.jpg)
ភ្នំពេញៈ ក្រសួងការបរទេសអាមេរិកបានចេញផ្សាយរបាយការណ៍ប្រចាំឆ្នាំរបស់ខ្លួនស្តីពីសិទ្ធិមនុស្សទូទាំងពិភពលោក ដែលក្នុងនោះមានការរៀបរាប់អំពីការរំលោភបំពានសេរីភាពនៃការនិយាយស្តី ការប្រមូលផ្តុំ ការបង្កើតអង្គការវិជ្ជាជីវៈ និង ការរំលោភបំពានសេរីភាពសារព័ត៌មានដោយរដ្ឋាភិបាលកម្ពុជាក្នុងរយៈពេល ១ ឆ្នាំ។
ក្នុងចំណោមការរំលោភបំពាន «សិទ្ធិមនុស្សសំខាន់បំផុត» គឺ «ការចាប់ខ្លួនដោយមិនយុត្តិធម៌» ក្នុងនោះរួមមានការចាប់ខ្លួនលោក កឹម សុខា ប្រធានគណបក្សសង្គ្រោះជាតិ។
បន្ទាប់ពីការចាប់ខ្លួនលោក កឹម សុខា គណបក្សសង្គ្រោះជាតិដែលជាគណបក្សប្រឆាំងដ៏សំខាន់ត្រូវបានរំលាយ ខណៈមានក្តីបារម្ភយ៉ាងទូលំទូលាយអំពីស្ថានភាពប្រជាធិបតេយ្យរបស់កម្ពុជា។
របាយការណ៍នេះបានលើកឡើងថា៖ «បន្ទាប់ពីការចាប់ខ្លួនលោក កឹម សុខា ស្ទើររាល់មេដឹកនាំជាន់ខ្ពស់ទាំងអស់របស់គណបក្សសង្គ្រោះជាតិបានរត់ទៅលាក់ខ្លួន ឬ និរទេស»។
ក្រសួងការបរទេសក៏បានកត់សម្គាល់ផងដែរអំពី «ការប្រើប្រាស់ហិង្សា និងការដាក់ពន្ធនាគារទាំងជាក់ស្តែង និងគំរាមកំហែងដើម្បីបំភិតបំភ័យគណបក្សប្រឆាំង និងសង្គមស៊ីវិល ព្រមទាំងដើម្បីគាបសង្កត់សំឡេងប្រឆាំង»។
របាយការណ៍បានចោទប្រកាន់ស្ថាប័នតុលាការថាមានភាពលម្អៀងខាងនយោបាយ និងពុករលួយដោយថ្លែងថាវា «មិនអាចធានានូវដំណើរការត្រឹមត្រូវបាន»។
របាយការណ៍ដដែលក៏បានអះអាងផងដែរថាកម្ពុជាមានការឆែកឆេរ និងរឹបអូសដោយមិនមានដីកា និងថតសំឡេងទូរស័ព្ទរបស់អ្នកប្រឆាំង។
របាយការណ៍ខាងលើបានលើកឡើងអំពីការបង្ក្រាបទៅលើសារព័ត៌មានឯករាជ្យ ដោយប្រើប្រាស់ការបិទស្ថានីយវិទ្យុឯករាជ្យជាច្រើនថាជាគំរូសំខាន់នៃការដាក់កំហិតរបស់រដ្ឋាភិបាលទៅលើសំឡេងអ្នករិះគន់។
របាយការណ៍នេះក៏បានចោទសួរអំពីសុចរិតភាពនៃការស៊ើបអង្កេតទៅលើករណីឃាតកម្មលោក កែម ឡី ដែលជាអ្នករិះគន់រដ្ឋាភិបាល និងការបាត់ព្រះកាយលោកសង្ឃខ្មែរក្រោម ព្រះនាម មាស វិចិត្រ។
របាយការណ៍ដដែលបន្តថា៖ «មន្ត្រីសន្តិសុខក្របីរៀល (Krobei Riel) បានឃាត់ខ្លួន [ព្រះតេជគុណ វិចិត្រ និងមិត្តភក្តិម្នាក់] ហើយដោះស្បង់ជីពរ និងសម្លៀកបំពាក់របស់ពួកគាត់ទាំងបង្ខំ និងបានវាយពួកគាត់ដោយអះអាងថា ពួកគាត់មានព័ត៌មានអំពីឃាតកម្មលោក កែម ឡី»។
លោកសង្ឃម្នាក់ទៀតដែលគង់នៅវត្តជាមួយព្រះតេជគុណ វិចិត្រដែលសុំមិនបញ្ចេញព្រះនាមបានបញ្ជាក់កាលពីថ្ងៃអង្គារថា ព្រះតេជគុណ វិចិត្រ នៅមិនទាន់ត្រឡប់មកវិញនៅឡើយទេ ឬឮដំណឹងនោះឡើយ។
ព្រះតេជគុណ មានសង្ឃដីកាថា ព្រះតេជគុណ វិចិត្រ គឺជា «សង្ឃសកម្មជន» ហើយជាញឹកញាប់ចូលរួមនៅក្នុងការតវ៉ាគាំទ្រគណបក្សប្រឆាំង។
លោក សឹង សែនករុណា អ្នកនាំពាក្យរបស់អង្គការសិទ្ធិមនុស្សអាដហុកបានថ្លែងថាលោកបាននិយាយទៅកាន់មិត្តភក្តិរបស់ព្រះតេជគុណ បន្ទាប់ពីឧប្បត្តិហេតុនោះកាលពីខែមិថុនា និងបានបញ្ជាក់ថា ពួកគេត្រូវបានបង្ខំឲ្យដោះស្បង់ជីពរ និងសម្លៀកបំពាក់ និងវាយដំ។
លោក ករុណា បានថ្លែងថាអង្គការអាដហុក និងអង្គការសហប្រជាជាតិ បាននិងកំពុងស៊ើបអង្កេតករណីនេះ ប៉ុន្តែមិនទាន់មានតម្រុយអំពីកន្លែងរបស់ព្រះតេជគុណ វិចិត្រ នៅឡើយទេ។
ក្រៅពីនេះក្រសួងការបរទេសអាមេរិកបានថ្លែងថា «ពន្ធនាគារមិនត្រូវទៅតាមស្តង់ដារអន្តរជាតិ» ដោយសារមានការវាយដំទៅលើអ្នកទោស ការដាក់អ្នកទោសណែនចង្អៀត ការខ្វះអាហារ ជំងឺ និងការខ្វះទឹកស្អាត៕ PS
