.jpg)
រតនគិរីៈ កាំភ្លើងកែច្នៃចំនួន ១៤ ដើមត្រូវបាននគរបាលស្រុកបកែវយកទៅរក្សាទុក បន្ទាប់ពីពលរដ្ឋនៅភូមិសាលាឃុំកក់ ស្រុកបកែវ ខេត្តរតនគិរី យកទៅប្រគល់ឲ្យតាមរយៈការបំផុសអប់រំពីសមត្ថកិច្ចកាលពីថ្ងៃទី ១២ ខែធ្នូ ឆ្នាំ២០១៨។
លោក ជួប វណ្ណារក្ស អធិការនគរបាលស្រុកបកែវបានប្រាប់កាលពីម្សិលមិញថា កាំភ្លើងដែលសមត្ថកិច្ចរបស់លោកទទួលយកពីពលរដ្ឋនោះសុទ្ធសឹងតែជាអាវុធកែច្នៃ ហើយការប្រគល់អាវុធនេះគឺក្រោយពីសមត្ថកិច្ចបានចុះទៅផ្សព្វផ្សាយដល់លំនៅឋានពួកគាត់ស្តីពីគោលនយោបាយភូមិ-ឃុំមានសុវត្ថិភាព ។
លោកបញ្ជាក់ប្រាប់ថា៖ «ពួកគាត់យក អាវុធមកប្រគល់ឲ្យសមត្ថកិច្ចយើងនេះ គឺដោយសារពួកគាត់បានយល់ច្បាស់ពីការអប់រំផ្សព្វផ្សាយពីគោលនយោបាយភូមិ-ឃុំ មានសុវត្ថិភាព។ យើងបានពន្យល់ពួកគាត់ថា អាវុធទាំងនោះទោះជាមិនពិតក្តី តែវាអាចសម្លាប់មនុស្សបាន ហើយបើពលរដ្ឋយើងណាម្នាក់យកទៅបាញ់សម្លាប់គេគឺត្រូវជាប់ពន្ធនាគារ » ។
លោកបានបន្តថាអាវុធកែច្នៃទាំង ១៤ ដើមនោះគឺជាអាវុធដែលពលរដ្ឋយកទៅប្រកបរបរចូលព្រៃបាញ់សត្វដែលប្រើដែកកាំកង់ជាគ្រាប់ ឬ ពួកគាត់កែច្នៃដែកធ្វើជាគ្រាប់ក៏មាន ។
លោកបានបញ្ជាក់ថាបើទោះជាពលរដ្ឋបានប្រគល់អាវុធដល់សមត្ថកិច្ចបែបនេះក្តី ប៉ុន្តែលោកអាចសន្និដ្ឋានបានថាពលរដ្ឋក្នុងមូលដ្ឋានស្រុកបកែវពិតជាមិនទាន់ប្រគល់ឲ្យអស់នៅឡើយទេ តែទោះយ៉ាងណាសមត្ថកិច្ចរបស់លោកនឹងព្យាយាមចុះទៅដល់ភូមិ-ឃុំរបស់ពួកគាត់បន្តទៅទៀតដើម្បីផ្សព្វផ្សាយអប់រំដល់ពលរដ្ឋឲ្យពួកគាត់យល់ច្បាស់ពីច្បាប់ ។
លោក វណ្ណារក្ស បានថ្លែងថា៖ « ពលរដ្ឋរបស់យើងភាគច្រើនជាជនជាតិភាគតិច ដូច្នេះពួកគាត់មិនសូវបានយល់ដឹងច្បាស់ពីច្បាប់ទម្លាប់នោះទេ ហើយខ្ញុំគិតថា ប្រសិនបើពួកគាត់ទទួលបានការផ្សព្វផ្សាយអប់រំស្តីពីគោលនយោបាយភូមិ-ឃុំមានសុវត្ថិភាពញឹកញាប់នោះ ពួកគាត់នឹងមានការភ្ញាក់រឭកច្រើនបន្តទៀត » ៕
