុស្សនៅក្នុងទីក្រុងភ្នំពេញកាន់តែច្រើន ឯប្រឡាយនេះ នៅដដែល ហើយការរំដោះទឹកចេញពីរាជធានី មិនទាន់សភាពការណ៍ ទើបលោកជំរុញឲ្យមានការជួសជុល ស្តារឡើងវិញ។ ធ្វើយ៉ាងណាឲ្យប្រព័ន្ធប្រឡាយនេះប្រទាក់ក្រឡាគ្នា ហូរមកស្ថានីយនេះតែមួយ ដែលអាចមានសមត្ថភាពបូមទឹកបានលឿន។
លោកបញ្ជាក់ថា៖ «ឥឡូវនេះ ដូចអស់លោកបានឃើញនឹងភ្នែកស្រាប់ហើយ ស្ថានីយបឹងត្របែករបស់យើងនេះ ដំឡើងម៉ូទ័របូមទឹក ១១ គ្រឿង។ ប៉ុន្តែយើងនៅបញ្ហាមួយដែលមកពិនិត្យថ្ងៃនេះហ្នឹង គឺបញ្ហាប្រឡាយយើងមានបងប្អូនគាត់មករស់នៅលើប្រឡាយ ដែលយើងត្រូវការបុកស៊ីផាយ ធ្វើយ៉ាងណាឲ្យប្រឡាយរបស់យើងកាយដីឲ្យអស់ពីប្រឡាយ»។
បើតាមលោក ឃួង ស្រេង បច្ចុប្បន្ន អាជ្ញាធរទើបតែធ្វើការកាយដីមមោកពីប្រឡាយប្រមូល បាន ៦ ពាន់ម៉ែត្រគុបប៉ុណ្ណោះ ខណៈដីប្រភេទនេះ អាចមានប្រហែល ៤ ទៅ ៥ ម៉ឺនម៉ែត្រគុបទៀតនៅក្នុងប្រឡាយ ដែលតម្រូវឲ្យមានការប្រមូលយកចេញ។ អ្នកជំនាញត្រូវតែវាយតម្លៃឲ្យបានស៊ីជម្រៅ និងទាន់សភាពការណ៍ក្នុងការស្តារ និងជួសជុលប្រឡាយនេះ។
លោក ម៉េត មាសភក្តី អ្នកនាំពាក្យ សាលារាជធានីភ្នំពេញប្រាប់ភ្នំពេញប៉ុស្តិ៍ពីម្សិលមិញថា ការ ប្រកាសនៅពេលនេះ គឺជាការជូនដំណឹងដល់ប្រជាពលរដ្ឋទូទៅ ដែលកំពុងរស់នៅជាប់ប្រឡាយបឹងត្របែក ដែលអាចនឹងប៉ះពាល់នៅពេលអាជ្ញាធរចាប់ផ្តើមជួសជុល និងស្តារប្រឡាយនេះ។ លោកបន្តថា ដោយសារមន្ត្រីជំនាញទើប តែចាប់ផ្តើមសិក្សា ដូច្នេះចំនួនតួលេខនៃផលប៉ះពាល់ដល់ប្រជាពលរដ្ឋក្នុងតំបន់នេះ នៅមិនទាន់មាននោះទេ។
លោកបញ្ជាក់ថា៖ «យើងប្រកាសនៅពេលនេះ ដើម្បីធ្វើទាំងព្រម ដោយឲ្យប្រជាពលរដ្ឋបានដឹងថាផ្ទះគាត់ប៉ះមិនប៉ះ។ បើប៉ះពាល់គួរតែត្រៀមខ្លួនឯងឲ្យហើយក្នុងការរៀបចំបង្កលក្ខណៈចូលរួមជាមួយអាជ្ញាធរ។ ដោយសារតែការងារនេះ កំពុងសិក្សាវាយតម្លៃ ដូច្នេះយើងមិនទាន់អាចបញ្ជាក់បានទេ ដោយយើងកំពុងផ្សព្វផ្សាយ និងរៀបចំឲ្យបងប្អូនយើង ដែលកំពុងនៅមាត់ប្រឡាយ ត្រៀមខ្លួនឲ្យហើយ»។
លោក ថេង សុថុល អភិបាលខណ្ឌចំការមន ប្រាប់ភ្នំពេញប៉ុស្តិ៍ពីថ្ងៃអង្គារថា កន្លងទៅគម្រោងការស្តារប្រឡាយនេះ បានផ្អាកដោយសារតែប៉ះពាល់ផ្ទះប្រជាពលរដ្ឋ។ ដូច្នេះនៅពេលនេះគួរតែដល់ពេលដែលគម្រោងត្រូវបន្តហើយ។ លោកស្នើឲ្យប្រជាពលរដ្ឋទាំងអស់ដែលរងផលប៉ះពាល់ចូលរួមសហការក្នុងការរំកិលផ្ទះចេញពីប្រឡាយ។
លោកបញ្ជាក់ថា៖ «ប្រជាពលរដ្ឋកាលពីកន្លងមក ដែលយើងបានប្រកាស គឺមានការឯកភាពច្រើនជាមួយនឹងការស្នើនេះ។ ក៏ប៉ុន្តែយើងកំពុងបន្តយុទ្ធនាការនេះបន្តទៀត គឺជាការបន្តសកម្មភាពចាស់ ដើម្បីស្តារឲ្យបានល្អប្រសើរ ដោយប្រជាពលរដ្ឋរំកិលផ្ទះ។ ឧបមាថា រំកិលពីកន្លែងប៉ះពាល់ហ្នឹងឲ្យផុត ដើម្បីអាចយកគ្រឿងចក្រទៅកាយបន្តទៀត។ ដូច្នេះការរំកិលផ្ទះចេញពីប្រឡាយនេះ គឺមិនមានការផ្លាស់ប្តូរទៅណាទេ។ ព្រោះអីពេលរំកិលផុតពីកន្លែងហ្នឹង ពេល (បញ្ចប់ការដ្ឋាន) ហើយ គឺឲ្យគាត់មកទីតាំងចាស់វិញដដែលទេ ហើយថែមទាំងយើងជួយសម្របសម្រួលជាថវិកាប្រមាណ ២០ ម៉ឺន[រៀល] ក្នុង ១ គ្រួសារទៀតផង»។
លោក សឿង សារ៉ន នាយកប្រតិបត្តិស្ដីទីនៃសមាគមធាងត្នោត ដែលធ្វើការចងក្រងសហគមន៍ក្នុងតំបន់នេះ បានប្រាប់ភ្នំពេញប៉ុស្តិ៍ ពីថ្ងៃអង្គារថា ការដែលមានប្រជាពលរដ្ឋស្ទាក់ស្ទើរក្នុងការរំកិល ឬរើលំនៅឋានរបស់ខ្លួននោះ ព្រោះតែពួកគេ បារម្ភ និងមិនទាន់មានទំនុកចិត្ត ដោយសារតែអាជ្ញាធរ ហាក់មិនបានបង្ហាញភាពជាក់លាក់ ឬប្រកាសជាលាយលក្ខណ៍អក្សរនោះទេ។ លោកថា ប្រជាពលរដ្ឋដែលរស់នៅតំបន់នេះ គឺសុទ្ធតែពេញចិត្តនឹងការអភិវឌ្ឍ ជាពិសេសការកែលម្អប្រឡាយឲ្យមានសោភណភាព និងអាចជាប្រព័ន្ធរំដោះទឹកដ៏មានប្រសិទ្ធភាព។
លោកបញ្ជាក់ថា៖ «ការស្តារប្រឡាយជាផ្នែកមួយនៃការរំដោះ ទឹកចេញពីរាជធានី ប៉ុន្តែអ្វី ដែលត្រូវគិតមែនទែន ដូចជាតំបន់នៅក្នុងបឹងទំពុនហ្នឹង ចាប់ផ្តើមរួមតូចបន្តិចម្តងៗ តាមរយៈការផ្តល់ទៅឲ្យក្រុមហ៊ុនឬឯកជន។ ដូច្នេះបញ្ហា និងដំណោះស្រាយ នៅតែមាននៅពេលមានការជជែក បើកចំហ រវាងអ្នកពាក់ព័ន្ធ ដើម្បីរកដំណោះស្រាយ និងចំណុចយល់ស្របគ្នា ចៀសវាងមានពាក្យ ចចាមអារ៉ាមផ្សេងៗ។ ដូច្នេះលើក ទឹកចិត្តឲ្យអាជ្ញាធរពាក់ព័ន្ធ និងប្រជាពលរដ្ឋហ្នឹង យកបញ្ហាមកដាក់លើតុ ដើម្បីចរចា»៕