ភ្នំពេញៈ ប្រទេស អាល្លឺម៉ង់ បានសម្រេចផ្ដល់ជំនួយចំនួន ៥ លានអឺរ៉ូ ឬស្មើនឹង ៥,៦៧ លានដុល្លារសហរដ្ឋអាមេរិក ដើម្បីជួយដល់ការអនុវត្តក្របខ័ណ្ឌគណនេយ្យភាពសង្គម (ISAF) ដែលជាកម្មវិធីរួមគ្នារវាងរដ្ឋាភិបាល និងសង្គមស៊ីវិលក្នុងការលើកកម្ពស់ការផ្ដល់សេវាជូនពលរដ្ឋនៅថ្នាក់ក្រោមជាតិឱ្យកាន់តែមានប្រសិទ្ធភាព។
ការផ្ដល់ជំនួយទឹកប្រាក់នេះបានធ្វើឡើងស្របពេលលោក Norbert Barthle សមាជិកសភាសហព័ន្ធអាល្លឺម៉ង់ និងជារដ្ឋលេខាធិការក្រសួងសហប្រតិបត្តិការសេដ្ឋកិច្ច និងអភិវឌ្ឍន៍ បានមកបំពេញទស្សនកិច្ចនៅកម្ពុជា និងបានជួបជាមួយលោកនាយករដ្ឋមន្ត្រី ហ៊ុន សែន និងលោក ស ខេង រដ្ឋមន្ត្រីក្រសួងមហាផ្ទៃ កាលពីថ្ងៃម្សិលមិញ ហើយទឹកប្រាក់នេះគឺអាល្លឺម៉ង់មានបំណងឱ្យរដ្ឋាភិបាល និងសង្គមស៊ីវិលកាន់តែមានទំនុកចិត្តគ្នាបន្ថែមទៀត។
លោក Norbert Barthle បានថ្លែងនៅក្នុងសេចក្ដីប្រកាសនេះថា៖ «ការរីកចម្រើនខាងផ្នែកសេដ្ឋកិច្ចគឺជារឿងសំខាន់ ប៉ុន្តែមិនទាន់គ្រប់គ្រាន់នៅឡើយ ដូច្នោះសង្គមស៊ីវិលដែលមានសកម្មភាពដ៏រស់រវើក គឺជាចលនាមួយសម្រាប់ការផ្លាស់ប្ដូរនិងរីកចម្រើនទៅមុខ»។
យោងតាមផែនការអនុវត្តគណនេយ្យភាពសង្គមដំណាក់កាលដំបូងឆ្នាំ ២០១៦ ដល់ឆ្នាំ ២០១៨ សម្រាប់ការអភិវឌ្ឍតាមបែបប្រជាធិបតេយ្យនៅថ្នាក់ក្រោមជាតិ គឺបានផ្ដោតទៅលើវិស័យចំនួន ៣ គឺសេវាមណ្ឌលសុខភាព សាលាបឋមសិក្សា និងសេវារដ្ឋបាលឃុំនៅក្នុងស្រុកចំនួន ១២០ នៅតាមទីជនបទ ហើយដំណាក់កាលទី២ នៃផែនការអនុវត្តគណនេយ្យភាពសង្គមដែលមានបញ្ចូលសេវាផ្សេងៗទៀតនឹងត្រូវអនុវត្តនៅតំបន់ទីប្រជុំជន។
លោក ផៃ ស៊ីផាន អ្នកនាំពាក្យរដ្ឋាភិបាលមិនអាចទាក់ទងបានទេពីម្សិលមិញ។
លោក សន ជ័យ នាយកប្រតិបត្តិអង្គការសម្ព័ន្ធគណនេយ្យភាពសង្គមកម្ពុជា (ANSA) បានឲ្យដឹងថា ក្របខ័ណ្ឌគណនេយ្យភាពសង្គម (ISAF) គឺការធ្វើកំណែទម្រង់ក្នុងការផ្ដល់សេវាសាធារណៈឱ្យកាន់តែមានប្រសិទ្ធភាពតាមរយៈការងាររបស់រដ្ឋបាលថ្នាក់ក្រោមជាតិនៅតែជារឿងសំខាន់។
លោក សន ជ័យ បានថ្លែងថា ការអនុវត្តក្របខ័ណ្ឌគណនេយ្យភាពសង្គមនៅមិនទាន់បានអនុវត្តទូលំទូលាយនៅឡើយ ដោយសារនៅសល់តំបន់ដាច់ស្រយាលជាច្រើនទៀត ដែលជាមូលហេតុបណ្ដាលមកពីការផ្ដល់មូលនិធិពីអន្តរជាតិនៅមានកម្រិតនៅឡើយ៕