ភ្នំពេញៈ លោកស្រីអធិការបតីអាល្លឺម៉ង់ Angela Merkel កាលពីចុងសប្តាហ៍មុនបានផ្ញើលិខិតអបអរសាទរមួយមកលោកនាយករដ្ឋមន្ត្រី ហ៊ុន សែន ដោយជូនពរលោកចំពោះជោគជ័យនៅក្នុងអាណត្តិថ្មីរបស់លោកជាមួយនឹងការគូសបញ្ជាក់ថា កិច្ចសហប្រតិបត្តិការអាល្លឺម៉ង់ និងកម្ពុជាបានឈរលើមូលដ្ឋាននៃកិច្ចព្រមព្រៀងទីក្រុងប៉ារីសដែលចែងពីការគោរពសិទ្ធិមនុស្ស នីតិរដ្ឋ និងលទ្ធិប្រជាធិបតេយ្យ។ នេះបើយោងតាមការិយាល័យព័ត៌មានរបស់រដ្ឋាភិបាលអាល្លឺម៉ង់ និងគេហទំព័រ ក្រសួងការបរទេសកម្ពុជា។
លិខិតនេះគឺជាប្រភេទលិខិតទី ១ នៃការអបអរសាទរពីបណ្តាប្រទេសលោកខាងលិចដែលមិនចូលរួមនៅក្នុងការសង្កេតការណ៍បោះឆ្នោតជាតិថ្ងៃទី ២៩ ខែកក្កដា និងដែលមិនបានចូលរួមជាភ្ញៀវកិត្តិយស សម្រាប់ពិធីបង្កើតរដ្ឋសភា និងរដ្ឋាភិបាលកម្ពុជាថ្មីកាលពីសប្តាហ៍មុន។
បណ្តាប្រទេសលោកខាងលិច រួមទាំងប្រទេសអាល្លឺម៉ង់ផងដែរបានរិះគន់ថា ការបោះឆ្នោតរបស់កម្ពុជា «មានលក្ខណៈគុណវិបត្តិ» និង «គួរឲ្យអាម៉ាស់» ដោយសារអវត្តមានអតីតគណបក្សសង្គ្រោះជាតិដែលជាគណបក្សប្រឆាំងដ៏ធំរបស់កម្ពុជាដែលត្រូវបានរំលាយដោយតុលាការកំពូលកាលពីខែវិច្ឆិកា។
លិខិតរបស់លោកស្រី Angela Merkel បាននិយាយថា៖ «ប្រទេស និងប្រជាជនយើងទាំង ២ មានទំនាក់ទំនងល្អ។ មិត្តភាពរវាងប្រទេសទាំង ២ ត្រូវបានឆ្លុះបញ្ចាំងជាពិសេសតាមរយៈកិច្ចសហប្រតិបត្តិការនៅក្នុងគោលនយោបាយអភិវឌ្ឍន៍អស់រយៈពេលជាច្រើនឆ្នាំកន្លងមកហើយ»។
លិខិតនេះបន្ថែមថា៖ «កិច្ចសហប្រតិបត្តិការនេះបានឈរលើមូលដ្ឋានកិច្ចព្រមព្រៀងទីក្រុងប៉ារីសឆ្នាំ ១៩៩១ ដែលចែងពីការគោរពសិទ្ធិមនុស្ស នីតិរដ្ឋគោលការណ៍ប្រជាធិបតេយ្យព្រមទាំងការបោះឆ្នោតដោយសេរី និងយុត្តិធម៌»។
លិខិតនេះបន្តថា៖ «ចំពោះកិច្ចការពង្រឹងប្រជាធិបតេយ្យ និងការចូលរួមតាមរយៈកិច្ចសន្ទនានយោបាយដោយបើកចំហនៅកម្ពុជា សម្តេចអាចពឹងផ្អែកលើអាល្លឺម៉ង់បាន។ ខ្ញុំសូមជូនពរសម្តេចទទួលបានសំណាងល្អ និងសព្ទសាធុការពរក្នុងការបំពេញកិច្ចការសំខាន់ៗ»។
លោក ផៃ ស៊ីផាន អ្នកនាំពាក្យរដ្ឋាភិបាលកម្ពុជាបានកោតសរសើរចំពោះលិខិតរបស់លោកស្រី Merkel ប៉ុន្តែបានថ្លែងថា រដ្ឋាភិបាលថ្មីគឺកើតចេញពីឆន្ទៈរបស់ប្រជាជន។
លោកបន្តថា៖ «នេះគឺជាសេចក្តីសម្រេច និងការវាយតម្លៃដោយប្រទេសអាល្លឺម៉ង់ ដែលគោរពជម្រើសរបស់ប្រជាជនកម្ពុជា។ ជម្រើសរបស់ប្រជាជនកម្ពុជា សូម្បីតែសម្តេចនាយករដ្ឋមន្ត្រី ហ៊ុន សែន ក៏គោរពឆន្ទៈ និងសេចក្តីសម្រេចចិត្តរបស់ប្រជាជនកម្ពុជាផងដែរ»។
លោក អ៊ូ ចាន់រ័ត្ន អតីតតំណាងរាស្ត្ររបស់អតីតគណបក្សសង្គ្រោះជាតិបានមើលឃើញលិខិតរបស់លោកស្រី Merkel ក្នុងលក្ខណៈវិជ្ជមាន។ តាមរយៈខ្លឹមសារនៃលិខិតនេះលោកបានថ្លែងថា ប្រទេសអាល្លឺម៉ង់នៅតែសង្ឃឹមថា នឹងមានដំណោះស្រាយចំពោះបញ្ហានយោបាយកម្ពុជា ខណៈបណ្តាប្រទេសលោកខាងលិចក៏បើកទ្វារចំហសម្រាប់ការសន្ទនាផងដែរ។
លោកថ្លែងថា៖ «វាជាលិខិតពិធីសារ ប៉ុន្តែខ្ញុំមើលឃើញថាអាល្លឺម៉ង់ចង់បង្កើតទំនាក់ទំនង ហើយស្វែងរកវិធីឲ្យមានកិច្ចសន្ទនា។ ពិតណាស់ យុទ្ធសាស្ត្រនយោបាយរបស់ប្រទេសមួយចំនួន ពួកគេមិនចង់ឲ្យមានភាពប្រទូស្តរាយដាក់គ្នា ឬនៅក្នុងវិធីដែលមិនមើលមុខគ្នា។ ដូច្នេះពួកគេចង់សម្រួលបញ្ហា ហើយត្រួសត្រាយផ្លូវ ឬធ្វើជាស្ពានសម្រាប់កិច្ចសន្ទនា»។
«ខ្ញុំអបអរ និងស្វាគមន៍កិច្ចខិតខំប្រឹងប្រែងរបស់អាល្លឺម៉ង់។ វាជារឿងល្អ»។
ប៉ុន្តែលោក ឡៅ ម៉ុងហៃ ដែលជាអ្នកវិភាគនយោបាយបានមើលឃើញផ្ទុយពីនេះ។ លោកបានថ្លែងថា លិខិតរបស់លោកស្រីអធិការបតី Merkel គឺជាលិខិតធុរកិច្ចយ៉ាងច្បាស់ មិនមែនលក្ខណៈការទូត សង្ខេប និងត្រង់ៗទៅរកចំណុច ដើម្បីរំឭកលោកនាយករដ្ឋមន្ត្រី ហ៊ុន សែន អំពីកិច្ចព្រមព្រៀងសន្តិភាពទីក្រុងប៉ារីសដែលជាមូលដ្ឋាននាកិច្ចសហប្រតិបត្តិការរវាងប្រទេសអាល្លឺម៉ង់ និងប្រទេសកម្ពុជា។
លោក ឡៅ ម៉ុងហៃ ថ្លែងថា៖ «វាគឺជាការជូនដំណឹងមកនាយករដ្ឋមន្ត្រីរបស់យើង ឲ្យគោរពកាតព្វកិច្ចនៃកិច្ចព្រមព្រៀងទីក្រុងប៉ារីសស្តីពីការគោរពសិទ្ធិមនុស្ស នីតិរដ្ឋ និងប្រជាធិបតេយ្យ និងចូលរួមនៅក្នុងកិច្ចសន្ទនាជាមួយគណបក្សប្រឆាំង។ គាត់អាចនឹងប្រឈមមុខនឹងផលវិបាក ប្រសិនបើមិនគោរពតាមកិច្ចព្រមព្រៀងនេះ»។
លោកថ្លែងថាវាខុសពីលិខិតរបស់នាយករដ្ឋមន្ត្រីចិនដែលបានផ្តល់ការគាំទ្រដល់លោកនាយករដ្ឋមន្ត្រី ហ៊ុន សែន និងពង្រឹងកិច្ចសហប្រតិបត្តិការដែលមានស្រាប់រវាងប្រទេសចិន និងកម្ពុជា ខណៈលិខិតពីប្រទេសដទៃៗទៀត គឺជាលិខិតពិធីសារ ដើម្បីគាំទ្ររដ្ឋាភិបាលថ្មី និងគណបក្សកាន់អំណាច។
ទន្ទឹមនេះដែរលោក ហ៊ុន សែន នឹងដឹកនាំគណៈប្រតិភូជាន់ខ្ពស់ធ្វើដំណើរទស្សនកិច្ចផ្លូវការលើកទីមួយរបស់លោកនៅថ្ងៃនេះទៅចូលរួមពិព័រណ៍ ចិន‑អាស៊ាន លើកទី ១៥ នៅក្នុងទីក្រុងណាននីង ខេត្តក្វាងស៊ី ប្រទេសចិន។ នេះបើយោងតាមសេចក្តីប្រកាសព័ត៌មានរបស់ក្រសួងការបរទេស។ លោកក៏នឹងថ្លែងសុន្ទរកថានៅក្នុងពិធីបើកពិពរ័ណ៍នោះផងដែរ៕ PS