ភ្នំពេញៈ មន្ត្រីជំនាញនៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្មបានស្រាវជ្រាវបង្ក្រាបអាល់កុលក្លែងក្លាយបាន ១៨៣ កានទៀតស្មើនឹង ៥ ៤៩០ លីត្រ កាលពីថ្ងៃទី ១៨ ឧសភា ស្ថិតនៅភូមិប្រការ សង្កាត់ព្រៃស ខណ្ឌដង្កោ ដែលជនល្មើសបានដាក់លក់តាមអនឡាញ។
យោងតាមការផ្សព្វផ្សាយរបស់អគ្គនាយកដ្ឋាន ក.ប.ប នៅរសៀលថ្ងៃទី ១៨ ខែឧសភា ដោយអនុវត្តតាមការណែនាំរបស់លោក ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងមានការបញ្ជាផ្ទាល់ពីលោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយកនៃអគ្គនាយកដ្ឋាន ក.ប.ប បានស្រាវជ្រាវបង្ក្រាបអាល់កុលក្លែងក្លាយជាង ៤០ តោន នៅរាជធានីភ្នំពេញ និងខេត្តមួយចំនួនពាក់ព័ន្ធនឹងការចរាចរអាល់កុលក្លែងក្លាយក្នុងបរិបទនៃការរីករាលដាលនៃជំងឺកូវីដ១៩។
លោក ផាន អូន ថ្លែងថា មន្ត្រីជំនាញនៃអគ្គនាយកដ្ឋាន ក.ប.ប បានបើកការស្រាវជ្រាវ (Market Intelligence) តាមរយៈរូបភាពការបញ្ជាទិញអាល់កុល ដែលដាក់លក់លើបណ្តាញសង្គម Facebook យកមកធ្វើតេស្តនៅមន្ទីរពិសោធន៍របស់អគ្គនាយកដ្ឋាន ក.ប.ប វិភាគរកសារធាតុមេតាណុល ដែលក្លែងបន្លំជាអាល់កុលដើម្បីកំណត់អត្តសញ្ញាណ និងឈានដល់ការបង្ក្រាបអាល់កុលក្លែងក្លាយនេះតែម្ដង។
លោកថា៖ «មន្ត្រីនៃអគ្គនាយកដ្ឋាន ក.ប.ប ស្នើសុំគោលការណ៍ឯកភាពពីស្ថាប័នអយ្យការអមសាលាដំបូងរាជធានីភ្នំពេញដើម្បីនាំយករថយន្តមន្ទីរពិសោធន៍ចល័តវិភាគនៅនឹងកន្លែងដោយសហការជាមួយអាជ្ញាធរខណ្ឌដង្កោ។ ជាលទ្ធផលបានចុះបង្ក្រាបនៅទីតាំងខាងលើ។ អគ្គនាយកដ្ឋាន ក.ប.ប បានរកឃើញវត្តមាន អាល់កុលក្លែងក្លាយ ឬសារធាតុមេតាណុលបានចំនួន ១៨៣ កាន ស្មើនឹង ៥ ៤៩០ លីត្រ ត្រូវបានរឹបអូស និងចាត់ចែងបន្តតាមនីតិវិធីច្បាប់»។
អគ្គនាយកដ្ឋាន ក.ប.ប ក៏បានបញ្ជាក់ដែរថា អំឡុងនៃការរីករាលដាលជំងឺកូវីដ១៩ «សហគមន៍ ២០ កុម្ភៈ» អាល់កុលក្លែងក្លាយចំនួន ៤០ ៦២៥ លីត្រប្រមាណជាង ៤០ តោនត្រូវបានមន្ត្រីជំនាញនៃអគ្គនាយកដ្ឋាន ក.ប.ប បង្ក្រាបជាបន្តបន្ទាប់តាមបណ្តារាជធានី-ខេត្តមួយចំនួន។
បើតាម ក.ប.ប សារធាតុគីមីមេតាណុលគឺជាសារធាតុពុល។ ការប្រើប្រាស់មេតាណុលធ្វើជាសារធាតុសម្លាប់មេរោគមិនត្រឹមតែមិនមានប្រសិទ្ធភាពក្នុងការសម្លាប់មេរោគប៉ុណ្ណោះទេ តែថែមទាំងធ្វើឱ្យប៉ះពាល់សុខភាពរបស់អ្នកប្រើទៀតផង ដូចជាបណ្តាលឱ្យរលាកស្បែក រលាកភ្នែក ឈឺក្បាល វិលមុខ ស្រវាំងភ្នែក ងងុយដេក បាត់បង់ស្មារតី ក្អួតចង្អោរ រំខានដល់ការរំលាយអាហារ ឬអាច បណ្តាលឱ្យស្លាប់បាន ប្រសិនបើយកទៅលាយជាមួយស្រាហើយបរិភោគលើសកម្រិតនោះ។
ក.ប.ប អំពាវនាវដល់អាជីវករលក់ដុំ លក់រាយ ម្ចាស់ឱសថស្ថាន ម្ចាស់ផ្សារទំនើប និងអ្នកនាំចូលផលិតផលអាល់កុលទាំងអស់ សូមកុំយកសារធាតុមេតាណុលបន្លំជាអាល់កុលលក់ជូនពលរដ្ឋ ព្រោះសកម្មភាពនេះមិនត្រឹមតែមិនអាចទប់ស្កាត់ការចម្លងមេរោគ ឬបង្កផលប៉ះពាល់ដល់សុខភាពអ្នកប្រើប៉ុណ្ណោះទេ ថែមទាំងនាំដល់ការប្រឈមចំពោះច្បាប់ដល់ខ្លួនថែមទៀតផង៕