.jpg)
លោក ហេង រតនា អគ្គនាយក ស៊ីម៉ាក់ ពេលចុះជួបជាមួយក្រុមប្រតិបត្តិការ។ រូបថត FN
ភ្នំពេញៈ សហរដ្ឋអាមេរិកក្រោយពីប្រកាសផ្អាកផ្តល់ជំនួយដល់កម្ពុជាពាក់ព័ន្ធនឹងការលើកឡើងថាប្រជាធិបតេយ្យក្នុងប្រទេសនេះកំពុងដើរថយក្រោយតាមរយៈការបិទប្រព័ន្ធផ្សព្វផ្សាយឯករាជ្យ អង្គការនានា និងការរំលាយគណបក្សសង្គ្រោះជាតិដែលជាបក្សប្រឆាំងដ៏ធំនោះ ឥឡូវបានងាកមកផ្តល់ជំនួយមួយផ្នែកវិញជាង ១ លានដុល្លារលើគម្រោងកម្ចាត់មីន។
តាមសេចក្តីប្រកាសព័ត៌មានថ្ងៃទី ៣០ ខែឧសភាមជ្ឈមណ្ឌលសកម្មភាពកំចាត់មីនកម្ពុជាបានឲ្យដឹងថា រដ្ឋាភិបាលសហរដ្ឋអាមេរិកតាមរយៈការិយាល័យកាត់បន្ថយសព្វាវុធនៃក្រសួងការបរទេសសហរដ្ឋអាមេរិកបានផ្តល់ជំនួយឥតសំណងដើម្បីគាំទ្រដល់សកម្មភាពកម្ចាត់មីន និងសំណល់ជាតិផ្ទុះពីសង្គ្រាមរបស់មជ្ឈមណ្ឌលសកម្មភាពកំចាត់មីនកម្ពុជា (ស៊ីម៉ាក់) ក្នុងការអនុវត្តគម្រោងស្រាវជ្រាវព័ត៌មាន និងកិច្ចប្រតិបត្តិការបោសសម្អាតសំណល់គ្រាប់បែកចង្កោមនៅតំបន់ខាងកើតប្រទេសកម្ពុជាដែលត្រូវអនុវត្តសហការរួមគ្នារវាងអង្គការជាដៃគូជំនួយនៃប្រជាជនន័រវែស (NPA) និងអង្គភាពស៊ីម៉ាក់។
គម្រោងនេះសហរដ្ឋអាមេរិកបានផ្តល់ថវិកាមកអង្គភាពស៊ីម៉ាក់ផ្ទាល់ចំនួនសរុប ១.៦០០.០០០ ដុល្លារអាមេរិកសម្រាប់រយៈពេល ១២ ខែ (មីនា ២០១៨-កុម្ភៈ ២០១៩) ។ ជំនួយនេះគាំទ្រកម្លាំងប្រតិបត្តិការរបស់អង្គភាពស៊ីម៉ាក់ចំនួន ១៩១ នាក់ដែលត្រូវប្រតិបត្តិការនៅខេត្តកំពង់ចាម ក្រចេះ ត្បូងឃ្មុំ ព្រៃវែង ស្វាយរៀង និងខេត្តស្ទឹងត្រែង។
ដើម្បីសម្រេចបានក្នុងរយៈពេលនៃការអនុវត្តគម្រោង ស៊ីម៉ាក់បានដាក់ចេញគោលដៅសំខាន់ ៣ ទី ១ ពង្រាយកម្លាំងស្រាវជ្រាវព័ត៌មានតំបន់សង្ស័យសំណល់គ្រាប់បែកចង្កោមលើផ្ទៃដីចំនួន ៣០០០ ហិកតានៃ ៧៦៨ ភូមិ។ ទី ២ ពង្រាយកម្លាំង បោសសម្អាតតំបន់រងផលប៉ះពាល់ដោយសំណល់គ្រាប់បែកចង្កោមចំនួន ២២០០ ហិកតា និងទី ៣ រៀបចំផែនការយុទ្ធសាស្ត្រដើម្បីរំដោះតំបន់សំណល់គ្រាប់បែកចង្កោមទាំងអស់ពីតំបន់ទិសខាងកើតប្រទេសក្នុងន័យគាំទ្រដល់ផែនការជាតិ សកម្មភាពមីន ២០១៨-២០២៥។
សហរដ្ឋអាមេរិកចាប់តាំងពីឆ្នាំ ២០១៧ មកក្រោយពេលស្ថានភាពនយោបាយនៅកម្ពុជាមានភាពចម្រូងចម្រាសរហូតឈានដល់បិទប្រព័ន្ធផ្សព្វផ្សាយឯករាជ្យ អង្គការអន្តរជាតិ ការរំលាយគណបក្សសង្គ្រោះជាតិ និងចាប់មេដឹកនាំបក្ស លោក កឹម សុខា ដាក់គុក ប្រទេសមហាអំណាចមួយនេះបានសម្រេចបិទការផ្តល់ជំនួយមកឲ្យប្រទេសកម្ពុជា។ ការព្យួរជំនួយគឺជាការដាក់ទណ្ឌកម្មមួយផ្នែកមកលើរដ្ឋាភិបាលលោកនាយករដ្ឋមន្ត្រី ហ៊ុន សែន ដោយចោទថាកម្ពុជាក្រោមការដឹកនាំរបស់គណបក្សប្រជាជនកម្ពុជារបស់លោក ហ៊ុន សែន មានការរំលោភសិទ្ធិមនុស្សរឹតត្បិតសេរីភាពក្នុងការសម្តែងមតិ។
អ្នកវិភាគនយោបាយ និងស្រាវជ្រាវបញ្ហាសង្គមលោកបណ្ឌិត មាស នី ថ្លែងថា ការងាកមកផ្តល់ជំនួយដល់កម្ពុជាពីសំណាក់សហរដ្ឋអាមេរិកវិញនេះ មានន័យថាអាមេរិកមិនចង់បិទទ្វារទាំងស្រុងនោះទេ គឺទុកច្រកខ្លះសម្រាប់កម្ពុជា។ លោកថាការផ្តល់ជំនួយបែបនេះគឺជាផ្នែកមួយនៃជំនួយសម្រាប់មនុស្សធម៌ ដែលជំនួយនេះមិនពាក់ព័ន្ធនឹងការផ្តល់ទៅរដ្ឋាភិបាលក្នុងរឿងនយោបាយទៅលើផ្នែកផ្សេងៗរបស់រដ្ឋាភិបាលនោះទេ។
លោក មាស នី បញ្ជាក់ថា៖ «ខ្ញុំមើលទៅទំនងដូចជាសហរដ្ឋអាមេរិកនៅតែទុកច្រកទ្វារខ្លះសម្រាប់ធ្វើឲ្យមានការបើកផ្លូវកុំឲ្យបិទជិតពេក។ បើបិទជិតពេកវាធ្វើឲ្យរដ្ឋាភិបាលកម្ពុជាហ្នឹងគ្មានច្រកចេញ ហើយបើកាលណាគ្មានច្រកចេញគឺផ្អែកទៅលើចិនកាន់តែខ្លាំងហើយ។ បើកាលណាផ្អែកទៅលើចិនកាន់តែខ្លាំងគឺប្រជាធិបតេយ្យមានភាពគ្រោះថ្នាក់កាន់តែធ្ងន់»។
លោក ហេង រតនា អគ្គនាយកមជ្ឈមណ្ឌលសកម្មភាពកំចាត់មីនកម្ពុជា មិនអាចទាក់ទងបានទេកាលពីថ្ងៃម្សិលមិញ៕
