.jpg)
លោកស្រី Heather Nauert អ្នកនាំពាក្យក្រសួងការបរទេសអាមេរិកកាលពីថ្ងៃ ១៥ សីហា។ រូបថត Twitter
ភ្នំពេញៈ មន្ត្រីក្រសួងការបរទេសសហរដ្ឋអាមេរិកបាននិយាយថា ពួកគេបានពង្រីកការដាក់ទណ្ឌកម្មទិដ្ឋាការលើមន្ត្រីកម្ពុជា និងបុគ្គលដែលទទួលខុសត្រូវចំពោះអ្វីដែលប្រទេសមហាអំណាចមួយនេះចាត់ទុកថាជាអ្នកពាក់ព័ន្ធនឹងការធ្វើឱ្យខូចដល់លទ្ធិប្រជាធិបតេយ្យនៅកម្ពុជាជាអ្វីដែលមន្ត្រីរដ្ឋាភិបាលកម្ពុជាថា អាមេរិកមិនយកប្រជាធិបតេយ្យធ្វើជាលេសដាក់ទណ្ឌកម្មលើកម្ពុជានោះទេ។
នៅក្នុងសន្និសីទរយៈពេលខ្លីកាលពីថ្ងៃពុធនៅសហរដ្ឋអាមេរិកលោកស្រី Heather Nauert អ្នកនាំពាក្យក្រសួងការបរទេសអាមេរិកបានថ្លែងថាសហរដ្ឋអាមេរិកបានពង្រីកការដាក់ទណ្ឌកម្មទិដ្ឋាការដល់មន្ត្រីរដ្ឋាភិបាល និងអ្នកនៅក្រៅរដ្ឋាភិបាលកម្ពុជា។ លោកស្រីបានលើកឡើងថា ក្រសួងការបរទេសសហរដ្ឋអាមេរិកបានចាត់ទុកការបោះឆ្នោតជាតិកាលពីថ្ងៃទី ២៩ ខែកក្កដាថាមិនត្រឹមត្រូវ មិនសេរី និងមិនយុត្តិធម៌។
លោកស្រីបានថ្លែងថា៖ «ដូចដែលបានពិនិត្យមើលនៅក្នុងសេចក្តីថ្លែងការណ៍ថ្ងៃទី ២៩ ខែកក្កដារបស់សេតវិមានអំពីការបោះឆ្នោតនៅកម្ពុជា យើងបានពង្រីកការរឹតត្បិតការផ្តល់ទិដ្ឋាការដែលបានផ្តួចផ្តើមឡើងកាលពីថ្ងៃទី ៦ ខែធ្នូឆ្នាំ ២០១៧ ទៅលើបុគ្គលពាក់ព័ន្ធដែលធ្វើឱ្យខូចដល់លទ្ធិប្រជាធិបតេយ្យនៅប្រទេសកម្ពុជា»។
លោកស្រីបានបន្តថា៖ «ការពង្រីកការរឹតត្បិតផ្តល់ទិដ្ឋាការនេះនឹងអនុវត្តចំពោះទាំងបុគ្គលដែលនៅខាងក្នុង និងខាងក្រៅរដ្ឋាភិបាលកម្ពុជាដែលជាអ្នកទទួលខុសត្រូវចំពោះសកម្មភាពប្រឆាំងនឹងលទ្ធិប្រជាធិបតេយ្យដ៏លេចធ្លោបំផុតនៅមុនការបោះឆ្នោតថ្ងៃទី ២៩ ខែកក្កដា។ ក្នុងកាលៈទេសៈជាក់លាក់មួយចំនួន សមាជិកគ្រួសាររបស់ពួកគេក៏នឹងត្រូវស្ថិតនៅក្រោមការរឹតត្បិតនេះផងដែរ»។
យ៉ាងណាក្ដីលោកស្រីបានអំពាវនាវឲ្យរដ្ឋាភិបាលកម្ពុជាជំរុញមានការផ្សះផ្សាជាតិ អនុញ្ញាតឱ្យមានប្រព័ន្ធផ្សព្វផ្សាយឯករាជ្យ និងសង្គមស៊ីវិលអាចបំពេញមុខងារបានក៏ដូចការដោះលែងលោក កឹម សុខា និងអ្នកទោសនយោបាយដទៃទៀត និងលុបចោលនូវបម្រាមហាមបក្សប្រឆាំងមិនឲ្យធ្វើនយោបាយជាដើម។
ក្រសួងការបរទេសអាមេរិកមិនបានផ្តល់ឱ្យដឹងពីចំនួនពិតប្រាកដនៃអ្នកដែលនឹងដាក់ចូលក្នុងការរឹតត្បិតនេះទេ។ ប៉ុន្តែកាលពីខែមិថុនាក្រសួងរតនាគារសហរដ្ឋអាមេរិកបានបង្កកទ្រព្យសម្បត្តិលោក ហ៊ីង ប៊ុនហៀង មេបញ្ជាការអង្គរក្សរបស់លោកនាយករដ្ឋមន្ត្រី ហ៊ុន សែន ដោយភ្ជាប់រូបលោកជាមួយនឹងករណីវាយតំណាងរាស្ត្រអតីតគណបក្សសង្គ្រោះជាតិនៅក្បែររដ្ឋសភា ដោយសារអង្គរក្ស ៣ នាក់នោះគឺស្ថិតនៅក្រោមការគ្រប់គ្រងរបស់លោក ហ៊ីង ប៊ុនហៀង ហើយអ្នកទាំងនោះត្រូវបានផ្តន្ទាទោស។
នៅក្នុងខែមិថុនាដដែល អង្គការឃ្លាំមើលសិទិ្ធមនុស្សបានហៅឧត្តមសេនីយ៍ ១២ រូបថាមាន «បាតដៃកខ្វក់» និងបានចោទប្រកាន់ថាជាប់ពាក់ព័ន្ធនឹងការរំលោភសិទ្ធិមនុស្សនៅកម្ពុជា។
ក្រោយមកកាលពីខែកក្កដាអង្គការ Global Witness បានដាក់ឈ្មោះឧកញ៉ា ៤ រូបថា មានតួនាទីមួយចំនួនដែលធ្វើឱ្យខូចដល់លទ្ធិប្រជាធិបតេយ្យ និងការរំលោភសិទ្ធិមនុស្សក្នុងនោះរួមមាន សមាជិកព្រឹទ្ធសភាលោក ម៉ុង ឫទ្ធី, សមាជិកព្រឹទ្ធសភា លោក លី យ៉ុងផាត់, សមាជិកព្រឹទ្ធសភាលោក ឡាវ ម៉េងឃីន និងលោកឧកញ៉ា ទ្រី ភាព ផងដែរ។
លោក ផៃ ស៊ីផាន អ្នកនាំពាក្យទីស្តីការគណៈរដ្ឋមន្ត្រីបានថ្លែងថា កម្ពុជាមានអធិបតេយ្យភាពរបស់ខ្លួន ហើយការបោះឆ្នោតកាលពីថ្ងៃទី ២៩ ខែកក្កដាគឺត្រូវបានសាទរពីក្រុមអ្នកសង្កេតការណ៍ជាតិ និងអន្តរជាតិ។ លោកបញ្ជាក់ថា សហរដ្ឋអាមេរិកមិនគួរយកលទ្ធិប្រជាធិបតេយ្យធ្វើជាលេសដើម្បីដាក់ទណ្ឌកម្មលើកម្ពុជាទេ ពីព្រោះអ្នកមានសិទ្ធិបោះឆ្នោតជាង ៨០ ភាគរយបានចេញទៅបោះឆ្នោត។
លោកបន្ថែមថា៖ «យើងមិនអាចលក់អធិបតេយ្យភាពរបស់កម្ពុជាបានទេ យើងមិនអាចលក់ឆន្ទៈរបស់ប្រជាជនដែលបានបោះឆ្នោតឱ្យនាយករដ្ឋមន្ត្រី ហ៊ុន សែន បានឡើយ យើងមិនអាចព្រងើយកន្តើយចំពោះកិច្ចខិតខំប្រឹងប្រែងរបស់សម្តេចតេជោ ហ៊ុន សែន បានទេ។ នៅក្នុងការបោះឆ្នោតលើកមុនអាយ៉ងរបស់សហរដ្ឋអាមេរិកមិនបានទទួលយកឆន្ទៈរបស់ប្រជាពលរដ្ឋទេ ប៉ុន្តែសម្តេច ហ៊ុន សែនបានបង្កើតលទ្ធិប្រជាធិបតេយ្យនៅកម្ពុជាដោយបង្កើត «វប្បធម៌សន្ទនា» ប៉ុន្តែវាបរាជ័យ»។
លោកបានបញ្ជាក់ថា៖ «ឥឡូវនេះ ទោះបីសម្តេច ហ៊ុន សែន ទទួលបានជ័យជម្នះភ្លូកទឹកភ្លូកដី ប៉ុន្តែអ្វីដែលខ្ញុំហៅ «លទ្ធិប្រជាធិបតេយ្យ ហ៊ុន សែន» គឺថាគាត់បើកចិត្តដល់គណបក្សក្រៅសភាឲ្យអាចជជែកវែកញែកជាមួយគណបក្សប្រជាជនបានតាមរយៈវេទិកា»។
លោក ផៃ ស៊ីផាន បន្ថែមថាលោកមិនទាន់បានឃើញសកម្មភាពពិតប្រាកដនៃការដាក់ទណ្ឌកម្មនេះទេ ហើយថា ប្រសិនបើមានការដាក់ទណ្ឌកម្មណាមួយនោះវានឹងប៉ះពាល់ដល់សហគមន៍អាស៊ានទាំងមូល។
លោកថ្លែងថា៖ «បន្ទាប់ពីឆ្នាំ ១៩៧៩ សហរដ្ឋអាមេរិកបានដាក់ទណ្ឌកម្មលើជនដែលនៅរស់រានមានជីវិតនៃរបបខ្មែរក្រហម។ ដូច្នេះយើងមានបទពិសោធគ្រប់គ្រាន់ហើយៗឥឡូវនេះយើងមានភាពក្លាហាន និងតស៊ូដើម្បីការពារផលប្រយោជន៍ជាតិឯករាជ្យ និងអធិបតេយ្យភាពរបស់យើង»៕ NS
