.jpg)
ពលរដ្ឋនៅអាមេរិកតវ៉ាប្រឆាំងនឹងការនិរទេសខ្មែរចេញពីអាមេរិកត្រឡប់មកកម្ពុជាកន្លងមក។ រូបថត សហការី
ភ្នំពេញៈ សហរដ្ឋអាមេរិកនឹងនិរទេសជនជាតិកម្ពុជាចំនួន ៥១ នាក់ដែលត្រូវបានរំពឹងថា នឹងមកដល់ប្រទេសកម្ពុជានាថ្ងៃព្រហស្បតិ៍ស្អែកនេះដែលការនិរទេសនេះគឺជាការនិរទេសដ៏ធំបំផុតនៅក្នុងប្រវត្តិសាស្ត្រនៃកម្មវិធីមាតុភូមិនិវត្តន៍រយៈពេល ១៥ ឆ្នាំដែលមានលក្ខណៈចម្រូងចម្រាស។
ក្រុមដែលត្រូវនិរទេសនេះត្រូវបានរំពឹងថានឹងរួមបញ្ចូលអ្នកដែលមានបញ្ហាសុខភាពផ្លូវចិត្ត និងរាងកាយដែលមានលក្ខណៈមានជំងឺរុំារ៉ៃ។ នេះបើតាមអង្គការ 1Love Cambodia ដែលជាអង្គការគាំទ្រជនដែលត្រូវនិរទេស។
ក្រុមនេះបានថ្លែងនៅក្នុងហ្វេសប៊ុករបស់ខ្លួនថា៖ «យើងត្រូវបានជម្រាបថាផ្ទុយពីកិច្ចព្រមព្រៀងរបស់អាមេរិក ក្រុមនេះនឹងរួមបញ្ចូលអ្នកដែលមានបញ្ហាសុខភាពផ្លូវចិត្ត និងផ្លូវកាយរុំារ៉ៃដែលនឹងតម្រូវឲ្យមានការគាំទ្រជាប់ជានិច្ចពីសហគមន៍របស់យើង»។ «យើងមានការឈឺចាប់ ហើយខឹងដែលនិយាយអំពីស្ថានភាពធ្ងន់ធ្ងរនេះ»។
លោក សុខ ផល អគ្គនាយកនៃអគ្គនាយកដ្ឋានអន្តោប្រវេសន៍មិនអាចទាក់ទងសុំអត្ថាធិប្បាយបានទេកាលពីថ្ងៃម្សិលមិញ។ ទោះយ៉ាងណាក្តីលោក គីម វន្នី មន្ត្រីផ្នែកពិនិត្យពេលចូលនៅអាកាសយានដ្ឋានអន្តរជាតិភ្នំពេញបានបញ្ជាក់ថា ក្រុមមន្ត្រីកំពុងរៀបចំសម្រាប់ការមកដល់របស់ពួកគេ ប៉ុន្តែបានកត់សម្គាល់ថា តួលេខពេលខ្លះអាចផ្លាស់ប្តូរ។
លោក វន្នី បានថ្លែងថា៖ «ដើម្បីឲ្យច្បាស់ នៅថ្ងៃនោះពួកគេបញ្ជូនឈ្មោះរបស់ពួកគេមកព្រលានយន្តហោះ។ នោះយើងនឹងដឹងច្បាស់ថា តើពួកគេកំពុងមកឬអត់»។
លោក Brendan Raedy អ្នកនាំពាក្យសម្រាប់ផ្នែកអន្តោប្រវេសន៍អាមេរិក និងគយបានបដិសេធធ្វើអត្ថាធិប្បាយដោយនិយាយថា៖ «ដោយសារសន្តិសុខប្រតិបត្តិការ ICE មិនធ្វើអត្ថាធិប្បាយលើជើងហោះហើរនាពេលខាងមុខរហូតទាល់តែការងារត្រូវបានបញ្ចប់»។
ជនជាតិកម្ពុជារហូតដល់ ២០០ នាក់ត្រូវបានរំពឹងថានឹងនិរទេសពីអាមេរិកមកកម្ពុជានាឆ្នាំនេះ។
មណ្ឌលទ្រទ្រង់ជនមាតុភូមិនិវត្តន៍សមាហរណកម្មបានទទួលជនដែលត្រូវបាននិរទេសប្រមាណ ៥៥០ នាក់រួចមកហើយក្នុងរយៈកាល ១៥ ឆ្នាំចុងក្រោយនេះ។ ភាគច្រើនបំផុតនៃអ្នកដែលត្រូវបាននិរទេសទាំងនោះបានចូលទៅក្នុងទឹកដីអាមេរិកជាជនភៀសខ្លួនតាំងពីកុមារភាពដែលរត់គេចចេញពីរបបខ្មែរក្រហមជាមួយគ្រួសាររបស់ពួកគេ ហើយពួកគេជាច្រើនមិនដែលមកប្រទេសកម្ពុជា ឬថែមទាំងមិនចេះនិយាយខ្មែរនោះទេ។
កម្មវិធីនិរទេសនេះបង្កើតឲ្យមានជម្លោះកាទូតរវាងអាមេរិក និងកម្ពុជាកាលពីឆ្នាំមុនបន្ទាប់ពីប្រទេសកម្ពុជាបានឈប់ចេញឯកសារធ្វើដំណើរដល់អ្នកដែលត្រូវនិរទេសភាគច្រើនបំផុតក្នុងចំណោមអ្នកដែលត្រូវនិរទេស។
កាលពីខែកុម្ភៈ ឧបការីក្រសួងការបរទេសអាមេរិកសម្រាប់កិច្ចការកុងស៊ុល លោក Carl Risch បានថ្លែងថាទណ្ឌកម្មទិដ្ឋាការទៅលើមន្ត្រីការបរទេសជាន់ខ្ពស់កម្ពុជា អាចនឹងត្រូវដកចេញវិញ «នាពេលខាងមុខឆាប់ៗនេះ» ប្រសិនបើរដ្ឋាភិបាលកម្ពុជាធ្វើតាមការសន្យាម្តងទៀតក្នុងការទទួលយកអ្នកដែលត្រូវនិរទេស។
លោក Jimmy Hiem ដែលជាសមាជិកម្នាក់នៃអង្គការ 1Love Cambodia បានថ្លែងថា ក្រុមនេះកំពុងប្រមូលជំនួយសម្រាប់ទិញសម្ភារផ្ទះបាយសម្រាប់អ្នកដែលត្រូវនិរទេសដូចជា ឆ្នាំងបាយ ចានក្បាន និងរបស់របរប្រើប្រាស់ក្នុងបង្គន់ជាដើម។
លោក Hiem ដែលត្រូវបាននិរទេសមកកម្ពុជាកាលពីមួយឆ្នាំកន្លះមុនបានថ្លែងថា លោកបានជួបការលំបាកចំពោះការរស់នៅនៅពេលមិនមានបងប្អូននៅក្នុងប្រទេសកម្ពុជា និងចេះនិយាយខ្មែរតិចតួច។
លោកបានថ្លែងថាលោកនៅមិនទាន់មានអត្តសញ្ញាណប័ណ្ណនៅឡើយ។
លោក Hiem បានថ្លែងបន្តថា៖ «នៅក្នុងចិត្តរបស់ខ្ញុំ វាមានជីវិតផ្សេងមួយទៀត បន្ទាប់ពីអាមេរិក។ ប៉ុន្តែពួកគេមិនបោះបង់ចោលទេ ហើយនោះជាអ្វីដែលយើងកំពុងព្យាយាមធ្វើគឺជួយពួកគេឲ្យមានទិសដៅក្នុងប្រទេសកម្ពុជា»៕ PS
