.jpg)
អាល់កុលក្លែងក្លាយ ឬមេតាណុលជិត ១២តោន ត្រូវបានមន្ត្រីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ «ក.ប.ប.» នៃក្រសួងពាណិជ្ជកម្ម នាំយកទៅបំផ្លាញចោល ក្រោយបង្ក្រាបបាននៅទីផ្សារ ១១ ឧសភា ២០២១។ រូប CCF
ភ្នំពេញៈ អាល់កុលក្លែងក្លាយចំនួនជិត ១២ តោនត្រូវបានមន្ត្រីអគ្គនាយកដ្ឋានការពារអ្នកប្រើប្រាស់កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប.) នៃក្រសួងពាណិជ្ជកម្មនាំយកទៅបំផ្លាញចោលកាលពីម្សិលមិញ ក្រោយពីបង្ក្រាបបាននៅទីផ្សារក្នុងរាជធានីភ្នំពេញកាលពីពេលកន្លងមក។
លោក ផាន អូន អគ្គនាយក ក.ប.ប បានថ្លែងនៅថ្ងៃទី ១២ ឧសភានេះថា តាមរយៈការចង្អុលបង្ហាញពីលោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្មក្នុងបរិបទដែលប្រទេសកម្ពុជាកំពុងជួបប្រទះនូវការរីករាលដាលនៃជំងឺកូវីដ១៩ក្នុងព្រឹត្តិការណ៍ «សហគមន៍ ២០ កុម្ភៈ» អគ្គនាយកដ្ឋាន ក.ប.ប បានបន្តស្រាវជ្រាវ និងបង្ក្រាបករណីអាល់កុលក្លែងក្លាយ ដោយបានណែនាំឱ្យមន្ត្រីក្រោមឱវាទទាំងអស់បង្កើនសកម្មភាពត្រួតពិនិត្យគុណភាពអាល់កុលដែលកំពុងធ្វើចរាចរណ៍ដាក់លក់និងចែកចាយក្នុងក្របខ័ណ្ឌទូទាំងប្រទេស។
លោកបានឱ្យដឹងថា កាលពីថ្ងៃទី ១១ ខែឧសភាឆ្នាំ ២០២១ មន្ត្រីអគ្គនាយកដ្ឋាន ក.ប.ប. បាននាំយកអាល់កុលក្លែងក្លាយ ឬមេតាណុលប្រមាណជិត ១២ តោនទៅបំផ្លាញចោលនៅទីលានចាក់សំរាមដែលស្ថិតនៅក្នុងខណ្ឌដង្កោ រាជធានីភ្នំពេញ ។
លោកបានបន្តថាពិធីបំផ្លាញចោលនេះត្រូវបានរៀបចំឡើងដោយមានការឯកភាពពីស្ថាប័នអយ្យការអមសាលាដំបូងរាជធានីភ្នំពេញ និងមានការចូលរួមពីមន្ត្រីរដ្ឋបាលខណ្ឌដង្កោផងដែរ។
លោក ផាន អូន បានបញ្ជាក់ថា៖ «សារធាតុមេតាណុលទាំងនេះត្រូវបានមន្ត្រីនៃអគ្គនាយកដ្ឋាន ក.ប.ប. ត្រួតពិនិត្យ ឃើញ និងរឹបអូសពីតាមបណ្តាឃ្លាំងស្តុកមធ្យោបាយដឹកជញ្ជូន និងបណ្តាឱសថស្ថាននានាក្នុងរាជធានីភ្នំពេញចាប់ពីថ្ងៃទី ១៥ ខែមេសា ដល់ថ្ងៃទី ៥ ឧសភា»។
លោកបានឱ្យដឹងថាអាល់កុល ឬអេតាណុលគឺជាសារធាតុដែលគេយកមកប្រើសម្រាប់សម្លាប់មេរោគពិសេសក្នុងដំណាក់កាលដែលជំងឺកូវីដ១៩កំពុងរីករាលដាលខ្លាំងធ្វើឱ្យតម្រូវការអាល់កុលមានការកើនឡើងខ្ពស់។ ហេតុនេះទើបមានបុគ្គលឆ្លៀតឱកាសមួយចំនួនបានបន្លំយកសារធាតុមេតាណុល (Methanol) មកលក់ជូនពលរដ្ឋ ដើម្បីយកទៅសម្លាប់មេរោគ ឬធ្វើជាសារធាតុផ្សំសម្រាប់ផលិតជែលសម្លាប់មេរោគជាដើម។
លោកបានបន្តថា សារធាតុគីមីមេតាណុលគឺជាសារធាតុពុល។ ការប្រើប្រាស់មេតាណុលធ្វើជាសារធាតុសម្លាប់មេរោគមិនត្រឹមតែមិនមានប្រសិទ្ធភាពក្នុងការសម្លាប់មេរោគប៉ុណ្ណោះទេ តែថែមទាំងធ្វើឱ្យប៉ះពាល់ដល់សុខភាពរបស់អ្នកប្រើទៀតផង។ ដូចជាបណ្តាលឱ្យរលាកស្បែក រលាកភ្នែក ឈឺក្បាល វិលមុខ ស្រវាំងភ្នែក ងងុយដេក បាត់បង់ស្មារតី ក្អួតចង្អោរ រំខានដល់ការរំលាយអាហារ ឬអាចបណ្តាលឱ្យស្លាប់បាន ប្រសិនបើយកទៅលាយជាមួយស្រាហើយបរិភោគលើសកម្រិតនោះ។
ទាក់ទងនឹងករណីនេះ អគ្គនាយកដ្ឋាន ក.ប.ប. បានអំពាវនាវដល់អាជីវករលក់ដុំ លក់រាយ ម្ចាស់ឱសថស្ថានម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់សូមប្រកបរបរអាជីវកម្មប្រកបដោយការទទួលខុសត្រូវដោយប្រកាន់ខ្ជាប់នូវក្រមសីលធម៌ និងសុចរិតភាពដោយត្រូវគិតពីសុខុមាលភាពរបស់អ្នកប្រើឱ្យខ្ពស់ជាងផលចំណេញរបស់ខ្លួន។
ជាមួយនេះដែរ អគ្គនាយកដ្ឋាន ក.ប.ប. ក៏បានរំឭកដល់សាធារណជនដែលជាអ្នកប្រើប្រាស់ទាំងអស់ឱ្យពិនិត្យ និងជ្រើសរើសផលិតផលដែលមានស្លាកសញ្ញា និងប្រភពត្រឹមត្រូវច្បាស់លាស់មុននឹងសម្រេចចិត្តជាវអាល់កុល ឬជែល យកមកប្រើប្រាស់ក្នុងគោលបំណងសម្លាប់មេរោគ។
ម្យ៉ាងទៀតប្រសិនបើមានករណីសង្ស័យជាយថាហេតុពាក់ព័ន្ធនឹងគុណភាពអាល់កុល ឬមានព័ត៌មានពីការស្តុកទុកការចរាចរ ឬចែកចាយអាល់កុលក្លែងក្លាយសូមផ្តល់ព័ត៌មានមកអគ្គនាយកដ្ឋាន ក.ប.ប. តាមរយៈលេខទូរស័ព្ទ 023 231 856 /092 830 856 ផេកហ្វេសប៊ុកផ្លូវការរបស់អគ្គនាយកដ្ឋាន ក.ប.ប. www.facebook.com/ccfkh/ ឬតាមរយៈគេហទំព័រwww.ccfdg.gov.kh/៕
