ឧត្តរមានជ័យៈ អាល្លឺម៉ង់បានប្រកាសផ្តល់ជំនួយចំនួន ៣,៥ លានអឺរ៉ូ បន្ថែមទៀតដល់អង្គការ HALO Trust ដើម្បីបោសសម្អាតមីននៅកម្ពុជាសម្រាប់ឆ្នាំនេះ និងឆ្នាំក្រោយ និងប្តេជ្ញាជួយកម្ពុជាឱ្យសម្រេចបាននូវគោលដៅជាប្រទេសគ្មានគ្រាប់មីននៅត្រឹមឆ្នាំ ២០២៥។
ការប្រកាសនេះធ្វើឡើង ខណៈលោក Christian Berger ឯកអគ្គរដ្ឋទូតអាល្លឺម៉ង់ប្រចាំនៅកម្ពុជា និងលោក លី ធុច ទេសរដ្ឋមន្ត្រី និងជាអនុប្រធានទី ១ អាជ្ញាធរមីនបានធ្វើទស្សនកិច្ចរួមគ្នាទៅកាន់ចម្ការមីនមួយនៅសង្កាត់អូរស្មាច់ក្រុងសំរោងកាលពីថ្ងៃទី ១៧ ខែមីនា។
ហ្វេសប៊ុកស្ថានទូតអាល្លឺម៉ង់បានបញ្ជាក់កាលពីថ្ងៃពុធថា៖ «អាល្លឺម៉ង់ផ្ដល់ថវិកាចំនួន ៣,៥ លានអឺរ៉ូបន្ថែមទៀត សម្រាប់ការបោសសម្អាតមីននៅកម្ពុជា ក្នុងឆ្នាំ ២០២០ និង ២០២១។ អង្គការបោសសម្អាតមីន HALO Trust នឹងអនុវត្តកម្មវិធីនេះ»។
ហ្វេសប៊ុកដដែលនេះបានដកស្រង់សម្ដីលោក Christian Berger ថា៖ «មីនគឺជាកេរដំណែលដ៏គួរឱ្យឈឺចាប់នៃអតីតកាលមួយ និងនៅតែជាឧបសគ្គដល់ការអភិវឌ្ឍ។ យើងរួមគ្នាជាមួយរាជរដ្ឋាភិបាល និងដៃគូអន្តរជាតិចាំបាច់ត្រូវបង្កើនការខិតខំរបស់យើង ដើម្បីសម្រេចគោលដៅកម្ពុជាគ្មានមីននៅឆ្នាំ ២០២៥។ ប្រទេសអាល្លឺម៉ង់ប្តេជ្ញាបន្តគាំទ្រសកម្មភាពបោសសម្អាតមីននៅក្នុងប្រទេសដើម្បីឆ្ពោះទៅដល់គោលដៅនេះ»។
ស្ថានទូតអាល្លឺម៉ង់បានបញ្ជាក់ក្នុងសេចក្តីប្រកាសព័ត៌មានកាលពីថ្ងៃពុធថា ផ្ទៃដីដែលមានមីន ហើយត្រូវបានដោះដោយក្រុមការងារដែលផ្តល់មូលនិធិដោយអាល្លឺម៉ង់កាលពីឆ្នាំមុននឹងត្រូវប្រើប្រាស់សម្រាប់ការដាំដុះដំឡូងមី ស្វាយចន្ទី ពោត ស្រូវ កៅស៊ូ និងស្វាយ។
ស្ថានទូតបានបញ្ជាក់ថា៖ «ផលដំណាំជិត ១ ៥០០ តោន ដែលត្រូវបានដាំដុះជារៀងរាល់ឆ្នាំនៅលើអតីតដីចម្ការមីនដែលបានបោសសម្អាតថ្មីៗទាំងនេះដោយបង្កើតឱ្យមានប្រាក់ចំណូលថេរ និងមាននិរន្តរភាពសម្រាប់កសិករ និងការងារសម្រាប់សហគមន៍»។
អាជ្ញាធរមីនបានដកស្រង់សម្ដីលោក លី ធុច ថា គិតត្រឹមខែកុម្ភៈ ឆ្នាំ ២០២០ ក្រោមជំនួយរបស់ប្រទេសអាល្លឺម៉ង់អង្គការ HALO Trust បានរំដោះផ្ទៃដីប្រមាណ ១២ គីឡូម៉ែត្រក្រឡា និងបានរកឃើញ និងបំផ្លាញមីនប្រឆាំងមនុស្ស ៣ ៤២១ គ្រាប់មីន ប្រឆាំងរថក្រោះចំនួន ១២៧ គ្រាប់ និងគ្រាប់យុទ្ធភណ្ឌមិនទាន់ផ្ទុះចំនួន ៣ ៥០៦ គ្រាប់ ដោយមានអ្នកទទួលផលជាង ១៤ ម៉ឺននាក់។
លោក លី ធុច ថ្លែងថា៖ «អាល្លឺម៉ង់បានផ្តល់ជំនួយបោសសម្អាតមីនមនុស្សធម៌នៅកម្ពុជាដល់អង្គការ HALO Trust ចាប់តាំងពីឆ្នាំ ២០១៦ សរុបថវិកាចំនួន ៧,២៥ លានអឺរ៉ូ ដែលក្នុងនោះថវិកាចំនួន ២,៥ លានអឺរ៉ូ សម្រាប់ការងារសកម្មភាពមីនក្នុងឆ្នាំ ២០២០»។
លោក លី ធុច បានប្រាប់ភ្នំពេញប៉ុស្តិ៍កាលពីថ្ងៃពុធថា ជំនួយរបស់អាល្លឺម៉ង់ មានសារៈសំខាន់ក្នុងការសម្រេចគោលដៅរបស់រាជរដ្ឋាភិបាលដែលបានប្រកាសជាផ្លូវការថា ក្នុងឆ្នាំ ២០២៥ កម្ពុជាគ្មានគ្រាប់មីន។
លោកថា អាជ្ញាធរមីនត្រូវពន្លឿនពង្រឹងនិងលើកកម្ពស់ប្រសិទ្ធភាពការងារសកម្មភាពដោះមីនដើម្បីឱ្យទាន់ផែនការ។ លោកថ្លែងបន្តថា៖ «ជំនួយរបស់អាល្លឺម៉ង់ដែលពោរពេញដោយចិត្តមនុស្សធម៌នេះពិតជាបានចូលរួមយ៉ាងសំខាន់ក្នុងការកម្ទេចចោលនូវឃាតករលាក់មុខ»។
លោកបន្ថែមថា៖ «យើងត្រូវប្រើប្រាស់នូវសម្ភារឱ្យបានទំនើបដែលចំណេញពេលវេលា និងថវិកា នៅពេលណាយើងដោះមីនបានលឿន និងមានប្រសិទ្ធភាពខ្ពស់។ អ៊ីចឹងសម្ភារដែលគេបង្កើតថ្មីៗហ្នឹងមានសម្ភារខ្លះ គេឱ្យទៅយើងធ្វើតេស្តគ្រាប់មីនហ្នឹងវាមានចែងមកស្រេច។ នៅពេលយើងដាក់ទៅចំជាតិដែក វាឱ្យសញ្ញាដែក ចំជាតិមីន វាឱ្យសញ្ញាជាមីន។ អ៊ីចឹង វាលឿន»៕